8
Kolla hi i forja, hoi o Salomo kras
1 Biish bersha budran o Salomeskre budepangre ap o baro Debleskro kheer un ap o baro rajeskro kheer. 2 Ninna kran le kol forja sorleder, hoi o Hiram o Salomeske das. Un o Salomo mukas i Israelitarjen koi dren te djiwell.
3 Un o Salomo djas peskre lurdentsa pash o foro Hamat-Zoba un las les dren. 4 Un job kras ko foro Tadmor sorleder an o mulo them, un kol wawar forja, hoi his tchiddo pash o foro Hamat, un an kolende job djobengre khera pre tchiwas. 5 Un o Salomeskre budepangre kran o pralstuno foro Bet-Horon un o telstuno foro Bet-Horon sorleder, te wan le sorele forja, kolen massurja, wudja un pandepangre hi. 6 Ninna o foro Bahalat kras lo newes, un i tsele forja, kai leskre djobengre khera hi, un i forja, kai leskre wurdja un leskre graja tarde hi, un lauter, hoi job kamas te krell an o foro Jerusalem, ninna an o them Libanon, un an o tselo them, koleskro rai job his.
7-8 I tsele menshe, kai pral atchan kolendar, kai glan i Israelitarja an o them djiwan, un kolen i Israelitarja maran gar, kolengre tchawe, kai pal lende wan, kolen las o Salomo, te wenn le leskre budepangre, kai hunte budrenn leske. Kowa hi ninna kau diwes jaake. Jon his Amorarja, Hetarja, Perisarja, Hiwarja, un Jebusarja.
9 I menshendar Israel las lo kekes, kai hunte was leskro budepaskro. Jon wan leskre lurde, un pralstune pral i lurdende, un kurepangre ap leskre wurdja, un pralstune pral leskre wurdja un leskre graja. 10 550 (pantch-sheel-te-paash-sheel) pralstune his tardo pral o Salomeskre budepangre, un dan garda ap lende.
11 Un o Salomo anas peskri romjat, koi tchai o Faraestar, dran o Davideskro foro pral an ko kheer, hoi job mukas lake te krell. Un job penas: “I djuwel hunte djiwell gar an o kheer o Davidestar, ko rajestar pral Israel. Glan i tsiro his kote ko mochton tardo, kai o baro Debleskre laba dren hi. Haki platsa, kai ko mochton tardo his, hi i Debleskri platsa.”
12 Kau tsireha anas o Salomo viechen o baro Debleske, kai wan chatchedo ap koi chatchepaskri, hoi kran leskre budepangre glan o baro Debleskro kheer. 13 Un kowa was jaake kerdo har tchinlo his an o Moseskre lila. Kote dren hi tardo, hoi hunte well hako diwes chatchedo, ninna ap i Debleskre diwessa, un ap kol diwessa, kai well o newo tchon diklo, un ap kol bare diwessa, kai halauter khetne wenn, triin kope an o bersh: Kolla hi kol diwessa, kai chan le maro, kai kek shutlo jarro dren hi, ninna kol diwessa, kai well o newo djob anlo, un kol diwessa, kai djiwenn i Israelitarja an patjengre khera. 14 Un jaake har peskro dad, o David penas, tchiwas o Salomo i rashajen jaake khetne, har hunte budrenn le khetne. Ninna penas lo ap i Levitarja, hawi budi jon hunte krenn: Koi his sawe mank lende, kai giwan, un wawar wan i rashajenge pash o wast, jaake har hunte his hako diwes. Ninna i wudjengre mursha wan jaake khetne anlo, har hunte denn le jak ap i wudja. Hako wudareske his sawe koi, kai dan jak ap leste. Jaake penas kowa o David, ko Debleskro mursh. 15 Un kek kras tchomone wawar har kowa, hoi o baro rai, o David, penas pral i budi i rashajendar un i Levitarendar. Un ninna was o brawlepah an o Debleskro kheer jaake kerdo har job les penas.
16 Un jaake was halauter kerdo, hoi o Salomo kamas te well kerdo, fun ko diwes, kai i telstune barra o baro Debleskro kherestar tchiddo wan, bis ap ko diwes kai o kheer koi tardo his.
17 Ap ko tsiro djas o Salomo an i forja Ezjon-Geber un Elat, hoi pash o Baro Lolo Pani tchiddo hi an o them Edom. 18 Un o Hiram bitchras leske shiffe un murshen pestar, kai haiwan mishto ap o pani te ulerell. Kolla djan khetne o Salomeskre murshentsa ap kol shiffe, un wan an o them Ofir un lan kotar sonakai pentsa, 450 (star-sheel-te-paash-sheel) zentnarja sonakai, un anan les pash o rajeste Salomo.