20
I Moabarja un i Ammonarja wenn, te kurenn le pen o themeha Juda
1 Pal i tsiro wan i Moabarja un i Ammonarja, te kurenn le pen o Josafateha. Un lentsa wan ninna lurde dran o them Meun. 2 Kote was o Josafateske penlo: “Bud lurde dran o them Edom wenn i wawar rigjatar o baro panjestar, hoi kharell Londo Baro Pani, te kurenn le pen tuha. Un jon hi tardo pash o foro Hazezon-Tamar.” I wawar lab kau foreske hi En-Gedi.
3 Kote was i traash pral o Josafat, un job kamas o baro Debles te mangell, te well lo ap lengri rig. Jaake mukas lo i tsele menshenge an o them Juda te penell, te chan le tchi buder. 4 Un dran o tselo them Juda wan i menshe khetne, te mangenn le o baro Debles, te well lo lenge ap i rig. Awa, dran i tsele forja wan le an o foro Jerusalem, te mangenn le o baro Debles, te well lo lenge ap i rig.
O Josafat rakrell o Debleha
5 Un i menshe dran o them Juda khetne kolentsa dran o foro Jerusalem his khetne ap o newo glanstuni platsa an o baro Debleskro kheer. Un o Josafat his tardo glan lende. 6 Un job penas: “Baro Dewel, tu Dewel mare phurendar, tu hal o Dewel an o bolepen un o rai pral i tsele raja un lengre themma ap kai phub. Un an tiro wast hi i soor un o penepaske pral halauter, un kote hi kek, kai nai well sorleder har tu. 7 Maro Dewel hal tu, un tradal kol tsele wawar menshen an kau them win glan mende, tire menshende Israel. Un dal kau them hako tsireske kol menshenge, kai wan o Abrahamestar, kai tiro maal his. 8 Un jon djiwan an kau them un kran tuke i kheer, te djiwess kate un wess kate an-mangedo. Jon penan: 9 Te well pral mende i bibacht, nai well i baro kurepen, i phagi, i djungelo nasslepen, i bari bok, palle kamah glan tute te well glan kau kheer, kai tu weh an-mangedo, te das mer i bari gole ap tute. Un palle shuneh tu un leh men win dran koi bibacht, hoi pral mende was.
10 Kanna dik! O Ammonarja, un o Moabarja un kolla dran i berge Seir, kamenn pen mentsa te kurell. Har mare phure wan dran o them Egiptia win, mukal len gar an kal themma te djal. Jaake djan le trul kal themma trujel un maran len gar. 11 Un kanna dik, har jon parkrenn pen pash mende! Jon wenn, te tradenn le men win dran tiro them, hoi mende dal.
12 Maro Dewel, kameh len gar pengri phagi te dell? An mende hi kek soor, te dikah har bud jon hi, kai kamenn pen mentsa te kurell. Un mer djinah gar, hoi te kras; doleske dikenn mare jaka ap tute.”
O baro Dewel rakrell i lab pale pale
13 Un i tsele mursha dran o them Juda, ninna lengre tchawe un djuwja pengre tikne tchawentsa, halauter his tardo glan o baro Debleste. 14 Un o baro Debleskro ducho was ap i Levitari, kai his tardo mashkral kol bud menshende. Job was i menshendar Asaf. Leskro lab his Jahasijel, koleskro dad his o Secharja, koleskro dad his o Benaja, koleskro dad his o Jehijel, koleskro dad his o Mattanja.
15 Un o Jahasijel penas: “Shunenn mishto, menshale dran o them Juda un dran o foro Jerusalem, un tu, baro rai Josafat! Kawa penell o baro Dewel tumenge: Ma darenn, un denn gar tiknes palla glan kol bud lurdende, kolen tumer dikenna! Kau kurepen hi gar tumaro kurepen, o Debleskro kurepen hi. 16 Taissar djan tele pash lende! Te wenn jon pre ap o pralstuno drom pash Ziz, wenn tumer lentsa khetne kote, kai i tala pre herella, glan o mulo diwjo them Jeruel. 17 Gar tumer hunte kurenn tumen kote. Atchenn glan lende tardo! Atchenn kote un dikenn, har me, o baro Dewel, tumen dran lengro wast win lau. Me hom pash tumende, tumer menshe dran Juda un Jerusalem. Ma darenn! Trashenn tchi! Taissar djan pash lende! O baro Dewel hi tumentsa.”
18 Un o Josafat witsras pes ap i phub o mujeha. Un i tsele menshe dran o them Juda un dran o foro Jerusalem witsran pen tele glan o baro Debleste, un mangan les an. 19 Un i Levitarja dran i khera Kohat un Korach, stan pre un sharan i bari goljah o baro Debles, kai o Israeleskro Dewel hi.
O baro kurepen
20 Un jon stan sik taissarlake pre, un djan win an o mulo them Tekoa. Har jon win djan, djas o Josafat glan lende, un penas: Murshale dran Juda un Jerusalem, shunenn, hoi tumenge penau: Patsenn o baro Debleske, kai tumaro Dewel hi, un tumer atchenn sorelo, patsenn, hoi leskre rakepangre tumenge penan, palle well lauter mishto tumenge. 21 Job rakras pes i menshentsa tele, un bitchras gipangre, te djan le glan i lurdende, an-rido an pengre shukar koola, un giwenn o baro Debleske koi gili: Parkrenn tumen pash o baro Debleste! Leskro latchepen hi an hako tsiro koi. 22 Un har jon giwan un pen parkran, kras o baro Dewel, te lan kol wawar lurde bari daar, kol Ammonarja, Moabarja un kolla dran i berge Seir, kai wan, te kurenn len pen i menshentsa dran Juda. Un jon dan pen jek o wawares temerl. 23 I Ammonarja un i Moabarja kuran pen kolentsa dran i berge Seir, un dan len khetne. Un har jon halauteren maran dran i berge Seir, djas jek ap o wawareste, un jon dan pen kokres khetne.
24 Un har i lurde dran Juda ap ko kotar them wan, kai nai dikan le an o mulo them dren, un pen trujel dikan pal kol bud lurdende, dikan le kokres mulen kote tchiddo ap i phub. Kek djiwas buder. 25 Kote djan o Josafat un leskre lurde, te lenn le kowa, hoi i mule lurden pash pende his, un hatsan bud viechena, brawlepen, ripja un kutch koowa. Jaake bud his, te nai hidjran le les gar halauter. Triin diwessa his le koi, te lenn le o tselo koowa, jaake bud his kowa. 26 Ap o starto diwes wan le lauter khetne an i Sharepaskri tala un sharan o baro Debles. Doleske kharan le koi tala ‘Sharepaskri tala’. Jaake kharell li bis ap kau diwes.
27 Jaake djan i mursha dran o them Juda un dran o foro Jerusalem pale pale an o foro Jerusalem. Un o Josafat djas glan lende. Lengre djia his bachtelo. O baro Dewel das len koi bari bacht an o dji, te das lo len gar an i wasta kolendar, kai wan, te kurenn le pen lentsa. 28 Un jon wan an o foro Jerusalem dren, un bashran ap i zimbale, harfe un phurdepangre. Jaake wan le glan o baro Debleskro kheer.
29 Har shunan i menshe an kol wawar themma, har kuras pes o baro Dewel kolentsa, kai kaman i Israelitarjen te marell, un har was job o sorleder, koi was i bari traash o Deblestar pral lende. 30 Jaake nai djiwan i menshe an o them Juda, kai o Josafat o baro rai his, kek kurepah. Leskro Dewel kras, te djiwas lo an o latchepen kol thementsa trul leste.
O Josafat hi o baro rai pral Juda
31 Un o Josafat his o baro rai pral o them Juda. Job his 35 (trijanda-te-pantch) bersha, har was lo baro rai. 25 (biish-te-pantch) bersh his lo baro rai, un djiwas an kau tsiro an o foro Jerusalem. Leskri dai his i Asuba, kolakro dad o Shilhi his. 32 Un o Josafat djas ap o drom, kai leskro dad, o Asa, ninna djas. Un jaake har leskro dad kras lo, hoi latcho hi glan i jaka o baro Deblestar. 33 Kokres kol platse, kai i mule debla an-mangedo wan, mukas lo tardo te atchell. Ap ko tsiro wan i menshe gar pengro tselo djijeha pale pash o Debleste pengre phurendar.
34 Un ko tselo wawar koowa, hoi pral o Josafat penepaske hi, kowa hi tchinlo an o liil, hoi tchinas o Jehu, koleskro dad o Hanani his, un was pre-lino an i familjakro liil i bare rajendar pral o them Israel.
O Josafat krell pes o rajeha pral Israel khetne
35 Har his o Josafat o baro rai pral Juda, his o Ahasja o baro rai pral Israel. Kowa djiwas jaake, har glan o baro Debleste gar mishto hi. Koi was i diwes, kai kran kol dui win, 36 te krenn le penge shiffe, te bitchrenn le len an o them Tarsis. Un jon mukan kol shiffe pash o foro Ezjon-Geber te krell. 37 Koi his i mursh, kowa kharas Elijeser, un his dran Maresha. Leskro dad his o Dodawa. Ap leste penas o baro Dewel i lab, hoi kowa dureder penas ap o Josafat. Job penas: “Tu kral tut khetne mit o Ahasja. Doleske krell o baro Dewel kowa paash, hoi kral.” Un kol shiffe phagan an kotja, un nai djan gar an Tarsis.