2
O Salomo kamell o baro Debleske i kheer te krell
1 Un o Salomo mukas 70.000 (efta-deesh-serja) murshen win te rodell, te wenn le hidjepangre, un 80.000 (ochta-deesh-serja), te phagenn le i barra win an i berge. Pral lende his 3.600 (triin-serja-te-shob-sheel) mursha tardo. 2 Un o Salomo bitchras murshen pash o rajeste pral o foro Tirus, – leskro lab his Hiram – un mukas leske te penell: Ab mange ap i rig har wal tu miro dadeske, o Davideske, ap i rig, un bitchral leske zedertikro kasht, har kamas lo peske i kheer te krell. 3 Dik, kanna kamau me i kheer miro baro Debleske te krell, – i kheer, hoi leske hi, kai nai mangah les an, un nai chatchrah latcho sungepaskro koowa glan leste, un tchiwah hako tsiro maro glan leste win, un chatchrah viechen leske taissarlake un rati, ninna ap o Debleskro diwes, un ap ko diwes, kai o newo tchon diklo well, un ap wawar bare diwessa, te sharas maro baro Debles. Job penas menge, te kras mer kowa hako tsiro. 4 Un ko kheer, hoi me kamau te krell, hunte well baro; maro Dewel hi bareder har hako wawar dewel.
5 Koon nai krell leske i kheer? O tselo bolepen hi gar bares doha leske. Koon palle hom me, te krap leske i kheer? Halauter hoi nai krau, hi, te krap i platsa, kai nai chatchrah sungepaskro koowa glan leste. 6 Doleske mangau tut, bitche mange i murshes i latcho wasteha, kai haiwell shukar koowa te krell dran o sonakai, rup, lolo saster un wawar saster, lole thaba, blauete thaba un thaba, hoi hi lolo har jag. Ninna hunte haiwell lo te dell shukar koowa win tchurje dran kasht un wawar koowa. Kowa te krell lo khetne kol murshentsa, kai haiwenn pen mishto ap koi budi, un kai pash mande hi an o them Juda un an o foro Jerusalem, kolen miro dad, o David, mange das, te krenn le koi budi.
7 Un bitche mange zedertikro kasht un zipresstikro kasht un wawar kutch kasht dran i berge Libanon! Me djinau, kai tire mursha haiwenn pen win, te denn le i ruka. Un me bitchrau mire murshen pash tire murshende, te nai budrenn le lentsa khetne. 8 Kote hunte well mange bud kasht kerdo. Ko kheer, hoi me kamau te krell, hunte well baro un jaake shukar, te krenn i menshe bare jaka. 9 Un shun, tire murshen, kai denn kol ruka tele, dau me, 20.000 (biish-serja) gone giba, un 20.000 gone djobb, 20.000 bare khore mool un 20.000 bare khore djet.
O Hiram bitchrell i liil ap o Salomeste
10 O Hiram, ko rai pral o foro Tirus, bitchras i liil ap o Salomeste. Kote dren his tardo: O baro Dewel kamell peskre menshen. Doleske tchiwas lo tut pral lende, te wess lengro rai. 11 Sharedo well o baro Dewel, kai o Israeleskro Dewel hi, kowa kai kras o bolepen un i phub! Job das o baro rajeske, o Davideske, i gosewo tchawes, kai haiwell bud, un djinell, hoi te krell. Kowa kamell o baro Debleske i kheer te krell, ninna i kheer peske, ko baro rajeske. 12 Kanna bitchrau tuke i murshes, koles i latcho wast hi, un peskri budi mishto haiwell. Leskro lab hi Huram-Abi. 13 Leskri dai hi i menshendar Dan. Un leskro dad his dran o foro Tirus. Kowa haiwell shukar koowa te krell dran sonakai, rup, lolo saster un wawar saster, barra, kasht, lole un blauete thaba, ninna thaba, hoi hi lolo har jag, un latcho laintikro than. Ninna nai dell lo shukar koowa win tchurje dran kasht un wawar koowa. Job nai krell halauter, hoi tu lestar mangeh, un budrell khetne tire murshentsa, kai haiwenn pen mishto ap koi budi, un ninna kolentsa, kai budran tiro dadeske, o baro rajeske David, ap koleste me pre dikau.
14 Miro rai, bitche menge kanna kowa, hoi tu penal: gib, djob, djet un mool. 15 Mer kate dah ruka tele ap o Libanon, jaake bud har tu kameh, un pandah len khetne un anah len tuke ap o baro pani an o foro Jaffa. Fun kotar nai mukeh len tu pral te anell an o foro Jerusalem.
I budepangre dran o wawar themma
16 Un o Salomo mukas win te hatsell, kitse wi-themarja an o them Israel hi. Glan i tsiro kras leskro dad, o David, kowa ninna. Kanna wan 153.600 (jek-sheel-pantch-deesh-te-triin-serja shob-sheel) mursha hatslo. 17 Un job las lendar 70.000 (efta-deesh-serja) mursha, un kras lendar hidjepangre, un 80.000 (ochta-deesh-serja) mursha, te denn le barra dran i berge win. Un 3.600 (triin-serja-shob-sheel) mursha tchiwas lo pral lende, te budrenn le mishto.