7
O Dewel penell o Davideske: Jek tire tchawendar atchell baro rai hako tsiro
1 Har kanna o baro rai an peskro kheer beshdo his, un o baro Dewel kolen lauteren lestar krik rikras, kai trul leste djiwan un leha tchingepen kaman, 2 penas job ap ko Debleskro rakepaskro, o Natan: “Me djiwau an i kheer dran zedertikro kasht, un o Debleskro mochton hi an i plachteno kheer. Hi kowa mishto?” 3 Penas o Natan ap leste: “Dja koi un kre lauter, hoi tut ap o dji hi! O baro Dewel hi pash tute!”
4 Un an i rati penas o baro Dewel ap o Nataneste: 5 Dja koi un pen ap miro budepaskro o David: Jaake penell o baro Dewel: “Kameh tu mange i kheer te krell, te djiwap koi dren? 6-7 Me djiwom an kek kheer, fun ko diwes, kai me kol Israelitarjen win anom dran o them Egiptia bis kai diwes. Man his tchi har i plachteno kheer har djom lentsa trujel. An ko tselo tsiro penom me kekeske, kai das garda ap mire menshende Israel: ‘Hoske kreh tu mange kek kheer dran zedertikro kasht?’ 8 Doleske hunte peness tu ap miro budepaskro o David: Jaake penell o baro Dewel, ko rai pral o bolepen un i phub: Me lom tut i bakrendar krik, kai tu pre garda dal, te wess tu rai pral mire menshende Israel. 9 Me homs pash tute, kai tu ninna djal, un marom kolen lauteren glan tute, kai kuran pen tuha. Me kamau tiro lab bares te krell, jaake prindjedo har i laba kol bare rajendar ap i phub.
10 Un me kamau mire menshen Israel i them te dell, kai nai atchenn jon. Un koi djiwenn le, kai trashenn jon buder gar, un kai wenn jon gar buder tele rikedo kol tchilatche menshendar, har an ko tsiro, 11 kai rodom me tchatchepangre raja mire menshenge win. Me rikrau lauteren kolen tutar krik, kai kamenn te kurenn pen tuha.
Me, o baro Dewel, penau tuke, tu kreh mange kek kheer. Me krau tuke i kheer. 12 Te hi tiro tsiro trujel, un tu mereh, hadau jekes tire tchawendar, kai pal tute wenna, te well lo baro rai, un atchell kowa. 13 Kowa krell mange i kheer. Un me krau te atchell lo hako tsiro baro rai. 14 Me kamau leskro dad te well. Un job well miro tchawo. Un job te krell i tchilatcho koowa, dau me les i phagi, jaake har menshe i phagi denna. 15 Miro latchepen lau gar lestar krik, har me miro latchepen o Saulestar krik lom, koles krik lom, te wess tu baro rai. 16 Hako tsiro hi tut tchawe, kai pal tute wenna, un jek lendar hi baro rai glan mande. Un tiro rajengri beshepaskri atchell hako tsiro.”
17 Har o Natan kol tsele laba, hoi o Dewel leske sikras, o Davideske penas, 18 djas o baro rai David an o Debleskro plachteno kheer, tchiwas pes tele glan o baro Debleste un penas:
“Baro Dewel, miro rai, koon hom me, un hoi hi miro kheer, kai tu kral jaake bud mange? 19 Un kanna hi kowa tuke gar doha. Baro Dewel, miro rai, tu penal mange, hoi mire tchawende kameh te dell, ninna an ko tsiro, hoi dur glan mende hi. Un tu mukeh kowa man, i menshes, te djinell. 20 Un hoi nai rakrau me, tiro budepaskro, gomme budeder? Tu baro Dewel, miro rai, djineh, hoi an miro dji hi. 21 Pal tiro lab un pal tiro dji kral tu ko tselo baro koowa, un penal kowa mange, tiro budepaskro.
22 Baro Dewel, miro rai, har baro hal tu! Kek hi jaake har tu! Un dell kek dewel har tu, pal lauter, hoi mer mare kandentsa shunam. 23 Un kai hi menshe ap i phub har tire menshe Israel? Kolenge djal tu koi, te less len dran o pandepen win, te wenn le tire menshe. Ko baro un sorelo koowa, hoi tu lenge kral, kras, te wal prindjedo ap i phub. Tu tradal wawar menshen lengre deblentsa win glan tire menshende, kai tu win lal dran Egiptia, te wenn le tire. 24 Tu rodal tuke kol menshen Israel win, te wenn jon tire menshe hako tsiro, un tu, baro Dewel, wal lengro Dewel. 25 Mo rai un baro Dewel, muk kanna ko lab tardo atchell hako tsireske, hoi tu pral mande un pral miro kheer penal, un kre jaake, har tu penal! 26 Palle well tiro lab sharedo an hake tsirja, un i menshe penenna: ‘O baro Dewel, ko rai pral o bolepen un i phub, hi o Israeleskro Dewel.’ Un o kheer David, kai tiro budepaskro hi, atchell tardo glan tute.
27 Tu, baro Dewel un rai pral o bolepen un i phub, kai hal o Israeleskro Dewel, tu sikral man, hoi kameh te krell – un penal mange: ‘Me krau tuke i kheer.’ Doleske lom man khetne un rakrom jaake ap tute. 28 Baro Dewel, miro rai, tu hal o tchatcho Dewel. Un tire laba hi o tchatchepen. Un kanna dal tu man tiro lab, te dess ko tselo latcho koowa mande, kai hom tiro budepaskro. 29 Kanna tchip tiri bacht pral mande un mire menshende, te atchenn le glan tute hako tsiro, jaake har tu baro Dewel, miro rai, rakral. Muk te well tiri bacht un tiri soor ap mire menshende hako tsiro!”