10
O Saul merell
1 I Filistarja maran pen i Israelentsa. Un i Israelitarja nashan glan lende, un bud lendar wan ap i berga Gilboa mulo dino. 2 Un i Filistarja lan o Saules palla, un dan leskre mursh tchawen, o Jonatan, o Abinadab un o Malkishua mulo.
3 Un o marepen trul o Saul was sorleder un sorleder. Un i kurepangre, kai denn i failentsa karje, hatsan les un dukran les phares.
4 Un job penas ap koleste, kai leskro kurepaskro koowa hidjrell: “Le tiro charo un de man mulo, jaake te wenn gar kalla pash mande, kai gar tchinle hi ap pengro mass, un krenn mantsa, hoi jon kamenn!”
Un ko lurdo, kai leskro kurepaskro koowa hidjrell, kamas gar. Les his bari daar. Kote las o Saul o charo, un mukas pes an leste perell. 5 Un har ko hidjepaskro lurdo dikas, te hi o Saul mulo, mukas job pes ninna an peskro charo te perell un meras. 6 Jaake meras o Saul un leskre triin tchawe, un leskro tselo kheer. 7 Har shunan kol Israelitarja, kai djiwan wergel i tala Jesreel, te nashan penge i Israelengre lurde, un kai meras o Saul un leskre tchawe, kote nashan jon dran pengre forja un nashan penge ninna. Un i Filistarja wan koi un djiwan an kol forja.
8 Un ap ko diwes pal o kurepen wan i Filistarja, te randenn le lauter kolendar, kai kote mulo tchiddo hi. Un koi pashel hatsan le o Saules un leskre tchawen mules ap koi berga Gilboa tchiddo.
9 Un jon randan les win, un lan leskro shero un leskro sasterno ripen, un bitchran murshen koleha lautereha an o tselo them Filistia trujel, te sikrenn le i menshende un lengre chochene deblen, hoi djas. 10 Un jon tchiwan leskro charo un leskro witsepaskro tchuri an o kheer pengro deblestar. Un leskro shero dan le sasterentsa ap i massuri o kherestar pengro deblestar Dagon. 11 Har shunan halauter, kai djiwenn an o foro Jabesh an o them Gilead, hoi i Filistarja o Sauleha kran, 12 kran pen i tsele tchatche mursha ap o drom, un lan o mulo Saules un leskre mule tchawen, un anan len an o foro Jabesh, un paskran len tel ko baro ruk pash o foro Jabesh, un chan tchi efta diwessa. 13 O Saul meras doleske, kai job gar kras, hoi o baro Dewel leske penas, un kai job pash koi djuwjate djas, kai i mulentsa rakras, un lat putchas. 14 O baro Debles putchas lo gar. Doleske mukas o baro Dewel les merell, un kras, te was o David baro rai, koleskro dad o Isai hi.