7
O kheer well o baro Debleske dino
1 Har o Salomo o baro Debleha rakras, har lo peskre tsele laba wi-rakras, peras i jag dran o bolepen un chatchras i marede viechen un kol kotja mass, hoi his tchiddo ap i chatchepaskri. Un o kheer was pherdo o baro Debleskro railepen, 2 te nai djan i rashaja gar an o kheer dren. 3 Un i tsele Israelitarja dikan, har i jag dran o bolepen peras un o baro Debleskro railepen ap o kheer his. Un jon djan ap pengre tchanga pengro mujeha ap i barra ap i phub, un mangan les an, un sharan o baro Debles kal labentsa: “Job hi kamlo, un leskro latchepen hi hako tsiro menge koi.”
4 Un o baro rai un i tsele Israelitarja anan viechen o baro Debleske. 5 Un o baro rai Salomo mukas 22.000 (biish-te-dui-serja) grumjen un 120.000 (sheel-te-biish-serja) bakre te marell. Jaake dan le o kheer o baro Debleste, te well les leskro kheer. Kowa kras o baro rai Salomo khetne i tsele Israelitarja. 6 Un i rashaja kran pengri budi. Un i Levitarja his pashel tardo un bashran ap pengre dorjengre bashepangre, hoi kerdo his o baro Debleske. Kal bashepangre mukas o baro rai, o David glan i tsiro te krell, te sharenn le o baro Debles. Jon bashran un giwan koi Debleskri gili, hoi o David kras: “Leskro latchepen hi an hako tsiro menge koi.” Un i rashaja his ap i wawar rig tardo, un phurdan an i phurdepangre. Un i tsele Israelitarja his koi tardo.
7 Koi sasterni chatchepaskri, hoi o Salomo kras, his gar bares doha, te chatchrenn le kol viechen, ko jarro un ko thulepen, hoi o Debleske dino was. Doleske las o baro rai Salomo ninna o mashkralstuno kotar ap i platsa glan o Debleskro kheer chatchepaske. Kote mukas lo sawe viechen te chatchrell, hoi wan tseles o Debleske chatchedo, ninna ko thulepen kol viechendar, hoi chan le khetne glan o baro Debleste.
8 Ap ko tsiro his kol bare diwessa, kai djiwenn i Israelitarja an patjengre khera. Un o Salomo khetne kol tsele Israelentsa rikran kol efta bare diwessa. His bud menshe kote khetne dran o tselo them, fun Lebo-Hamat bis pash koi tala mank Israel un Egiptia. 9 Efta diwessa his le khetne, te denn le jaake koi sasterni chatchepaskri an o baro Debleskro wast. Un koi pal wan kol efta diwessa, kai djiwan le an patjengre khera. Ap o ochtato diwes wan le lauter khetne glan o baro Debleste. 10 Un ap o 23. (biish-te-triinto) diwes an o eftato tchon mukas o Salomo i menshen khere te djal. Un jon djan bachteles khere. Lengro dji giwas pral ko tselo latchepen, hoi kras o baro Dewel ap o Davideste, un ap o Salomeste, un ap peskre menshende Israel.
11 Un jaake kras o Salomo o baro Debleskro kheer, un ninna peskro kheer. Un leske djas halauter mishto, hoi job kamas te krell ap kal dui khera.
O baro Dewel rakrell o Salomeha
12 Un o baro Dewel mukas pes o Salomestar an i rati te dikell, un penas leske: Me shunom, har man an-mangal, un rodom kau kheer mange win, te wenn mange kate kowa chatchedo, hoi tumer mange anenn. 13 Shun, te bitchrau i tsiro, kai dell kek brishin, kai chan i stepangre o tselo senlepen ap o them pre, oder kai bitchrau i djungelo nasslepen ap mire menshende, 14 un mire menshe, kai miro labeha kharedo wenn, dikenn palle dren, hoi le kran, un mangenn man, un rodenn man un djan pengre tchilatche dromma tele, palle shunau an o bolepen lengri gole, un lau lengri doosh krik un krau lengro them sasto. 15 Mire jaka rikrau pre, un mire kanda shunenn kowa, hoi tumer mandar kate mangenna. 16 Me rodom kau kheer win, te well lo miro kheer, te wap kote an-mangedo hako tsiro. Un me dau garda koi pre. Kote krau miro dji tumenge pre an i tsele diwessa. 17 Un tu, te djiweh tu glan mande, har tiro dad, o David, glan mande djiwas, un kreh halauter jaake, har me tuke penom, un mire laba rikreh, un pal miro tchatchepen djiweh, 18 palle krau me, te well hako tsiro jek tire menshendar o baro rai pral Israel. Jaake krom tiro dadeske o Davideske win, un penom: “An tiri familja hi hako tsiro i mursh koi, kai well o rai pral Israel.” 19 Te mukenn tumer miro drom, un rikrenn tumen gar ap mire laba un miro tchatchepen, hoi me tumenge dom, un djan pash wawar debla, un mangenn len an, un witsrenn tumen glan lende tele ap i phub, 20 palle tradau me i Israelitarjen win dran lengro them, hoi me len dom. Un kau kheer, hoi mange win rodom, te wap kote an-mangedo, kolestar kamau tchi buder te djinell. Un i menshe an i tsele wawar themma rakrenn un sanenn pral leste. 21 Un hakeno kai djal kate, un dikell, hoi pral atchas kau kherestar, hoi kanna jaake baro un railo hi, koleske atchell o rakepen krik i trashatar, un job penell: “Hoske kras o baro Dewel sawo koowa kau themeha un kau khereha?” 22 Palle well lenge penlo: “Jon mukan o baro Debles, ko Debles lengre phurendar, koles kai len dran o them Egiptia win anas. Jon rikran pen ap i wawar debla. Glan lende djan le ap pengre tchanga un mangan len an. Doleske anas job kai tseli bibacht pral lende.”