13
I Debleskro mursh rakrell pral koi chatchepaskri an o foro Betel
1 Koi was i Debleskro mursh dran Juda, koles bitchras o baro Dewel an Betel. Job was koi, har his o Jerobeam pash koi chatchepaskri tardo un chatchras sungepaskro koowa. 2 Un jaake har o baro Dewel leske penas, das o Debleskro mursh gole: “Chatchepaskri! Chatchepaskri! Shun, hoi o baro Dewel penell! I tchawo well boldo an o Davideskri familja. Leskro lab hi Josia. Kowa marell ap tute kol rashajen, kai chatchrenn sungepaskro koowa ap tute i mule deblenge. Un menshengre kokale wenn chatchedo ap tute.”
3 Palle penas o Debleskro mursh: “Kawa hi ko sikepen, hoi sikrell tumende, te rakras o baro Dewel dran miro mui: Kai chatchepaskri phagell an kotja, un koi jagakri tchik koi pre, perell ap i phub.”
4 Un har shunas o baro rai i laba o Debleskro murshestar, kol laba, hoi ko Debleskro mursh win kharas pral koi chatchepaskri an Betel, koi sikras o Jerobeam peskro wasteha ap leste, un penas: “Taprenn les!” Koi nashras leskro wast peskri soor, un job nai tserdas les gar pale pash peste. 5 Un koi chatchepaskri phagas an kotja, un koi jagakri tchik peras ap i phub, jaake har o Debleskro mursh kowa penas an o baro Debleskro lab.
6 Koi penas o baro rai ap ko Debleskro mursheste: “Mange tu o baro Deblestar, kai tiro Dewel hi, un mange lestar mange, te krell lo miro wast pale sasto!” Un o Debleskro mursh mangas o baro Debles, un o baro rajeskro wast was pale sasto – jaake har lo glan kowa his.
7 Palle penas o baro rai ap o Debleskro mursheste: “Ab mantsa an miro kheer! Cha un pi tchomone! Un me kamau te dap tut tchomone shukar.”
8 “Na-a”, penas o Debleskro mursh, “ninna te deh man o paash tiro brawlepastar, wau me gar tuha, un chau kek maro un pijau kek pani kate. 9 O baro Dewel penas mange: ‘Ma cha maro un ma pi pani, un ma naash ap ko drom pale pale, kai tu wal!’”
10 Un job djas i wawar drom pale pale, un djas gar ko drom, ap hoi job was an Betel.
11 An ko tsiro djiwas i phuro Debleskro rakepaskro an Betel. Un leskre tchawe wan pash leste, un penan leske halauter, hoi o Debleskro mursh kras ap kau diwes an Betel, un hoi lo o baro rajeha rakras. 12 Kote penas lengro dad ap lende: “Hawo drom djas lo khere?” Un leskre tchawe sikran leste o drom, hoi las ko Debleskro mursh, kai was dran Juda. 13 Kote penas ko phuro ap peskre tchawende: “Tchiwenn i ledertikri plachta ap miri burika!” Un jon kran kowa, un job beshas pes pre. 14 Un job klissas o Debleskro mursheske palla, un hatsas les tel i ruk beshdo. Kote penas lo ap leste: “Hal tu ko Debleskro mursh, kowa, kai was dran o them Juda?” Kowa penas: “Me hom.”
15 “Dja mantsa an miro kheer un cha maro mantsa”, penas o phuro. 16 O Debleskro mursh penas: “Me nai nashau gar tuha pale pale. Un me chau kek maro un pijau kek pani kate tuha. 17 O baro Dewel penas mange: ‘Tu, ma cha maro kote un ma pi pani kote, un ma dja pale ap ko drom, kai tu wal!’”
18 Kote penas o phuro ap leste: “Me hom ninna i Debleskro rakepaskro har tu, un i bolepaskro o baro Deblestar penas mange: ‘An les khere pash tute, te nai chal lo maro un te nai pijell lo pani!’” Chochepen his kowa, hoi ko phuro penas.
19 Jaake anas ko phuro o Debleskro murshes pale, te chal lo maro un te pijell lo pani an peskro kheer.
20 Har his le beshdo ap i chapaskri, kote rakras o baro Dewel ko phureha. 21 Un job das win gole un penas ap ko Debleskro mursheste dran Juda: “Kowa penell o baro Dewel: Tu shunal gar ap kol laba, hoi me, tiro baro Dewel tuke penom, un kral kowa gar, hoi me penom, te kress. 22 Tu djal pale pale un chal maro un pijal pani kote, kai me tuke penom: ‘Ma cha maro un ma pi pani!’ Doleske weh tu gar paskedo pash tire phurende.”
23 Pal o chapen mukas ko phuro Debleskro rakepaskro i ledertikri plachta ap peskri burika te tchiwell, un das koi burika o Debleskro mursheste. 24 Un job klissas peske. Un i lewo hatsas les ap o drom un maras les. Un job atchas koi tchiddo ap o drom. Un i burika un o lewo his pash leste tardo. 25 Kote wan menshe ap o drom, un jon dikan ko mules tchiddo ap o drom, un o lewo his pash leste tardo. Un jon wan an ko foro, kai ko phuro Debleskro rakepaskro djiwas, un rakran koi pral. 26 Har shunas ko phuro Debleskro rakepaskro kowa, penas lo: “Kowa hi ko Debleskro mursh, kai kras gar, hoi o baro Dewel leske penas. Doleske bitchras o baro Dewel o lewes, te dandrell lo les mulo. Jaake was, hoi o baro Dewel penas.”
27 Un job penas ap peskre tchawende: “Tchiwenn i ledertikri plachta ap miri burika!” Un jon kran kowa. 28 Un job klissas koi, un hatsas ko maredo murshes tchiddo ap o drom. Un i burika un o lewo his pash leste tardo. Un o lewo chas tchi o mulo murshestar, un i burika dandras lo gar khetne. 29 Kote hadas ko phuro Debleskro rakepaskro ko maredo Debleskro murshes pre, tchiwas les ap i burika, un anas les pale pale an o foro Betel, te rowenn le pral leste un paskrenn les. 30 Un job tchiwas ko mulo murshes an peskro mulengro kheer, kote kai job kamell paskedo te well. Un jon rowan pral leste un penan: “Maro phraal meras!”
31 Un har jon les paskran, penas o phuro ap peskre tchawende: “Te merau, paskrenn man kote, kai ko Debleskro mursh ninna paskedo hi, langs leskre kokale tchiwenn mire kokale! 32 Kowa, hoi job penas, was o baro Deblestar. Un jaake, har job les penas, wella kowa pral koi chatchepaskri an o foro Betel un pral kol tsele platse, kai mangenn le i mule deblen an, hoi hi an i forja an o them Samaria.”
33 Ninna pal kau koowa mukas o Jerobeam gar tele peskro tchilatcho dromestar. Job tchiwas rashajen an pengri budi dren, kai his kol mule deblenge koi. Un kolla wan wawar menshendar har kol menshendar Levi. Hakeno, kai kamas, nai was i rashai, un was dren tchiddo an peskri budi. 34 Kai doosh, hoi anas o Jerobeam ap peste, kras, te meras leskri familja win, un was buder gar hatslo ap i tseli phub.