20
O Hiskija well nasselo
1 An kol diwessa was i merepaskro nasslepen pral o Hiskija. Un o Debleskro rakepaskro, o Jesaja, koleskro dad o Amoz his, was pash leste un penas ap leste: “Kawa penell o baro Dewel: ‘Tu weh gar sasto kau nasslepastar un hunte meress. Doleske pen tire menshenge, har te djal pal tiro merepen dureder!’”
2 O Hiskija rissras pes o mujeha ap i massuri un mangas o baro Debles un penas: 3 “Ach, baro Dewel, mangau tut, biste gar, kai djiwom glan tute an o tchatchepen un i djudjo djijeha un krom, hoi mishto hi glan tire jaka.”
Un o Hiskija rowas i baro ropen glan leste. 4 O Jesaja his gomme ap i mashkralstuni platsa, kote rakras o baro Dewel ap leste: 5 “Dja pale pale un pen ap o Hiskija, ko rajeste pral mire menshende: ‘Kawa penell o baro Dewel, ko Dewel tiro dadestar, o Davidestar: Me shunom tiro mangepen un me dikom tire swa. Dik, me kamau tut sastes te krell – an o triinto diwes nai djah tu pral an o baro Debleskro kheer. 6 Un me kamau 15 (deesh-te-pantch) bersha pre te tchiwell ap tiro djipen. Kamau tut un kau foro win te lell dran o wast o baro rajestar pral o them Assur. Un me rikrau mire wasta pral kau foro. Ko krau mange un o Davideske, kai miro budepaskro his.’”
7 Un o Jesaja penas: “Anenn mange i merkli dran faige!” Un jon anan kowa un tchiwan les ap ko dukepen, te well lo pale sasto.
Ko sikepen ap i khameskri kambana
8 Un o Hiskija penas ap o Jesaja: “Hoi hi ko sikepen, kai o baro Dewel man sastes krella, un me nai pral djau ap o triinto diwes an o baro Debleskro kheer?”
9 Un o Jesaja penas: “Kowa hi tuke ko sikepen o baro Deblestar, te djiness, kai o baro Dewel kowa rikrella, hoi lo penas: Kameh, te djal koi khameskri kambana deesh kotja glan oder deesh kotja pale?”
10 O Hiskija penas: “Hi gar jaake phares, te djal li deesh kotja glan. Kowa kamau me gar. Me kamau te djal li deesh kotja pale.”
11 Kote das o Debleskro rakepaskro, o Jesaja, ap o baro Debleste gole. Un o baro Dewel mukas koi khameskri kambana deesh kotja pale te djal. Koja his i kambana, hoi mukas o Ahas te krell.
I bitchepangre dran o them Babilonia
12 O baro rai pral o them Babilonia, o Merodach-Baladan, koleskro dad o Baladan hi, shunas, kai o Hiskija nasselo his. Un job bitchras leske i liil un kutch koowa. 13 Un o Hiskija las len kamles pre, un sikras lende peskro tselo brawlepen, rup, sonakai, sungepaskro koowa, latcho djet, un ko kheer, kai kol tsele kurepaskre koola dren hi, un leskro tselo kutch koowa. Tchi his an leskro kheer un an leskro them, hoi lo lenge gar sikras.
14 Kote was o Debleskro rakepaskro Jesaja pash o rajeste Hiskija un putchas lestar: “Hoi penan kal mursha? Un hawo themestar wan le pash tute?”
O Hiskija penas: “Jon wan dran i dur them kate pash mande, dran o them Babilonia.”
15 Un job putchas: “Hoi dikan le an tiro kheer?”
O Hiskija penas: “Jon dikan halauter, hoi an miro kheer hi. Un tchi dran miro brawlepen hi koi, hoi me len gar mukom te dikell.”
16 Koi penas o Jesaja ap o Hiskija: “Shun, hoi o baro Dewel penell: 17 Ko tsiro wella, kai halauter an o them Babilonia anlo wella, hoi an tiro kheer hi, un hoi tire phure khetne tchiwan bis ap kau diwes. Un tchi atchell kate. Kowa penell o baro Dewel. 18 Ninna tire tchawendar, kai tutar wenna, wenn lino un wenn budepangre an o kheer o baro rajestar pral o them Babilonia.”
19 Kote penas o Hiskija ap o Jesaja: “Ko lab o baro Deblestar hi mishto, hoi tu rakral.” O Hiskija penas peske: Mange hi mishto, te hi kek kurepen un marepen an mire diwessa.
20 Ko tselo wawar, hoi pral o Hiskija penepaske hi, un leskro baro koowa, hoi lo kras, hi tchinlo an o familjakro liil kol bare rajendar pral o them Juda. Kote hi ninna tchinlo, har lo ko tikno pani dren pandas un ko panjeskro drom kras, te nai well ko pani an o foro dren. 21 Un har o Hiskija meras, was leskro tchawo, o Manasse, baro rai pal leste.