17
Dran o Davideskro kheer well o baro rai
1 Har kanna o David an peskro kheer djiwas, penas lo ap o Debleskro rakepaskro, o Natan: “Me djiwau an i kheer dran zedertikro kasht, un o mochton, kai i deesh laba o baro Deblestar dren hi, hi tardo an i plachteno kheer. Hi kowa mishto?”
2 Penas o Natan ap leste: “Dja koi un kre lauter, hoi tut ap o dji hi! O baro Dewel hi pash tute!”
3 Un an koi rati penas o baro Dewel ap o Nataneste: 4 Dja koi un pen ap miro budepaskro, o David: Jaake penell o baro Dewel: “Tu hal kowa gar, kai krell mange i kheer, te djiwap koi. 5 Me djiwom an kek kheer, fun ko diwes, kai me kol Israelitarjen win anom dran o them Egiptia bis kai diwes. Man his tchi har i plachteno kheer, har djom lentsa fun jek platsa ap i wawar. 6 An ko tselo tsiro penom me kekeske, kai das garda ap mire menshende Israel: ‘Hoske kreh tu mange kek kheer dran zedertikro kasht?’”
7 Doleske hunte peness tu ap miro budepaskro, o David: Jaake penell o baro Dewel, kai hi o rai pral o bolepen un i phub: “Me lom tut i bakrendar krik, kai tu pre garda dal, te wess tu rai pral mire menshende Israel. 8 Me homs pash tute, kai tu ninna djal, un marom kolen lauteren glan tute, kai kuran pen tuha. Me krom tiro lab bares, jaake prindjedo har i laba kol bare rajendar ap i phub.
9 Un me kamau mire menshen Israel i them te dell, kai nai atchenn jon. Un koi djiwenn le, kai trashenn jon buder gar, un kai wenn jon gar buder tele rikedo kol tchilatche menshendar, har an ko tsiro, 10 kai rodom me tchatchepangre raja mire menshenge win. Un me krau kolen tiknes glan tute, kai kurenn pen tuha. Me mukau tuke kanna te penell: Tu kreh mange kek kheer. Me krau tuke i kheer. 11 Te hi tiro tsiro trujel, un tu mereh, hadau jekes tire tchawendar, kai pal tute wenna, te well lo baro rai, un atchell kowa. 12 Kowa krell mange i kheer. Un me krau, te atchell lo hako tsiro baro rai. 13 Me kamau leskro dad te well. Un job well miro tchawo. Miro latchepen lau gar lestar krik, har me miro latchepen kolestar krik lom, kai glan tute o baro rai his. 14 Me tchiwau les pral mire menshende, te atchell lo baro rai pral lende hako tsireske. Un tiro rajengri beshepaskri atchell hako tsiro.”
O David parkrell pes pash o baro Debleste
15 Har o Natan kol tsele laba, hoi o Dewel leske sikras, o Davideske penas, 16 djas o baro rai David an o Debleskro plachteno kheer, witsras pes tele glan o baro Debleste un penas:
“Baro Dewel, miro rai, koon hom me, un hoi hi miro kheer, kai tu kral jaake bud mange? 17 Un kanna hi kowa tuke gar doha, miro Dewel. Tu penal mange, hoi mire tchawende kameh te dell an ko tsiro, hoi dur glan mende hi. Un tu dikal ap mande har ap i baro mensheste, miro baro Dewel. 18 Tu kral man, tiro budepaskres, jaake railo! – Hoi nai rakrau me gomme budeder? Tu djineh, hoi an miro dji hi. 19 Baro Dewel, mange kral tu kau tselo baro koowa. Kowa his jaake an tiro dji, te sikress tiro tselo railepen.
20 Baro Dewel, kek hi jaake har tu! Un dell kek dewel har tu, pal lauter, hoi mer mare kandentsa shunam. 21 Un kai hi menshe ap i phub har tire menshe Israel? Kolenge djal tu koi, te less len dran o pandepen win. Ko baro un sorelo koowa, hoi tu lenge kral, kras, te wal prindjedo ap i phub. Tu tradal wawar menshen win glan tire menshende, kai tu win lal dran Egiptia. 22 Tu rodal tuke kol menshen Israel win, te wenn jon tire menshe hako tsireske. Un tu, baro Dewel, wal lengro Dewel.
23 Un kanna, baro Dewel, muk ko lab tchatcho te well hako tsireske, hoi tu pral mande un pral miro kheer penal. Un kre jaake, har tu penal, 24 te djinenn i menshe, kai kowa, hoi tu penal, ninna jaake well, un tiro lab sharedo well an hake tsirja, un i menshe penenna: ‘O baro Dewel, ko rai pral o bolepen un i phub, koles i Israelitarja an-mangenn, job hi o Israeleskro Dewel.’ Un o kheer David, kai tiro budepaskro hi, atchell tardo glan tute. 25 Tu, miro Dewel, sikral man, hoi kameh te krell – un penal mange: ‘Me krau tuke i kheer.’ Doleske lom man khetne un rakrom tuha. 26 Baro Dewel, tu hal o tchatcho Dewel, un dal man tiro lab, te dess kau latcho koowa mande, tiro budepaskro. 27 Kanna tchip tiri bacht pral mande un mire menshende, te atchenn le glan tute hako tsiro. Ap koneste tu tiri bacht tchiwal, ap koleste atchell tiri bacht tchiddo hako tsireske.”