19
O Elija kamell te merell, un o Dewel krell les pale soreles
1 Un o Ahab penas i Isebel halauter, hoi o Elija kras un har maras job i tsele rashajen o deblestar Baal o chareha. 2 Kote bitchras i Isebel i bitchepaskres pash o Elija un mukas leske te penell: “I debla mu denn man i bari phagi, te krom gar tuha taissar an kau tsiro, hoi tu kral lentsa.”
3 Un har o Elija kowa shunas, tapras les i daar, un job nashas peske, te atchell lo djido. Jaake was lo an o foro Beersheba. Ko his i foro an o them Juda. Un kote mukas lo peskro budepaskres. 4 Un job djas i diwes dur an o mulo them. Un kote beshas lo pes tel i burra, un kamas te merell un penas: “Kanna hi doha, baro Dewel. Muk man te merell! Me hom gar feteder har mire phure.”
5 Un kote tchiwas lo pes tele un sowas dren tel kol burra. Un ap jek kopo was i bolepaskro. Ko tapras les an un penas ap leste: “Ste pre un cha!”
6 Job dikas trul peste un dikas pal peskro shero i kotar peklo maro un i khoro pani. Un job chas un pijas un tchiwas pes pale tele. 7 Kote was o bolepaskro o baro Deblestar o duito kopo, tapras les an un penas: “Ste pre un cha, i dur drom hi glan tute.”
8 Kote stas lo pre un chas un pijas, un djas an kai chapaskri soor star-deesh diwessa un star-deesh ratsja, bis te was lo ap o Debleskri berga, o Horeb. 9 Kote djas lo an i grotta, un kamas pral i rati kate te sowell. Ap jek kopo shunas lo i rakepen. Un o baro Dewel putchas lestar: “Hoi kameh tu kate, Elija?”
10 Un job penas: “Tu, baro Dewel un rai pral o bolepen un i phub, me budrom tuke miro tselo djijeha. Tire menshe Israel krenn buder gar, hoi tu lentsa win kral. I pre-tchidde barra, kai tuke vieche chatchedo wan, dan le khetne, un tire rakepangren maran le o chareha. Un me kokres atchom djido. Un jon kamenn man ninna te marell.”
11 Un o baro Dewel penas: “Dja win un ab glan mande ap i berga! Un me djau glan tute wergel.”
Koi phurdas i sorelo ducho pral i berge, te peran i barra tele, un i bare barra phagan. – O baro Dewel his gar an ko phurdepen. Un pal o sorelo phurdepen trissas i phub. – O baro Dewel his gar an ko trisslepen i phubjatar. 12 Un pal kai phubjakro trisslepen was i jag. – Un an i jag his o baro Dewel witar gar. Un pal koja was i tikno ducho. 13 Har o Elija kowa shunas, tchiwas lo peskri plaashka glan peskro mui, djas i kotar glan un atchas tardo an i wudar an koi grotta. Un i rakepen was pash leste, hoi penas: “Hoi kameh tu kate, Elija?”
14 Un job penas: “Tu, baro Dewel un rai pral o bolepen un i phub, me budrom tuke miro tselo djijeha. Tire menshe Israel krenn buder gar, hoi tu lentsa win kral. I pre-tchidde barra, kai tuke vieche chatchedo wan, dan le khetne, un tire rakepangren maran le o chareha. Un me kokres atchom djido. Un jon kamenn man ninna te marell.”
15 Kote penas o baro Dewel ap leste: “Dja ko drom pale, hoi tu wal, mank o mulo tato them. Un dja dren an o foro Damaskus! Mak latcho djet ap o shero o murshestar Hasael, te well job o rai pral o them Aram! 16 Un o Jehu, koleskro dad o Nimshi hi, koleske makess ninna latcho djet ap o shero, te well job o rai pral o Israel. Un o Elisa, koleskro dad o Shafat hi dran Abel-Mehola, koleske mak ninna latcho djet ap leskro shero, te well job i Debleskro rakepaskro pal tute! 17 Palle well jaake: Koon nai nashell peske glan o charo, koleha o Hasael dell, koles marell o Jehu. Un koon nai nashell peske glan o charo, koleha o Jehu dell, koles marell o Elisa. 18 Un me mukau efta serja (7.000) murshen djido an Israel, kolla kai peran gar ap pengre tchanga glan o debleste Baal un tchumras les gar.”
19 Un o Elija djas dureder un hatsas o Elisa, koleskro dad o Shafat hi. Un o Elisa budras ap i kotar phub. Glan leste djan deesh-te-jek budepangre, hakeno dui grumjentsa, kai hadan i phub trujel. Job kokres his o deesh-te-duito, kai djas glan dui grumja. Kote djas o Elija pash leste un witsras leske leskri plaashka trujel. 20 Un o Elisa mukas i grumjen, nashas pal o Elija un penas: “Muk man te tchumrap miro dades un miri dai! Pale wau un djau tuke pal.”
Kote penas lo ap leste: “Mishto, dja koi! Ma biste, hoi me tuke krom.”
21 Un o Elisa djas pale pale pash i grumjende, las dui grumjen un maras len. Ko kasht, hoi kol dujen khetne rikras, las lo un kras i jag. Koi pre keras lo o mass, das les peskre menshende, un jon chan. Palle stas lo pre, un nashas pal o Elija, un was leskro budepaskro.