13
O David lell o mochton, kai o Debleskre deesh laba dren hi
1 Un o David beshas pes khetne kol pralstunentsa pral i sero lurdende un kolentsa pral sheel lurdende un kol wawar bare lurdentsa un rakras lentsa. 2 Palle penas lo ap i tsele Israelitarja, kai kote his: “Te hi tumenge mishto, un latcho glan maro baro Debleskre jaka, palle bitchras mer bitchepangre pash mare phralende an i tsele kotja o themestar Israel, ninna pash i rashajende un i Levitarja, kote kai jon djiwenn. Un mer mukah lenge te penell, te wenn le pash mende khetne. 3 Mer khetne kamah ko mochton, kai o Debleskre deesh laba dren hi, pale pash mende te lell. An ko tsiro, har o Saul djiwas, putcham gar pal leste.”
4 Kote penan i tsele Israelitarja, kai kote khetne his: “Kowa hi mishto. Mer krah kowa.”
5 Jaake mukas o David i tsele Israelitarjen khetne gole te dell, kotar, kai o pani Sihor hi an o them Egiptia, bis kotar, kai djal pash o foro Lebo-Hamat, te lenn le ko mochton o deesh labentsa o Deblestar dran o foro Kirjat-Jearim.
6 Un o David djas i tsele Israelentsa pral an o foro Baala. Kawa hi i wawar lab o foreske Kirjat-Jearim, un hi an o them Juda tchiddo. Kote his o mochton tardo o baro Deblestar, kai beshdo hi pral i bolepangre, kai kharenna Cherubim, un kai well job an-mangedo. 7 Un jon mukan ko mochton ap i newo wurdin dran o kheer te anell, kai o Abinadab djiwell. Un o Usa un leskro phraal djan o wurdineha un dan ap leste jak. 8 O David un i tsele menshe an Israel khelan bachteles glan o Debleste, giwan gilja, un kran bashepen ap dorjengre bashepangre, ap pauke, ap phurdepangre un wawar bashepangre.
O Usa merell
9 Har wan le pash ko djobeskri platsa o murshestar Kidon, kaman i grumja win te phagell, un o Usa rikras o mochton, te perell lo gar. 10 Kowa hunte krals lo gar. Job hunte tapras gar o Debleskro mochton an.a Koi was o baro Debleskri choli pral o Usa. Un o Dewel maras les koi. Un job meras kote glan o Debleste. 11 Koi was o David chojedo, kai o baro Dewel o Usaes jaake krik las. Doleske kharell koi platsa ‘Perez-Usa’b gomme kai diwes.
12 Un o David trashas o Deblestar ap ko diwes, un penas: “Har nai lau me o Debleskro mochton pash mande?” 13 Un job mukas les gar pash peste te anell an o Davideskro foro. Na-a, job mukas les an ko kheer te anell, kai djiwell o Obed-Edom. Kowa his i mursh dran o foro Gat.
14 Jaake atchas o baro Debleskro mochton triin tchon an koleskro kheer. Un o baro Dewel tchiwas peskri bacht un soor ap leste un ap halauter, hoi les his.