O duito Familjakro liil
(2. Chronik)
1
O Salomo mangell goswepen o baro Deblestar
1 Un o Davideskro tchawo, o Salomo, was i sorelo rai. Un o baro Dewel, kai leskro Dewel his, his leha, un kras les baro un bareder.
2 I diwes was, kai mukas o Salomo i tsele pralstune Israelitarjen pash peste te kharell: i pralstune pral jek sero lurdende, i pralstune pral jek sheel lurdende, i tchatchepangre mursha, i pralstune pral kol deesh-te-dui bare khera, kai wenna o Jakobeskre deesh-te-dui tchawendar, un i pralstune pral bare familje. 3 Khetne lentsa djas o Salomo ap i mangepaskri platsa pash o foro Gibeon. Kote his o Debleskro plachteno kheer tardo. Ko kheer mukas o Mose, koles o baro Debleskro wast his, an o mulo tato them te krell.
4 [Ko mochton, kai o Debleskre deesh laba dren hi, mukas o David i tsiro glan kowa dran o foro Kirjat-Jearim te lell, un anas les an o foro Jerusalem, un mukas ko mochton kote an i plachteno kheer te tchiwell, hoi mukas job koleske te krell.]
5 Glan o baro Debleskro plachteno kheer an o foro Gibeon his ninna koi chatchepaskri dran lolo saster tardo, hoi o Bezalel kras, koleskro dad o Uri his, un koleskro dad o Hur his. Kote djas o Salomo, un khetne leha i Israelitarja.
6 Un o Salomo chatchras jek sero viechen o baro Debleske ap i chatchepaskri dran lolo saster, hoi glan o Debleskro plachteno kheer tardo his.
7 An koi rati mukas pes o Dewel o Salomeske te dikell, un penas leske: “Tu nai putcheh man, hoi kameh mandar!”
8 Kote penas o Salomo ap o Debleste: “Baro latchepen kral tu miro dadeske, o Davideske, un kral, te wom me baro rai pal leste. 9 Baro Dewel, miro rai, muk tiro lab tchatches te well, hoi tu penal miro dadeske, o Davideske; tu tchiwal man dren, te wom rai pral kal menshende, kai jaake bud hi, har i stauba ap kai phub hi. 10 De man kanna goswepen, te djinap har te djap lentsa trujel! Har nai dap hakeneste tire bud menshendar peskro tchatchepen, tu te deh man kowa gar?”
11 Un o Dewel penas ap o Salomo: “Tu nai mangals mandar brawlepen, kutch koowa, an-dikepen, i lengsto djipen un o merepen kolendar, kai kurenn pen tuha. Kowa kral gar. Tut hi an tiro dji, te mangal mandar goswepen, te djiness, har te nai rakress o tchatchepen win pral mire menshende, pral kolende me tut o rai krom. 12 Doleske dau tut goswepen, te djiness, hoi te kress. Koi pashel dau tut brawlepen, kutch koowa un an-dikepen, har kek baro rajes glan tute his, un kek baro rajes pal tute well.”
13 Un o Salomo mukas koi mangepaskri platsa, hoi pash o foro Gibeon tchiddo hi, un kai o Debleskro plachteno kheer tardo hi, un djas an o foro Jerusalem. Kote djiwas lo, har his lo o baro rai pral Israel.
O Salomeskro brawlepen
14 Un o Salomo mukas peskre tsele wurdja un klissepangre khetne te well. Un kote his les 1.400 (jek sero-te-star-sheel) wurdja un 12.000 (deesh-te-dui serja) klissepangre. Kolen mukas lo an kol wurdjengre forja un pash peste an o foro Jerusalem te anell.
15 Un o baro rai kras, te his an o foro Jerusalem jaake bud rup un sonakai har barra. Un i zedertikre ruka his jaake bud har i diwje faigetikre ruka an o telstuno them. 16 Un o Salomo ginas graja an Egiptia un an Cilicia, leskre parepangre ginan len un plaissran len kote. 17 Un jon anan wurdja dran o them Egiptia, jekeske plaissran le 600 (shob-sheel) rupene beme. Un jek grajeske plaissran le 150 (sheel-te-paash) rupene beme. Un palle bikran le lendar dureder ap i bare rajende pral i Hetarja un ap i bare rajende pral o them Syria.
18 Un o Salomo penas peske, te kamell lo i kheer te krell o baro Debleske, te well job kote an-mangedo. Ninna kamas lo peske, o baro rajeske, i kheer te krell.