30
I menshe rikrenn kol bare diwessa ‘Passa’
1 Un o Hiskija bitchras bitchepangre an o tselo them Israel un Juda un tchinas lila, hoi lo bitchras an i themma Efrajim un Manasse, te wenn le an o baro Debleskro kheer khetne an o foro Jerusalem, te rikrenn le kol bare diwessa, hoi kharenn ‘Passa’ o baro Debleske, kai o Israeleskro Dewel hi. 2 Glan kowa rakras pes o baro rai tele kol pralstune murshentsa un kolentsa an o foro Jerusalem, un putchas lendar, te wals mishto, te rikrenn le o Passa kau bersh an o duito tchon. 3 Jon nai kran les gar an o tchatcho tsiro, kowa wals o ersto tchon. Len his gar doha rashaja mank pende, kai kran pen djudjo i budjake o Debleske, un i menshe nai wan gar jaake sik an o foro Jerusalem. 4 Doleske patsan o baro rai un i tsele menshe, kai kote khetne his, kai kowa mishto hi, te rikrenn le o Passa an o duito tchon.
5 Un jaake kran le win, te well win gole dino an o tselo them Israel, fun Beersheba bis Dan, te wenn le an o foro Jerusalem, un rikrenn o Passa o baro Debleske, kai o Israeleskro Dewel hi. An kol wawar bersha nai rikran bud lendar les gar jaake har glan-tchinlo was.
6 Un o baro rai un i pralstune dan i bitchepangren i lila an o wast. Un kolla nashan an o tselo them Israel un Juda, un dan win gole jaake har o baro rai lenge penas: “Tumer Israelitarja, kai pral atchan un win lino wan dran i wasta kol bare rajendar pral o them Assur, awenn pale pash o baro Debleste, ko Dewel tumare phurendar, o Abraham, o Isaak un o Israel! Palle well job pale pash tumende. 7 Ma awenn jaake har tumare dada un tumare phrala, kolla kai mukan o baro Debles, ko Dewel pengre phurendar! Doleske mukas lo len an i bibacht te nashell, har tumer les kanna dikenna. 8 Ma krenn tumare djia har bar, har les tumare phure kran! Shunenn ap o baro Debleste! Un awenn an leskro kheer, koles job peske win rodas hako tsireske, un mangenn les an, kai tumaro Dewel hi! Palle djal leskri bari choli tumendar krik. 9 Te wenn tumer pale pash o baro Debleste, palle hatsenn tumare phrala un tchawe kamlepen pash kolende, kai len pandles rikrenna, un jon nai wenn pale pale an kau them. O baro Dewel, tumaro Dewel, hi i latcho un kamlo Dewel. Un job sikrell tumen gar o dumo, te wenn tumer pale pash leste.”
10 Un i bitchepangre djan jek forestar an o wawar an o them Efrajim un Manasse, un nashan bis Sebulon. Bud kol menshendar kote sanan len win un rikran len dineleske. 11 Gar bud mursha his dran i khera Asser un Manasse un Sebulon, kai shunan ap lende, un kran pen gar bares, un wan an o foro Jerusalem. 12 Un o Debleskro wast his pral o them Juda, te kran le jek djijeha, hoi o baro rai un i pralstune lenge penan, un hoi o baro Dewel lendar kamella.
13 Un an o foro Jerusalem wan bud menshe khetne, te rikrenn le kol bare diwessa, kai chan le mare, kai kek shutlo jarro dren hi. Un an o duito tchon his bud bud menshe kote khetne. 14 Un jon kran pen ap i budi, te lenn le kol tsele chatchepangre krik dran Jerusalem, kai i mule debla an-mangedo wan. Ninna kol boba, kai lenge sungepaskro koowa chatchedo was, lan le krik un witsran halauter pash o pani, hoi kharell Kidron. 15 An o 14. (deesh-te-starto) diwes an o duito tchon maran le terne bakren, te chan le ko chapen, hoi kharell ‘Passa’. Un i rashaja un i Levitarja, kai pen glan kowa gar djudjo kran o Debleske, kolla ladjan pen. Un kanna kran le pen djudjo un anan viechen pash o baro Debleskro kheer, te wenn le chatchedo. 16 Un jon his tardo ap pengri platsa, jaake har tchinlo hi an i lila, hoi o Debleskro mursh, o Mose, tchinas. Un i Levitarja dan i rashajende o rat kol marede viechendar, un kolla witsran les ap i chatchepaskri.
17 Bud kolendar, kai khetne wan, kran pen gar djudjo glan kal diwessa. Jaake nai maran le penge gar i terno bakro. Doleske maran i Levitarja i bakren lenge. Jaake nai dikas o baro Dewel latches ap kol bakre.
18-19 Bud kol menshendar dran i khera Efrajim, Manasse, Issachar un Sebulon, kran pen gar djudjo un chan ko chapen ‘Passa’ gar jaake, har glan-tchinlo his. Doleske mangas o Hiskija o baro Debles lenge un penas: “Tu, baro Dewel, ko Dewel mare phurendar, hal latches menge, me mangau tut, ab kamles halauterenge, kai rodenn tut o tselo djijeha, tut, o baro Debles, ninna te kran le pen gar jaake djudjo tuke, har hunte krans le!” 20 Un o baro Dewel shunas ap o Hiskija un mukas kek phagi ap lende te well.
21 Un i Israelitarja, kai an o foro Jerusalem khetne wan, rikran efta diwessa ko festo, kai chan le kek maro dran shutlo jarro. Un len his bari bacht an o dji. Un i Levitarja un i rashaja sharan o baro Debles hako diwes baro bashepah. 22 Un o Hiskija rakras kamles ap i tsele Levitarja, kai kran le pengri budi mishto glan o baro Debleste.
Efta diwessa kran i Israelitarja ko festo. Un khetne chan le ko mass kol viechendar, hoi dan le o baro Debleste, un parkran pen pash leste, ko Dewel lengre phurendar. 23 Pal kol diwessa kran le win, te atchenn le wawar efta diwessa khetne. Un ninna an kal efta diwessa chan un pijan le un his bachteles khetne. 24 Un o Hiskija, o baro rai pral Juda, das len 1.000 (jek sero) terne gurma un 7.000 (efta serja) bakre. Un i pralstune dan len ninna jek sero terne gurma un deesh serja bakre. Un bud kol rashajendar kran pen djudjo pengri budjake o Debleske.
25 Un i tsele menshe his bachtelo, kolla kai wan dran o them Juda, i rashaja un i Levitarja, un kolla, kai wan dran Israel, un ninna i wi-themarja, kolla kai wan dran o them Israel, un kolla, kai djiwan an o them Juda. 26 Jaake his bud bachtelo gipen un sapen an o foro Jerusalem. Jaake rah har o Davideskro tchawo, o Salomo, o baro rai pral Israel his, was sawo koowa buder gar diklo an o foro Jerusalem. 27 Un i rashaja un i Levitarja stan pre un rakran o Debleskri bacht pral i tsele menshende win. Un o baro Dewel shunas lengro rakepen, un hoi le lestar mangan, was pash leste an o bolepen shunlo.