19
O Debleskro rakepaskro Jesaja un leskre laba
1 Har o baro rai Hiskija kowa shunas, kras lo peskre koola paash un riwas i gono ap peste, un djas an o baro Debleskro kheer. 2 Un job bitchras ko pralstunes pral leskro kheer, o Eljakim, ninna o Shebna, kai tchinas i lila, un kol phureder rashaja pash o Debleskro rakepaskro, o Jesaja, koleskro dad o Amoz hi. Kol mursha his ninna rido an gone.
3 Un jon hunte penan leske: “Kawa penell o Hiskija: ‘Kau diwes hi i diwes pherdi traash, phagi un ladj. Hi jaake har penlo well: O ternepen kamell ap kai phub te well, un i dat hi kek soor, te anell li les win. 4 O baro rai pral o them Assur bitchras peskro pralstunes, te praassell lo o djido Debles. Har kamoms, te shunell o baro Dewel, tiro Dewel, kol tsele laba, hoi ko mursh penas, un dell les i phagi! Mange o Deblestar kol menshenge, kai pral atchan leskre menshendar, te rikrell lo peskro wast pral lende!’”
5 Har shunas o Jesaja i laba kol bare murshendar, kolen o Hiskija bitchras, 6 mukas lo lenge te penell: “Penenn tumaro rajeske: Jaake rakras o baro Dewel: ‘Tu shunal kol laba, kolentsa man i bitchepangre o baro rajestar dran o them Assur praassan. Ma traash glan kowa, hoi jon penan! 7 Me krau, te penell jek tchomone ap o baro rajeste, hoi les tradell, te djal lo pale an peskro them. Un kote krau, te well lo maredo o chareha.’”
8 An ko tsiro his o baro rai pral o them Assur buder gar an o foro Lakish. Job djas dureder an o kurepen o foreha Libna. Har leskro pralstuno, koles job pash o Hiskija bitchras, kowa shunas, djas lo kote pale.
9 Un o baro rai pral o them Assur shunas, kai hi o baro rai Tirhaka dran o them Etiopia peskre lurdentsa ap o drom, te kurell lo pes leha. Kote bitchras job murshen pash o Hiskija, ko baro rajeste pral o them Juda, 10 un mukas leske te penell: “Muk tut tiro Deblestar gar te chochell, ap koleste tu patseh un peneh: ‘O foro Jerusalem well gar an o wast dino o baro rajestar pral o them Assur.’ 11 Tu djineh, hoi i bare raja dran o them Assur an i tsele themma kran, har le halauteren maran, un tu patseh, te wess kokres win lino dran o merepen? 12 Mire phure maran i menshen an wawar themma, un kolengre debla nai lan len gar win dran lengre wasta – kol menshen dran Gosan, Haran, Rezef, ninna kolla dran Eden, kai an o foro Telassar his. 13 Un kai hi kanna i bare raja pral i forja Hamat, Arpad, Sefarwajim, Hena un Awa?”
O Hiskija mangell o baro Debles
14 I bitchepangre dan ko liil o Hiskija. Har job les draweras, djas lo pral an o baro Debleskro kheer un tchiwas ko liil glan o baro Debleste ap i phub, 15 un mangas o baro Debles un penas: “Baro Dewel, kai hal o Israeleskro Dewel, tu hal pral i bolepangrea beshdo. Tu kokres hal o Dewel pral i tsele themma ap kai phub. Tu hal, kai kral o bolepen un i phub. 16 Baro Dewel, dik, hoi menge djala, un shun, har o Sanherib tut, o djido Debles, praassell. 17 Tchatcho hi, baro Dewel, kai maran i raja pral o them Assur i menshen an bud themma, un kran dran lengre themma i mulo them. 18 Kolengre debla witsran le an i jag. Kolla his kek tchatche debla, wan kerdo i menshengre wastentsa dran kasht un bar. Doleske wan le khetne dino. 19 Kanna, maro baro Dewel, le men win dran o wast o baro rajestar pral o them Assur, te nai dikenn un haiwenn i menshe an i tsele themma ap kai phub, kai tu, baro Dewel, kokres o Dewel hal.”
O baro Dewel sal pral o baro rajeste pral o them Assur
20 Kote bitchras o Jesaja, koleskro dad o Amoz hi, jekes pash o Hiskija, un mukas leske te penell: Kawa penell o baro Dewel, kai o Israeleskro Dewel hi: Hoi tu ap mande rakral pral o Sanherib, ko rajeste pral o them Assur, un mandar mangal, kowa shunom me. 21 Kawa hi ko lab, hoi o baro Dewel ap leste penell:
Dik, har o foro Zion pral tute sal!
An leskre jaka tchi-moldo hal.
Har i terni tchai o Jerusalem hi, un kamell te djinell tutar tchi.
22 Koon hi kowa, pral koleste tchilatche laba rakral?
Un kones tire labentsa praassal?
I pre-phurdo hal,
un ap mande tele dikal,
pral o Israeleskro Debleste tut hadal!
23 Tire bitchepangren bitchral,
te praassenn le man, un penal:
“Pral ap i berge mire wurdjentsa djom,
un dur dren an o Libanon wom.
I bare un shukar ruka trujel dom,
un an o diwjo weesh lengro khatepen hatsom.
24 An i wawarengro them pani hatsom,
un kolestar pijom.
Pash i Egiptarja kanna djau,
un lengre panja mire pirentsa truk krau.”
25 Shun un muk tuke te penell:
Kowa was jaake har me kamom.
Glan i rah tsiro
his jaake an miro shero.
Kanna mukom te djal,
kai tu wal,
un sorele forja paash dal.
Un kokres lengre barra pral atchan.
26 Un kolla kai kote djiwan,
pengri soor jon nashan,
un tutar trashan
un palle meran.
Lenge djas har o senlepen,
hoi dran i truk phub was,
un har o khass ap o kheer,
hoi tele meras,
un gar baro was.
27 Tiro tardepen prindjrau
un tiro beshepen dikau,
un ko tsiro djinau,
kai djah tu win,
un kai weh pale dren.
Un ninna djinau,
hawi bari choljah
tu diwjes ap mande djah.
28 Tiri choli was glan mire kanda.
Tiro pre-phurdo rakepen hi prindjedo mandar.
Kanna shun, hoi tuke krau:
An tiro nak i gustri tchiwau,
un i ledertikri rima trul tiri meen pandau,
un ap ko drom, kai tu wal,
bitchrau me tut kanna pale pal.
29 Un tuke, Hiskija, mu well kowa i sikepen: An kau bersh chan tumer, hoi pestar kokres bares wella, ninna an o wawar bersh. Un an o triinto bersh nai tchiwenn pale djob an i phub un anenn djob dren, un tchiwenn drakengre ruka an i phub un chan tumenge i drake, hoi ap lende bares wenna. 30 Un kol menshe, kai pral atchan dran o kheer Juda, wenna pale har i sorelo ruk, koleskre draba dur an i phub djan un ap koleskre kashta rukengre bares wenna. 31 Awa, dran o foro Jerusalem wenna pale menshe, kai kolendar wenna, kai djido atchan. Un ap i berga Zion djiwenn kolla, kai win lino wan dran o merepen. Job, o baro Dewel, ko rai pral o bolepen un i phub, hi, kai kowa krell.
32 Doleske penell o baro Dewel pral o baro rajeste pral o them Assur: Na-a, job well gar an kau foro, un dell kek failo karje an kau foro dren. Glan kau foro nai tchiwell lo kek lurden, kai rikrenn pengre shilte pre. Un kek phub mukell lo pre te tchiwrell, te nai djal lo koi pral an o foro dren. 33 Ap ko drom, kai lo was, hunte djal lo pale pale. An kau foro well lo gar. Kowa penell o baro Dewel. 34 “Me rikrau mire wasta pral kau foro, un me lau les win dran i tchilatche wasta. Kowa krau me mange kokres, un o Davideske, kai miro budepaskro his.”
O lab, kai o Jesaja penas, well tchatcho
35 Un an koi rati was o baro Debleskro bolepaskro kote, kai i lurde dran o them Assur sowan, un maras 185.000 (sheel-ochta-deesh-te pantch serja) mursha lendar. Un har le taissarlakro pre stan, his kote lauter mule tchiddo.
36 Un o Sanherib, ko baro rai pral o them Assur, mukas peskre plachtene khera tele te phagell, un djas peskre lurdentsa pale pale, un atchas an o foro Ninive. 37 Un har lo an-mangas an o kheer leskro deblestar, o Nisroch, dan les leskre tchawe, o Adrammelech un o Sharezer, mulo o chareha. Un jon nashan penge krik an o them Ararat. Un leskro tchawo Asarhaddon was baro rai pal leste.