26
I wudjengre mursha
1 Kolla hi i mursha, kai dan garda ap i wudja.
Dran o kheer Korach was o Meshelemja, leskro dad his o Kore, leskro papo o Abiasaf.
2 O Meshelemja, les his tchawe: o phureder his o Secharja, o duito o Jedjael, o triinto o Sebadja, o starto o Jatnijel,
3 o pantchto o Elam, o shobto o Johanan, o eftato o Eljoenai.
4-5 O Obed-Edom: O Dewel his leske latches un das les bud tchawe: o phureder his o Semachja, o duito o Josabad, o triinto o Joach, o starto o Sachar, o pantchto o Netanel,
o shobto o Ammijel, o eftato o Issachar, o ochtato o Pehulletai;
6 Un leskro tchaweske, o Semachja, wan ninna tchawe boldo. Jon his an-dikle mursha, un wan pralstune pral pengre menshende.
7 Jon his o Otni, o Refael, o Obed un o Elsabad un leskre phrala, o Elihu un o Semachja. Kolla his an-dikle mursha.
8 Kalla lauter his i mursha, kai wan pal o Obed-Edom. Jon pengre tchawentsa un phralentsa his an-dikle mursha, kai haiwan mishto pengri budi te krell. Khetne his le 62 (shob-deesh-te-dui) mursha.
9 I mursh tchawe un phrala o murshestar Meshelemja his 18 (deesh-te-ochta).
10-11 Dran i familja Merari was o Hosa. Koles his star tchawe: o ersto his o Shimri, o duito o Hilkija, o triinto o Tebalja, o starto o Secharja. O phureder his buder gar koi. Doleske kras o Hosa, te well peskro tchawo Shimri o pralstuno. I tsele mursh tchawe un phrala o murshestar Hosa his 13 (deesh-te-triin).
12 Kal mursha dan garda ap i wudja glan o Debleskro kheer. Hako kopo budras jek pralstuno kol murshentsa dran peskri familja khetne. Jaake har lengre phrala, i wawar Levitarja, kran le pengri budi ap o baro Debleskro kheer.
13 Un jon witsran barra, te dikenn le, hawi familja dell garda ap hawo wudar. Kowa kran le i tikne har i bare familjentsa.
14 O wudar, hoi ap i glanstuni rig hi, koleske peran i barra ap o Meshelemja. O wudar, hoi ap i serwi rig hi, koleske peran i barra ap leskro tchawo, o Secharja. Kowa his i gosewo mursh, kai djinas, hoi te krell.
15 O Obed-Edom hunte das garda ap o wudar, hoi ap i tchatchi rig his, un leskre tchawe ap o djobeskro kheer.
16 O Shuppim un o Hosa hunte dan garda ap o wudar hoi ap i palstuni rig hi, ninna ap o wudar, hoi kharell Shallechet, kai o drom pre djal.
Jaake hunte denn i mursha garda:
17 Ap i glanstuni rig hunte wenn shob mursha tardo hako diwes, ap i serwi rig star mursha, ap i tchatchi rig star mursha, pash o djobeskro kheer dui mursha,
18 ap i palstuni rig, star pash o drom un dui pash koi platsa, hoi kharell ‘Parbar’. 19 Jaake hi glan tchinlo, har i wudjengre mursha hunte jak denn. Jon lauter wan dran i familje Korach un Merari.
I Levitarja, kai dan jak ap o Debleskro brawlepen
20 Wawar Levitarja dan jak ap o brawlepen an o Debleskro kheer un ko kutch koowa, hoi i menshe o Debleske dan. 21 Mank lende his i tchawe o murshestar Ladan dran o kheer Gershon. Jon his i pralstune mank pengre menshende. Mank lende his o Jehijel. 22 Leskre tchawe, o Setam un o Joel, dan jak ap o brawlepen an o baro Debleskro kheer. 23 Wawar mursha, kai dan garda ap o Debleskro brawlepen, his dran i familje Amram, Jizhar, Hebron un Usijel. 24 O Shubael, koleskro dad o Gershon his, un koleskro dad o Mose his, kowa his o pralstuno pral o brawlepen.
25 Leskro phraal, o Elijeser, les his i tchawo: o Rechabja; koleskro tchawo his o Jesaja, koleskro tchawo his o Joram, koleskro tchawo his o Sichri, koleskro tchawo his o Shelomit. 26 Kau mursh Shelomit un leskre phrala his i pralstune pral o kutch koowa, hoi o Debleske dino was. Kau koowa anan o baro rai David un i pralstune pral i familjende, ninna i pralstune pral i lurdende, kolla pral jek sero lurdende un kolla pral jek shelende un wawar bare lurde. 27 Dran kowa, hoi anan le pentsa khere dran o kurepen, dan le les, te well o baro Debleskro kheer kerdo. 28 O Shelomit un leskre phrala his i pralstune pral halauter, hoi o Debleske dino was, ninna pral kowa, hoi glan ko tsiro o dikepaskro o Samuel o Debleske anas, un o Saul, koleskro dad o Kish his, un o Abner, koleskro dad o Ner his, un o Joab, koleskri dai i Zeruja his.
Pralstune un tchatchepangre mursha
29 Dran o kheer Jizhar lan le o Kenanja un leskre mursh tchawe, te wenn jon pralstune un tchatchepangre mursha an Israel. 30 Dran o kheer Hebron, lan le o Hashabja un leskre phrala, te denn jon jak, te well halauter mishto kerdo, hoi o baro Debleske un o baro rajeske kerdo well an o them ap i wawar rig o panjestar Jordan. Jon khetne his 1.700 an-dikle mursha. 31 O pralstuno pral o kheer Hebron peskre tsele familjentsa his o Jerija. Har his o David an o star-deshto bersh o baro rai, rodan le an-dikle mursha mank lende un hatsan len an o foro Jaser an o them Gilead. 32 O Jeria, les his 2.700 an-dikle mursha mank peskre menshende. Kolla his pralstune pengre familjendar. Un o David tchiwas len un lengro pralstuno, o Jerija, pral i familjende Ruben un Gad un pral i paash familja Manasse, te denn le jak, kai kolla pengri budi o baro Debleske un o baro rajeske mishto krenn.