12
Dran jek them Israel wenn dui themma: Israel un Juda
1-2 O Jerobeam, koleskro dad o Nebat his, his an o them Egiptia, kote nashas job glan o rajeste Salomo. An ko tsiro djas o Rehabeam an o foro Sichem. Un i tsele Israelitarja wan kote ninna khetne, te tchiwenn le les pral pende, te well lo lengro rai. Har kowa o Jerobeam shunas, was lo palpale dran o them Egiptia. 3 Un i Israelitarja bitchran murshen pash o Jerobeam un kharan les pash pende. Un job un i tsele Israelitarja, hoi khetne wan, rakran o Rehabeameha un penan:
4 “Kowa, hoi tiro dad mendar kamas, djas bud kope pral mari soor. Muk tu tchomone tele mendar, un de men gar sawi phari budi har tiro dad men das, palle ham mer tire latche budepangre.” 5 Kote pre penas lo ap lende: “Djan un denn man triin diwessa, un pal kowa wenn pale glan mande!”
Un i menshe djan penge. 6 Kote djas o rai Rehabeam pash i phureden; kolla his ninna glan leskro dadeste, o Salomeste, tarde, har job gomme djiwas. Un o Rehabeam penas: “Penenn mange tumaro goswepen, hoi te well kal menshenge penlo?”
7 Kote rakran jon leha un penan: “Te shuneh tu kau diwes ap kal menshende, un kreh, hoi jon kamenna, un rakreh lentsa kamle laba, palle hi jon tire budepangre an hako tsiro.”
8 Un job das tchi pre, hoi i phureder leske penan, un djas pash i terne murshende, kolla, kai wan leha khetne bares, un kanna leske budran. 9 Un job penas ap lende: “Penenn mange tumaro goswepen, hoi te penas kal menshenge, kai penan mange: ‘Muk tchomone tele mendar! Ma tchip sau budepen ap mende, hoi tiro dad ap mende tchiwas!’”
10 Un kol terne mursha, kolla, kai wan leha bares, penan leske: “Jaake pen ap kol menshende, kai penan ap tute: ‘Tiro dad tchiwas i pharo budepen ap mende. Muk tu tchomone tele mendar!’ Pen kowa ap lende: ‘Miro tikno gushto hi pesseder har miro dadeskri heri. 11 Un kanna, te tchiwas miro dad i pharo djipen ap tumende, me krau tumaro djipen gomme phareder! Miro dad das tumen i tchupnijah. Me dau tumen i tchupnijah, hoi saster pre hi.’”
12 Un o Jerobeam un i tsele menshe wan pal triin diwessa pash o Rehabeam, har job les lenge penas: “Awenn pal triin diwessa pale pash mande!” 13 Un o baro rai das i menshenge tchilatche laba pale, un rakras gar jaake, har i phureder leske penan. 14 Na-a, job rakras lentsa jaake, har i terne mursha kowa leske penan. Un penas: “Te tchiwas miro dad i pharo djipen ap tumende, me krau tumaro djipen gomme phareder! Miro dad das tumen i tchupnijah, me dau tumen i tchupnijah, hoi saster pre hi!”
15 Un jaake shunas o baro rai gar ap i menshende. Kowa kamas o baro Dewel jaake, te nai well leskro lab tchatcho, hoi lo o Achija dran Shilo an o mui tchiwas, te penell kowa les ap o Jerobeam, koleskro dad o Nebat hi.
16 Har i tsele Israelitarja dikan, kai kamas o baro rai gar ap lende te shunell, dan le gole: “Hoi djal men o David an un leskri familja! Hoi kran le menge? Mu dikenn le kokres pal lengro kheer! Nashas khere, mer dran Israel!” Kowa penan le, un hakeno djas pash peskro kheer. 17 Kokres pral i menshende, kai an i forja an o them Juda djiwenn, atchas o Rehabeam o baro rai.
18 Un o rai Rehabeam bitchras o pralstunes pral i budepangren, te djal lo pash i Israelitarjen. Leskro lab his Adoniram. Un o tselo Israel witsras barra ap leste, un jaake meras lo. Koi stas o rai Rehabeam ap peskro wurdin un uleras sik an o foro Jerusalem.
19 Jaake peras o Israel tele o Davideskre tchawendar, un kowa hi jaake bis ap kau diwes.
20 Un har i menshe an Israel shunan, kai o Jerobeam pale pale was, bitchran le murshen pash leste, un mukan leske te penell, te well lo ap i tsillo. Un kote tchiwan le les pral pende, te well lo lengro rai, o rai pral Israel. Kokres i menshe dran o kheer Juda rikran ap o Davideskre tchawende.
21 Un o Rehabeam was an o foro Jerusalem pale un mukas kol murshen i menshendar Juda un Benjamin khetne te well, kai nai kurenn pen. Kolla his 180.000 (sheel-te-ochta-deesh serja) mursha. Kolentsa kamas lo an o kurepen i Israelentsa te djal, te anenn jon lengro them pale pale pash o Rehabeam, o Salomeskro tchawo.
22 Kote penas o Dewel ap o Shemaja, ko Debleskro mursheste: 23 Pen ap o Rehabeam, o Salomeskro tchawo, o rajeste pral Juda, un ap i tsele murshende dran Juda un Benjamin un ap i wawar menshende: 24 Jaake penell o baro Dewel: “Ma djan pre, te kurenn tumen tumare phralentsa, kol murshentsa an Israel! Djan pale khere, hakeno an peskro kheer. Kau tselo koowa was mandar.”
Kote shunan jon ap o lab o baro Deblestar un djan pale pale, hakeno an peskro kheer, har o baro Dewel lenge penas.
25 Un o Jerobeam tchiwas o foro Sichem pale pre ap i berge Efrajim un djiwas kote. Palle djas lo kotar win un kras o foro Penuel sorleder.
26 Un o Jerobeam rakras an peskro dji: Te krau tchi, perell o them pale ap o Davideskre tchawende. 27 Te djan i menshe an miro them kote pre, te denn le viechen o baro Debleske an leskro kheer an Jerusalem, nai nashals lengro dji o baro rajeske pral Juda pale. Un man marans le, un tchiwans pale o Rehabeam pral peste, ko rajeste pral Juda.
28 Un o rai Jerobeam djinas pash peste, hoi nai krell lo, un mukas dui sonakangre terne grumjena te krell, un penas ap i menshende: “Tumer Israelitarja, hi doha, kai djan tumer jaake rah an Jerusalem, te mangenn o Debles an. Kate hi tumare debla, kolla anan tumen dran o them Egiptia!” 29 Un koi jek figura anas lo an o foro Betel un koi wawar an o foro Dan. 30 Jaake peran i menshe o Debleskro dromestar tele, har djan le an i forja Betel un Dan, te mangenn le kal sonakangre terne grumjen an.
31 O Jerobeam kras ninna mulne platseb ap o pralstuno them, kai i mule debla an-mangedo wenn, un rodas rashajen win, kai gar Levitarja his.
32 Un job tchiwas i baro diwes dren an o ochtato tchon, ap o deesh-te-pantchto diwes, te wals ko diwes har kol bare diwessa an o them Judac. Un ap i chatchepaskri chatchras lo viechen. Kowa kras lo an Betel, kote chatchras lo viechen kol terne grumjenge dran sonakai, hoi lo kras. Un kote an Betel tchiwas lo rashajen an pengri budi dren, te his le rashaja ap kol mulne platse, hoi lo kras, kai mangenn le i mule deblen an.
33 Ap o 15. (deesh-te-pantchto) diwes an o ochtato tchon – ko tchon, hoi job peske kokres win rodas, – djas o Jerobeam pash koi chatchepaskri, hoi job kras an Betel, un chatchras sungepaskro koowa koi pre, te krell lo kote i festo i Israelenge.