19
O Jehu tchingrella ap o Josafat
1 Un o Josafat, ko baro rai pral Juda, was sasto pale khere an o foro Jerusalem. 2 Un kote was leske o dikepaskro, o Jehu an o drom. Koleskro dad his o Hanani. Un o Jehu penas ap o baro rajeste Josafat: “Hoske wal tu o tchilatcho mursheske ap i rig, un wal i maal kolestar, kai kamas o baro Deblestar tchi te djinell? Doleske well i choli o baro Deblestar pral tute. 3 Tchomone latches was pash tute ninna hatslo: Tu chatchral kol figure an o them, hoi i debletsa Ashera sikrenn, un rodal pal kowa, hoi o baro Dewel kamell.”
Tchatchepangre mursha wenn an pengri budi dren tchiddo
4 Un o Josafat djiwas an o foro Jerusalem, un djas pale an o tselo them trujel fun o foro Beersheba bis pash i berge Efrajim, un anas i menshen pale pash o baro Debleste, kai o Dewel lengre phurendar his. 5 Un an i tsele sorele forja an o them Juda tchiwas lo tchatchepangren an pengri budi dren, 6 un penas ap lende: Denn garda, har rakrenn o tchatchepen win pral i menshende! Tumer rakrenn an o lab o baro Deblestar un gar an o lab i menshendar. Un job hi tumentsa, te rakrenn tchatchepaskre laba win. 7 Un kanna rikrenn o baro Debles glan tumare jaka, rikrenn tumen ap o tchatchepen un denn hakeneste peskro tchatchepen. Ma bistrenn, pash maro baro Debleste hi kek chochepen. Un job dikell witar gar ap kowa koon glan leste tardo hi. Un job mukell pes gar te ginell.
8 Un ninna an o foro Jerusalem rodas o Josafat tchatchepangre murshen win dran i Levitarjen un i rashajendar un i pralstunendar pral i bare familje an Israel, te rakrenn le o tchatchepen pral i menshende jaake win, har an o baro Debleskre lila tchinlo hi, un te hi i menshe an o foro Jerusalem tchingepen mank pende.
9 Lenge penas lo: “Rikrenn pash tumari budi o baro Debles glan tumare jaka! Rikrenn tumen ap leskre laba tumaro tselo djijeha an halauter, hoi krenn.
10 Te wenn pash tumende tumare phrala, kol tchatchepangre dran kol wawar forja, un putchenn tumendar, hoi te krenn le pash kau te ko tchingepen, nai djal trul rat fer rat, nai djal trul o Debleskro drom un leskre laba, kowa, hoi job tumendar kamell, un hoi an leskre tchatchepaskre laba tchinlo hi, palle hunte tumer lenge penenn un sikrenn, har kowa tchatcho hi, te anenn le kek doosh pral pende glan o baro Debleste, un leskri choli pral tumende well un pral tumare phrala. Te sikrenn tumer lende lauter mishto, anenn tumer kek doosh ap tumende.
11 Dikenn, o pralstuno rashai, o Amarja hi pral tumende tardo an o Debleskro tselo koowa. Un o Sebadja, koleskro dad o Jishmael his, – job hi o pralstuno pral o kheer Juda – les hi penepaske pral halauter, hoi an miro, o baro rajeskro, wast hi. Un i Levitarja hi tumare tchinepangre, kai tchinenn an lila, hoi hunte well pre tchinlo. Krenn tumari budi kek darjah! O baro Dewel well kolenge ap i rig, kai krenn, hoi mishto hi.”