9
O Jehu well baro rai pral Israel
1 Un o Debleskro rakepaskro, o Elisa das jekes kol terne Debleskre rakepangren gole, un penas ap leste: “Tchip i pereskri dori trul tute, un le ko khoro, kai djet dren hi, tuha, un dja an ko foro Ramot an Gilead! 2 Te weh tu koi, hatseh ko murshes Jehu, koleskro dad o Josafat hi, un koleskro dad o Nimshi hi. De les win gole dran kolende, kai pash leste hi! Un dja leha an i palstuni isema! 3 Le ko khoro, kai djet dren hi, tchore kowa pral leskro shero un pen: ‘Jaake penell o baro Dewel: Me makau tut kau djeteha, te wess baro rai pral o Israel.’ Koi pal kre o wudar pre un naash tuke jaake sik har djala!”
4 Un ko terno Debleskro rakepaskro djas an o foro Ramot an o them Gilead. 5 Un har job koi was, his kol pralstune kol lurdendar koi khetne beshdo. Un job penas: “Tu pralstuno, tuke kamau tchomone penell.”
Koi putchas o Jehu: “Koneske mendar?”
Kowa penas: “Tuke, pralstuno!”
6 Koi stas job pre un djas an o kheer dren. Un o Debleskro rakepaskro tchoras ko djet ap leskro shero un penas ap leste: “Kowa penell o baro Dewel, ko Dewel pral o Israel: Me makau tut kau djeteha dren, te wess baro rai pral mire menshende, i Israelende. 7 Un tu maress kol menshen, kai wenna tiro rajestar Ahab. Jaake dau len i phagi ko rateske, hoi ratas, har maras i Isebel mire budepangren, mire rakepangren un kol tsele wawaren, kai mange koi his. 8 Awa, kamau, te wenn kol tsele mursha maredo, kai wenna pal o Ahab, i terne har i phure. 9 Un me kamau, te djal i menshenge, kai wan pal o Ahab, jaake har kol menshenge, kai wan pal o Jerobeam, koleskro dad o Nebat his, un har kol menshenge, kai wan pal o Baasha, koleskro dad o Achija his. 10 Un i Isebel, i djukle chan lat pre ap ko kotar them pash Jesreel un kek hunte paskrell lat.”
Un har job kowa penas, kras lo o wudar pre un nashas peske.
11 Un har o Jehu win djas pash kol menshende leskro rajestar, putchan le lestar: “Hi tchomone? Hoske was ko dinelo pash tute?”
“Tchi”, penas job. “Tumer prindjrenn kol murshes, kowa rakrell dinelo koowa.”
12 Jon penan: “Tu chocheh men. Pen menge o tchatchepen!”
Koi penas job lenge, hoi o Debleskro mursh leha rakras, un har lo penas: “Jaake penell o baro Dewel: ‘Me makom tut kau djeteha dren, te wess baro rai pral o Israel.’”
13 Koi las sik hakeno peskri plaashka, tchiwas lat glan leste ap kol pralstune barra ko dromestar. Jon phurdan an i phurdepaskri un dan gole: “O Jehu hi baro rai!”
O Jehu marell i bare rajen Joram un Ahasja
14 Un o Jehu, koleskro dad o Josafat un koleskro papo o Nimshi hi, hadas pes pral o baro rai Joram un kamas gar, te atchell o Joram baro rai.
[Glan jek tsiro djas o Joram khetne kol tsele lurdentsa dran Israel pash ko foro Ramot an Gilead, te kurell lo pes o baro rajeha pral o them Syria, o Hasael. 15 An ko kurepen was o baro rai Joram ratles dino. Doleske was job pale an o foro Jesreel, te mukell lo pes sasto te krell kol dawendar, hoi kol Syrarja les dan.]
Un o Jehu penas: “Te kamenn tumer pash mande rikrell, palle mukenn kekes dran o foro te nashell, te nai djal job an o foro Jesreel un penell kote, hoi kai djas.”
16 Un job djas ap peskro wurdin un uleras an o foro Jesreel. Kote his o Joram tchiddo. Un o Ahasja, ko baro rai pral Juda, was tele, te djal lo pash o Joram.
17 Pral ap ko turmo an Jesreel his jek tardo, kai dell jak. Kowa dikas kol kurepangre wurdja, kolentsa o Jehu was, un penas: “Me dikau lurden.”
Koi penas o Joram: “Bitche i klissepaskres pash lende, te putchell job: ‘Awenn tumer an o latchepen?’”
18 Un ko klissepaskro klissas koi un penas: “O baro rai putchell: ‘Awenn tumer an o latchepen?’”
O Jehu penas: “Hi kowa tiro koowa? Dja pal mande un am mantsa!”
Kowa, kai jak das, penas: “Ko bitchepaskro was pash lende koi un well gar pale.”
19 Koi bitchras o Joram o duito klissepaskro. Har kowa pash lende was, penas job: “O baro rai putchell: ‘Awenn tumer an o latchepen?’”
O Jehu penas: “Hi kowa tiro koowa? Dja pal mande un am mantsa!”
20 Pale penas kowa, kai jak das: “Job was pash lende un well gar pale. Un koi hi jek, kai ulerell har i diwjo, har o Jehu, koleskro dad o Nimshi hi.”
21 Koi penas o Joram: “Tchiwenn i graja glan o wurdin!”
Un jon tchiwan i graja glan leskro wurdin. Un kol dui bare raja, o Joram, ko rai pral Israel, un o Ahasja, ko rai pral Juda, uleran hakeno ap peskro wurdin pash o Jehu. Un jon tapran pen ap ko kotar them, hoi his o Nabotes dran Jesreel.
22 Har o Joram o Jehu dikas, putchas job: “Awenn tumer an o latchepen?”
Koi penas lo: “Hoi – an o latchepen? Har nai wah an o latchepen jaake rah har tiri dai, i Isebel, sharell mule deblen un krell bengeskro koowa?”
23 Koi rissras pes o Joram trujel, das an i herja un das gole ap o Ahasja: “Phukepen, Ahasja!”
24 O Jehu tapras peskro bogo un das o Jorames mashkral i phika karje, jaake kai djas ko failo an leskro dji. Un o Joram phagas khetne an peskro wurdin.
25 O Jehu penas ap peskro lurdeste, o Bidkar: “Le les pre un witse les ap ko kotar them, hoi his ko murshes Nabot dran Jesreel! Mange was an o shero, hoi o baro Dewel ap o Jorameskro dad, o Ahab, penas, har uleram mer dui ap i wurdin pal leste. 26 O baro Dewel penas leske: ‘Me dikom har taissar o Nabot un leskre tchawe mulo dino wan. Kate ap leskro kotar them dau tut pale, hoi tu leske kral.’
Doleske penau tuke: Le les un witse les koi! Jaake well kowa, har o baro Dewel penas.”
27 Har o Ahasja, ko baro rai pral Juda dikas, hoi djas, nashas job pash o foro Bet-Gan. O Jehu las les palla un mukas les ninna te marell ap o wurdin. Un jon dan ap leste karje ap ko drom pash o foro Gur, kai pash o foro Jibleam tchiddo hi. Un job nashas peske an Megiddo un meras koi.
28 Un leskre lurde anan les an Jerusalem un paskran les an leskro mulengro kheer pash leskre phurende an o Davideskro foro.
29 Har o Joram, o Ahabeskro tchawo, an o deesh-te-jekto bersh baro rai pral o Israel his, was o Ahasja baro rai pral o them Juda.
I rani Isebel well maredo
30 Har o Jehu an o foro Jesreel was, un i Isebel kowa shunas, kras joi peskre jaka shukar un peskre balla ap o shero railes, un dikas dran i wochni win. 31 Un har o Jehu tel ko foreskro wudar was, penas joi: “Djal mishto, tu Simri, kai peskro rajes mulo das?”
32 Job dikas pral pash i wochni un das gole: “Koon hi ap miri rig?”
Koi dikan dui, triin pralstune budepangre ap leste tele. 33 “Witsrenn la tele”, penas job. Koi witsran le i Isebel tele. Un lakro rat peras ap i massuri un ap i grajende. Un job uleras pral late.
34 Palle djas job dren, chas un pijas. Pal o chapen penas lo: “Dikenn pal koi bibachtliate un paskrenn lat! I baro rajeskri tchai hi li.”
35 Har jon kote djan, te paskrenn le lat, hatsan jon latar tchi har i kokale o sherestar, i herjendar un i wastendar.
36 Un jon wan pale un penan kowa ap o Jehu. Koi penas job: Kowa was jaake, har mukas o baro Dewel peskro budepaskres glan-wi te penell. Job, o Elija dran Tishbe, penas: “Ap o kotar them glan Jesreel chan i djukle i Isebelakro mass. 37 Un joi well har viechengro ful ap o them pash Jesreel. Kek penell nai buder: Kowa hi i Isebel.”