16
1 Har jon o Debleskro mochton dren anan, tchiwan jon les an ko plachteno kheer, hoi o David leske pre tchiwas, un chatchran viechen o baro Debleske, un maran wawar viechen, te chan le len khetne glan o Debleste. 2 Un pal kowa rakras o David pral i menshende i bacht o baro Deblestar win. 3 Un job das hako menshes, kai kote hi, murshen un djuwjen, hakenes, jek maro, jek kotar mass un jek drakengri merkli.
4 Un job rodas gipangre win dran i Levitarja, te hi le tardo glan o baro Debleskro mochton, te sharenn le o baro Debles un parkrenn pen pash leste pengre giljentsa. 5 Kolla his: o Asaf, lengro pralstuno; o Secharja his o duito; pal leste o Jasijel, o Semiramot, o Jehijel, o Mattitja, o Eliab, o Benaja, o Obed-Edom un o Jehijel. Jon te giwenn un bashrenn ap pengre dorjengre bashepangre. Un o Asaf te dell ap i sasterne patriaa. 6 I rashaja, o Benaja un o Jahasijel, lengri budi his, te phurdenn le ap pengre phurdepangre hako tsiro glan o mochton o Debleskre deesh labentsa.
O Davideskri gili
7 Ap ko diwes mukas o David o ersto kopo o Asafes un leskre phralen kai gili te giwell, te parkrenn le pen pash o baro Debleste.
8 Parkrenn tumen pash o baro Debleste,
un hadenn leskro lab!
Penenn i menshenge an wawar themma kowa, hoi job kras!
9 Giwenn un bashrenn leske! Rakrenn pral ko tselo baro koowa, hoi job lauter kras!
10 Sharenn koles, koon kokres o tchatcho Dewel hi!
Awenn bachteles pral leste, tumer, kai rodenn o baro Debles!
11 Putchenn pal o baro Debleste, un pal leskri soor!
Awenn glan leste hako tsiro!
12-13 Tumer, kai wenn pal o Israel, o Debleskro budepaskro,
tumer tchawe o Jakobestar, koles job win rodas,
ma bistrenn, hoi job lauter kras an peskri bari soor,
kowa, hoi kek wawar nai kras!
Ma bistrenn, har job o tchatchepen pral i menshende win rakras!
14 O baro Dewel hi maro Dewel,
un o tchatchepaskro rai pral i tseli phub.
15 Ma bistrenn, hoi job mentsa win kras!
Leskro lab, hoi das lo, atchella jaake rah har menshe ap i phub djiwenna.
16 Kowa hi ko lab, hoi das lo o Abrahameste,
koi sowel, hoi das lo o Isaakeste,
17 un pal leste o Jakobeste,
un das peskro wast pre, te atchell kau lab i Israelenge hako tsireske.
18 Job penas: “Tuke dau kau them Kanaan,
kowa hi ko them hoi tumenge well.”
19 An ko tsiro his le gar bud,
gar budeder har i wast pherdo,
un his wi-themarja an o them.
20 Un jon djan jek themestar an o wawar,
djan trujel an bud rajengre themma.
21 Un o Dewel das jak, te taprell len kek an.
Un i bare rajen pral kol themma das lo trad un penas lenge:
22 “Lenn i wasta krik mire menshenge, kolen mange win rodom!
Ma krenn tchilatchepen kolenge, kai mire rakepangreb hi!”
23 Giwenn leske, o baro Debleske,
tumer menshe an i tsele themma!
Penenn i menshenge, te hi job kowa, kai lell win dran o tchilatchepen.
24 Penenn kolenge, kai les gar prindjrenna, hawo railepen les hi.
Penenn i menshenge an hake themma hawo baro koowa job kras.
25 O baro Dewel hi o pralstuno,
un hakeno hunte sharell les.
Mank i tsele wawar debla hi job kowa, konestar daras mer.
26 I debla i wawar menshendar hi chochene debla.
O baro Dewel hi kowa, kai o bolepen kras.
27 Job hi bareder har hako wawar.
Shukapen hi trul leste,
Leskri soor un leskri bacht hi an leskro kheer.
28 Tumer dran i wawar themma, sharenn o baro Debles!
Sharenn leskro railepen un leskri soor!
29 Krenn leskro lab bares jaake har job moldo hi!
Awenn glan leste, un anenn leske shukar koowa!
Mangenn o baro Debles an ap ko diwes, kai well lo an shukar un kutch ripja.
30 I tseli phub hunte trissell glan leste.
Job kras i phub, te well li soreles tardo.
31 O bolepen well bachtelo,
un i phub sala.
Penenn i tsele menshenge: O baro Dewel hi o baro rai.
32 O baro pani stell i bachtjatar un lauter, hoi an leste hi.
O them well bachtelo un lauter, hoi ap leste baro was.
33 I tsele ruka an o weesh giwenna i bachtjatar
glan o baro Debleste.
Job wella, un anell o tchatchepen ap i phub.
34 Sharedo well o baro Dewel!
Parkrenn tumen pash o baro Debleste!
Job hi i latcho Dewel.
Leskro latchepen atchella hako tsireske.
35 Penenn: Maro Dewel, ab ap mari rig!
tu hal kowa, kai lell men win dran o tchilatchepen.
Doleske le men win dran i wasta kol wawar menshendar!
An men pale lauter khetne,
te sharas tut un parkras men pash tute, kai kokres o tchatcho Dewel hal.
36 Sharedo well o baro Dewel, kai o Israeleskro Dewel hi,
kanna un hako tsireske!
Un i tsele menshe penan: “Amen! Sharedo well o baro Dewel!”
37 Un jaake har o David lenge penas, atchan o Asaf un leskre phrala glan o mochton o baro Debleskre deesh labentsa, te krenn le kote koi budi, hoi hako diwes hunte kerdo well.
38 Ninna o Obed-Edom, koleskro dad o Jedutun his un leskre 68 (shob-deesh-te-ochta) phrala atchan kote. O Obed-Edom un o Hosa dan garda ap i wudja.
39 I rashaja, o Zadok un leskre phrala, kran pengri budi pash o baro Debleskro plachteno kheer ap i berga pash o foro Gibeon. 40 Jon hunte anan o baro Debleske hako diwes viechen, kai leske tseles chatchedo wenn ap i sasterni chatchepaskri, taissarlakro un ratsjakro. Jaake his glan tchinlo an o Moseskre lila, kai tardo hi, hoi o baro Dewel peskre menshendar Israel kamella. 41 Ninna atchan kote wi-rodede gipangre, kai pengro labeha pre kharedo wan, te parkrenn le pen pash o baro Debleste, kai leskro latchepen an hako tsiro kai hi. Mank lende his o Heman un o Jedutun. 42 Jon sharan o Debles pengro bashepah, un bashran ap i phurdepangre un dorjengre bashepangre un wawar bashepangre. I tchawen o murshestar Jedutun das o David koi budi, te denn le garda ap i wudja. 43 Un i tsele menshe djan penge, hakeno an peskro kheer. Un ninna o David djas khere, te penell lo peskri familjake ‘latcho diwes’.