21
I Benjaminarja hunte merenn gar win
1 Har his i mursha dran o Israel an o foro Mizpa, dan le pen sowel, te dell kek lendar peskri tchai jekes dran i menshende Benjamin. 2 Kanna wan i Israelitarja an o foro Betel, un beshan glan o Debleste o tselo diwes, un dan gole un rowan, 3 un penan: “Baro Dewel, tu Dewel pral o Israel! Hoske djas kawa an Israel, te hi kanna i menshe jekestar o Jakobeskre tchawendar buder gar koi?”
4 Un o wawar diwes taissarlake stan i menshe sik pre, un kran i chatchepaskria, un maran viechen o Debleske, sawe, hoi leske tseles chatchedo wan un sawe, kai chan le khetne glan leste. 5 Un i Israelitarja putchan mank pende: “Dell kol 12 (deesh-te-dui) bare familjendar, kai wenn o Jakobeskre tchawendar, jek, kai was gar pash o tsillo glan o baro Debleste?”
Kowa his jaake, har i menshe khetne gole dino wan, te wenn le an Mizpa, dan le pen i bari sowel un penan: “Koon well gar an Mizpa glan o baro Debleste, kowa hunte merell.”
6 Un kanna rowan i Israelitarja an pengre djia pral kowa, hoi i menshentsa djas, kai wan lengro phralestar o Benjamin, un penan: “Kau diwes was i kasht tele dino o rukestar Israel. 7 Hoi nai kras mer kolenge, kai djido atchan, te well len romjen? Kek mendar dell len peskri tchai. Jaake dam men sowel glan o baro Debleste.”
8 Doleske putchan le: “Dell kol 12 (deesh-te-dui) bare familjendar, kai wenn o Jakobeskre tchawendar, jek, kai was gar an o foro Mizpa, har mer glan o baro Debleste khetne wan?”
Un jon shunan, te was kek dran o foro Jabesh, hoi an o them Gilead hi, ap i platsa, kai o tsillo his. 9 Har kote an i liil tchinlo was, koon was, dikan le, kai kek dran Jabesh an Gilead was.
10 Kanna bitchran le 12.000 (deesh-te-dui-serja) mursha koi, kai tchatche kurepangre his. Un jon penan ap lende soreles: “Djan an o foro Jabesh, un denn i menshen koi o chareha mulo, ninna i djuwjen un i tchawen! 11 Hako murshes un mursh tchawes denn mulo, un ninna haki djuwel, kai romedini hi! Kokres i terne tchen mukenn djido!”
12 Un jon hatsan mank kolende, kai an o foro Jabesh an o them Gilead djiwan, 400 (star-sheel) tcha, kolen gomme kek mursh an-tapras. Un kolen anan le ap i platsa an o foro Shilo, hoi an o them Kanaan tchiddo hi.
13 Palle bitchran i Israelitarja murshen pash i Benjaminarja, kai nashan penge pash o baro bar, hoi Rimmon kharell, un mukan lenge te penell, te kamenn le lentsa buder kek tchingepen. 14 Un jaake wan kol 600 (shob-sheel) Benjaminarja pale. Un i Israelitarja dan len kol tchen, kolen jon djiwell mukan ko djuwjendar an o foro Jabesh an o them Gilead. Un kolla his gomme gar doha lenge.
Terne tcha dran Shilo wenn tchoredo
15 Un i Israelitarjen khaitas kowa, hoi i Benjaminentsa djas, kai tchinas len o baro Dewel win dran o kheer Israel. 16 Un i tchatchepangre phure penan: “Hoi nai krah mer, te lenn i Benjaminarja, kai djido atchan, pale romjen? An o tselo them Benjamin atchas kek djuwel djido. 17 Ko them kol murshendar, kai pral atchan, hi gomme koi un atchell lenge. Te lenn le kek tchawen, merell jek kol Jakobeskre tchawendar win. 18 Mare tchen nai dah len gar te romedinerenn le len. I tsele Israelitarja dan pen sowel, un penan: ‘Praassedo well kowa, hoi i Benjamines i djuwjat dell.’”
19 Un jon penan penge: “Hako bersh hi i baro chapen an o foro Shilo, kai wenn i menshe khetne te sharenn le o baro Debles.” [Shilo hi tchiddo ap i serwi rig o forestar Betel, un ap i tchatchi rig o forestar Lebona, pash ko drom, kai djal dran Betel an o foro Sichem, ap koi rig ko dromestar, kai o kham pre djal.]
20 Un ap i Benjaminarja penan le: “Djan koi un khatrenn tumen mank i drakengre ruka, un denn jak! 21 Te dikenn tumer, te wenn i terne tcha dran Shilo khelepah un gipah win dran o foro, palle stenn dran tumaro khatepen win! Un hakeno tumendar taprell peske jek terni tchai, te romedinerell lo lat. Un khetne lah djal lo khere an o them Benjamin.
22 Un te wenn lengre dada un lengre phrala, te tchingrenn le mentsa, palle kamah lenge te penell: ‘Awenn menge latches, un mukenn lenge kol tchen! Mer nashte lap gar hakeneske lendar i romni an o kurepen. Un tumer han gar kolla, kai dan len lende. Jaake anenn tumer kek doosh ap tumende, te mukenn tumer len lende.’”
23 Kote kran i Benjaminarja jaake har lenge penlo was. Un jon tchoran penge jaake bud tchen har len hunte wans, kolendar kai kote khelan. Un lan len pentsa, un djan khere an pengro them, un tchiwan i forja pale pre, un djiwan koi.
24 Un an ko tsiro mukan ninna kol wawar Israelitarja koi platsa, kai le khetne wan, un djan pale khere, hakeno pash peskre menshende un an peskri familja, an ko them, hoi lenge dino was.
25 An ko tsiro his kek baro rai pral i Israelitarja. Hakeno kras, hoi an leskre jaka mishto his.