4
Kau koowa his an o Debleskro baro kheer dren
o Debleskri chatchepaskri dran lolo saster
1 Un job kras i Debleskri chatchepaskria dran lolo saster. Koja his deesh metarja lengsto un buchlo un pantch metarja fun tel bis pral.
o baro thopaskro tcharo dran lolo saster
2 Un job kras i baro rundo thopaskro tcharo dran lolo saster. Kowa his pantch metarja lengsto fun jek rig ap i wawar, un dui-te-paash metarja fun tel bis pral. Un i dori, hoi 15 metarja lengsto hi, djals trul leste trujel. 3 Un pral trul ko thopaskro tcharo his figure har grumja, deesh figure ap i paash metari. Kolla djan dui kope trul o tcharo, un his khetne ko tchareha dran lolo saster an jek kotar kerdo. 4 Tardo his ko thopaskro tcharo ap deesh-te-dui grumja dran lolo saster. Kolendar dikan triin ap i serwi rig, triin ap i palstuni rig, triin ap i tchatchi rig un triin ap i glanstuni rig. Lengre palstune herja his mashkral dren. 5 Ko lolo saster fun ko thopaskro tcharo his jaake pesso har i wast. Un leskro muib his har o mui i khorestar. Kowa dikas win har i lilja, te djal li pre. An ko thopaskro tcharo djan 60.000 litarja dren.
o panjeskre pirja dran lolo saster
6 Un job kras deesh bare panjeskre pirja. Un pantch kolendar tchiwas lo ap i tchatchi rig un pantch kolendar ap i serwi rig, te nai thowenn le kol kotja mass, hoi o Debleske chatchedo wenn. O baro thopaskro tcharo mukas lo koi te tchiwell, te nai thowenn pen i rashaja koi dren.
sonakaskro koowa an o Debleskro kheer
7 Un job kras deesh sonakangre momelengre jaake, har leske penlo was, un tchiwas len an o Debleskro baro kheer, pantch ap i tchatchi rig un pantch ap i serwi rig. 8 Un job kras deesh chapangre un tchiwas len ninna an o kheer, pantch ap i tchatchi rig un pantch ap i serwi rig. Un job kras sheel sonakangre tchare.
Wawar koowa dran lolo saster
9 Un job kras i glanstuni platsa i rashajenge, ninna i bari glanstuni platsa un wudja glan i glanstuni platsa, un mukas kol wudja lolo sasteha pral te tserdell. 10 Un o baro thopaskro tcharo tchiwas lo ap i tchatchi rig glan o kheer, kote kai o kham pre djala.
11 Un o Huram kras ninna pirja, bare roja, un tchare. Un jaake kras lo halauter, hoi o rai Salomo lestar kamas, te krell lo o Debleskro khereske. 12 Kau koowa his:
kol dui turme un lengre sherja;
kol dui shukar pandepen dran shelle, hoi ap i sherja his;
13 kol star sheel phabja, hoi wan pandlo ap o pandepen, te tchakrenn le i sherja ap i turme: ap jek pandepen his dui reihe phabja, jek sheel phabja an haki reiha;
14 panjeskre wurdja un kol bare pirja koi pre;
15 o baro panjeskro tcharo un i deesh-te-dui grumja koi tel;
16 Kol tsele kotja, hoi kras o Huram-Abi o baro Debleskro khereske, jaake har o baro rai Salomo leske penas, kolla his halauter dran shukar kerdo lolo saster. 17 O baro rai mukas ko lolo saster tato te krell, un an phubjengre forme te tchorell an o telstuno them pash o pani Jordan mank kol forja Sukkot un Zereda. 18 Un o Salomo mukas jaake bud kotja dran lolo saster te krell, te nai penas kek, har pharo kowa lauter his.
Wawar koowa dran sonakai
19 Ninna mukas o Salomo ko tselo koowa te krell, hoi hunte well tardo an o Debleskro kheer:
o sonakaskro bob;
i chapangre, kai o Debleskre mare pre tchiddo wenn;
20 i momelengre un lengre momlia, hoi tardo wenn glan o Debleskri kutch isema, jaake har glan-tchinlo hi – kolla his dran djudjo sonakai;
21 i sonakangre blume ap kol momelengre; i momlia; i tchinepangre, kolentsa i dorja an i momlia tele tchinlo wenna; kowa lauter his dran sonakai.
22 i tchurja, tchare o rateske, roja un pirja, – kolla lauter his dran djudjo sonakai;
kol wudja glan o Debleskri kutch isema un glan o Debleskro kheer. Kalla his kerdo dran sonakai.