22
O David well o pralstuno pral 400 mursha
1 Un o David nashas peske dran o foro Gat un khatras pes an koi grotta pash o foro Adullam. Un har leskre phrala un o tselo kheer leskro dadestar kowa shunan, djan le lauter koi pash leste. 2 Un ninna wan pash leste khetne bud wawar mursha. Mank lende his sawe, kai his palla-lino. Wawaren his sijaan, hoi nai plaissran le gar. Wawaren his i pharo dji. Un job was lengro pralstuno. Kolla lauter his jaake 400 (star-sheel) mursha.
3 Kotar djas o David dureder un was an o them Moab an o foro Mizpe, un penas kote ap o rajeste pral i Moabarja: “Muk miro dades un miri dai pash tute te well un pash tute te atchell jaake rah, bis te me djinau, hoi o Dewel mantsa krella.” 4 Un job anas len glan o rajeste pral o them Moab. Un jon atchan pash leste, jaake rah har o David an ko khatepen ap koi berga his.
O David well phukedo
5 Un o Debleskro rakepaskro, o Gad, penas ap o David: “Ma atch an ko khatepen ap koi berga, dja khere an o them Juda!” Un o David djas un was an o weesh Heret.
6 Un o Saul shunas, te was o David peskre murshentsa diklo. O Saul his kote ap i tikni berga pash o foro Gibea tel i ruk beshdo. Un les his peskro witsepaskro tchuri an o wast. Un leskre tsele budepangre his pash leste tardo. 7 Kote penas o Saul ap peskre budepangre, kai glan leste tardo hi: “Shunenn, tumer Benjaminarja! Patsenn tumer, te dell o tchawo ko murshestar Isai tumen lauteren hachetikri phub un drakengro them? Lell job tumen lauteren, te wenn pralstune pral leskre lurdende: pral jek sero un pral jek sheel? Na-a, patsenn kowa gar! 8 Hoske tchiwan tumen palle lauter khetne khatar mande? Un kek tumendar penas mange, te das pes miro tchawo un o Isajeskro tchawo sowel, te rikrenn le khetne. Kek tumendar penas mange kolestar tchomone, te hi miro tchawo kowa, kai miro budepaskres, o Davides, ap mande pre anas, jaake te lell kowa man kanna palla, har kowa kau diwes hi!”
9 Kote penas ko Edomari, o Doeg, kai mank i budepangre pash o Saul tardo his: “Me dikom o Isajeskro tchawes, har was lo an o foro Nob pash o Ahimelech, koleskro dad o Ahitub hi. 10 Un kowa putchas o baro Deblestar leske, das les maro; un ko charo ko Filistarestar Goliat das lo les ninna.”
O Saul mukell i rashajen dran Nob te marell
11 Kote bitchras o baro rai Saul murshen koi, un mukas o rashajes, o Ahimelech, koleskro dad o Ahitub hi, pash peste gole te dell, ninna leskro tselo dadeskro kheer, i tsele rashaja dran Nob. Un jon wan lauter glan o baro rajeste.
12 Un o Saul penas: “Shun, Ahimelech!”
Un job penas: “Kate hom, miro rai!”
13 Un o Saul penas: “Hoske tchiwan tumen khatara mande khetne, tu un o Isajeskro tchawo, jaake te dal tu les maro un i charo, un putchal o Debles leske, hoi lo hunte krell? Doleske nai hadell lo pes kanna ap mande un lell man palla, jaake har kau diwes hi.”
14 O Ahimelech penas ap o baro rajeste: “Koon mank tire tsele budepangre hi jaake ap tiri rig har o David? Ninna hi lo tiri tchakro rom un o pralstuno pral tire feteder lurdende. Un job hi an-diklo an tiro tselo kheer. 15 Ko diwes his gar o ersto kopo, kai putchom o Debles leske! Sawo koowa krau me gar, te phukrap ap tute! Miro baro rai, ma tchip sawi phari doosh ap mande, witar gar ap miro dadeskro kheer. Me djinom kolestar lauterestar gar tchi.”
16 “Ahimelech”, penas o baro rai, “tu hunte meress, tu un tiro dadeskro tselo kheer!”
17 Un o baro rai Saul penas ap kol lurdende, kai trul leste tardo hi: “Djan ap lende un denn kal rashajen o baro Deblestar mulo. Lengre wasta his o Davideha. Jon djinan, te hi lo ap o naashepen un penan kowa mange gar.”
Kol mursha kaman gar o baro Debleskre rashajen an-taprell un kaman len gar mulo te dell. 18 Kote penas o baro rai ap o Doeg: “Ab tu, un de len mulo!”
Un o Doeg, ko Edomari, was glan un das kol rashajen mulo. Un ap ko diwes meran 85 (ochta-deesh te pantch) mursha, kai an i rashajengri laintikri damdira rido his. 19 Ninna an o foro Nob, kai i rashaja djiwan, mukas o Saul lauteren te marell o chareha, murshen un djuwjen, tchawen un ternepen. Ninna i grumjen un i burike un i bakre das lo o chareha mulo.
20 Kokres jek mursh, leskro lab his Abjatar – nai nashas peske. Leskro dad his o Ahimelech un leskro papo o Ahitub. Un job nashas pash o David, 21 un penas leske, te mukas o Saul i rashajen o baro Deblestar mulo te dell.
22 Kote penas o David ap o Abjatar: “Me djinom ko diwes, har me koi homs, un o Doeg ko Edomari dikom, kai kowa phukrell lauter o Sauleske. Man hi doosh ap o rat hakenestar an tiro dadeskro kheer. 23 Atch pash mande un ma dare! Job, kai man kamell te marell, kowa kamell tut ninna te marell. Kate pash mande nai krell lo tut tchi.”