25
I gipangre un bashepangre
1 Un o David khetne i pralstunentsa pral i lurdende, rodas i gipangre un bashepangre win, te giwenn le Debleskre gilja, bashrenn ap dorjengre bashepangre, un denn ap sasterne patria. Kolla wan dran i khera Asaf, Heman un Jedutun.
2 I tchawe o murshestar Asaf: o Sakkur, o Josef, o Netanja, o Asarela. Lengro dad his lengro pralstuno. Koleske penas o David, te krell lo Debleskre gilja.
3 I tchawe o murshestar Jedutun: o Gedalja, o Zeri, o Jesaja, o Hashabja, o Mattitja, o Shimi. Khetne his le shob. Lengro dad his lengro pralstuno, kai bashras ap i dorjengri bashepaskri, har giwas lo Debleskre gilja, te hadell lo un sharell lo o baro Debles.
4 I tchawe o murshestar Heman: o Bukkija, o Mattanja, o Usijel, o Shubael, o Jerimot, o Hananja, o Hanani, o Eljata, o Giddalti, o Romamti-Eser, o Joshbekasha, o Malloti, o Hotir un o Mahasiot. 5 Kalla lauter his o Hemaneskre tchawe. Job his o baro rajeskro dikepaskro. O Dewel penas leske, te krell lo les an-diklo, un das les deesh-te-star mursh tchawe un triin tcha.
6 Kalla lauter giwan an o baro Debleskro kheer un bashran ap sasterne patria un dorjengre bashepangre, jaake har o baro rai penas. Lengre dada, o Asaf, o Jedutun un o Heman his i gipangre raja. 7 Khetne lengre phralentsa, kai haiwan ninna mishto te giwell o baro Debleske, his le 288 (dui-sheel-ochta-desh-te-ochta) mursha – lauter latche gipangre.
8 Un jon witsran barra, te hatsenn le win, koon pal koneste o gipaske un bashepaske an o Debleskro kheer hunte djal.
9-31 Hako mursh, ap koleste i barra sikran, hunte budrell khetne peskre tchawentsa un phralentsa. Hako kopo his deesh-te-dui mursha khetne.
O ersto bar sikras ap o Josef dran o kheer Asaf,
o duito ap o Gedalja,
o triinto ap o Sakkur,
o starto ap o Zeri
o pantchto ap o Netanja
o shobto ap o Bukkija;
o eftato ap o Asarela;
o ochtato ap o Jesaja;
o enjato ap o Mattanja;
o deshto ap o Shimi;
o 11. ap o Asarel;
o 12. ap o Hashabja;
o 13. ap o Shubael;
o 14. ap o Mattitja;
o 15. ap o Jeremot;
o 16. ap o Hananja;
o 17. ap o Joshbekasha;
o 18. ap o Hanani;
o 19. ap o Malloti;
o 20. ap o Eljata;
o 21. ap o Hotir;
o 22. ap o Giddalti;
o 23. ap o Mahasiot;
o 24. ap o Romamti-Eser.