5
O Salomo anell o mochton o Debleskre deesh labentsa an o Debleskro kheer
1 Har o tselo Debleskro kheer kerdo was un kowa, hoi dren his, hoi mukas o rai Salomo te krell, mukas lo ko koowa te anell, hoi peskro dad, o David, o baro Debleske das. Ko rup un sonakai un ko tselo koowa tchiwas lo an o Debleskro kheer, an koi isema, kai o brawlepen his.
2 Kote mukas o baro rai Salomo i phureden dran Israel pash peste well an o foro Jerusalem: kolla, kai his i pralstune pral i deesh-te-dui bare khera o Jakobeskre deesh-te-dui tchawendar, un i pralstune pral lengre tsele familje. Khetne lentsa kamas job o baro Debleskro mochton, kai o Debleskre deesh laba dren tchiddo hi, an o Debleskro kheer te anell. Ko mochton his tchiddo an o Davideskro foro ap i berga Zion. 3 Un i tsele mursha dran Israel wan khetne pash o baro rajeste an kol bare diwessaa an o eftato tchon. 4 Un har i tsele phureder dran Israel kote khetne wan, hadan i Levitarja o mochton kol deesh labentsa o baro Deblestar pre, 5 un hidjran les an o Debleskro baro kheer. Ninna anan le o Debleskro plachteno kheer koi, un ko tselo Debleskro koowa, hoi koi dren his. Kowa kran i rashaja un i Levitarja. 6 Un o rai Salomo un i tsele Israelitarja, kai wan khetne pash leste glan ko mochton, maran un chatchran bakren un grumjen o Debleske, jaake bud, kai kek djinas, har bud kolla his.
7 Un i rashaja anan o mochton o Debleskre deesh labentsa ap peskri platsa an koi palstuni isema, hoi kharell Debleskri kutch isema. Jon tchiwan o mochton tel kol dui bolepangre figureb, kai kharenn Cherubim, tel lengre tchirklengre mussjac. 8 Kal Cherubim kran pengre mussja buchles pral koi platsa, kai o mochton tardo his, un tchakran jaake o mochton un leskre hidjepangre kashta. 9 Un i hidjepangre kashta his jaake lengsto, kai lengre palstune kotja nai diklo wan an koi glanstuni isema, hoi hi glan i palstuni isema. Fun win nai wan le gar diklo. Un kote his o mochton bis ap kau diwes. 10 Un an ko mochton his tchi dren, har kokres kol dui barra, hoi o Mose dren tchiwas pash i berga Horeb. An lende his o baro Debleskre deesh laba dren tchinlo, hoi i Israelitarja hunte rikrenn. Kowa kras lo lentsa win, har jon win wan dran o them Egiptia.
11-13 I tsele rashaja, kai kote khetne his, kran pen djudjo o Debleske, ninna te his le gar mank kolende, kai hunte budrenn ap ko diwes. Un i tsele Levitarja, kai gipangre his, – kolla his o Asaf, o Heman un o Jedutun un lenge tchawe un phrala – his an latche laintikre kotja rido, un his tarde pash o Debleskri chatchepaskri ap koi rig, kai o kham pre djal. Len his bashepangre pash pende, hoi kharenn zimbale, harfe un laute. Un lentsa his 120 (jek-sheel-te-biish) rashaja koi tardo, kai bashran ap i phurdepangre. Un jon bashran un giwan jaake khetne, har te wans le jek mursh, un hadan un sharan o baro Debles. Khetne ko bashepah ap i zimbale, phurdepangre un dorjengre bashepangre giwan le kai gili:
“Job hi kamlo un leskro latchepen hi an hako tsiro menge koi.”