20
I menshe dran Gibea lenn pengri phagi
1 Un i tsele murshenge dran Israel his mishto, te wenn le khetne glan o baro Debleste an o foro Mizpa. Jon wan dran o tselo them, hake rigjendar kotar pral, kai i menshe Dan djiwenna bis tele pash o foro Beersheba, un koi pashel dran o tselo them Gilead. 2 400.000 (star-sheel serja) mursha dran kol deesh-te-dui bare familje, kai wenn o Jakobeskre tchawendar, wan khetne un kran i tsillo o Debleskre menshendar. Kolla lauter his lurde, kai nai kurenn pen i chareha. 3 Un i Benjaminarja shunan, te djan i Israelitarja pre an o foro Mizpa. Un i Israelitarja penan: “Penenn menge, hoi djas, te was sawo ladjedo koowa kerdo?”
4 Koi penas ko Levitari, ko mursh, koleskri djuwel maredo was: “Me wom an o foro Gibea an o them Benjamin, te atchap koi pral i rat. Un miri duiti djuwel his mantsa. 5 Un kote wan man i mursha dran Gibea palla, un tchiwan pen trul ko kheer, kai homs. Un man kaman le mulo te dell. Un pral miri djuwjate peran le sorjah, jaake rah, bis te joi mulo his. 6 Un kote lom miri muli djuwjat un tchinom lat an kotja un bitchrom kol kotja an i tsele gaba un forja, kai i Israelitarja djiwenn, te djinenn lauter, hawo tchilatcho un ladjedo koowa kerdo was an Israel. 7 Un kanna han tumer Israelitarja lauter kate khetne. Rakrenn khetne un penenn, hoi kerdo hunte well!”
8 Kote hadan pen kol tsele mursha, un his jek dji un jek djipen, un penan har dran jek mui: “Kek mendar te djal pale an peskro plachteno kheer, 9 bis te das mer kol menshen an Gibea kowa pale, hoi jon kran. Kanna mukah kashta te perell, 10 te rodas deesh murshen dran jek sheel win, un jek sheel dran jek sero, un jek sero dran deesh-serja dran hake bare familje, kai wenna o Jakobeskre deesh-te-dui tchawendar. Kolla wi-rodede mursha hunte anenn o chapen i wawar lurdenge, kai wan khetne, te denn le i menshen an o foro Gibea ko ladjedo koowa pale, hoi le kran.”
11 Un i tsele murshenge dran Israel his mishto, te djan le khetne pash ko foro, te kurenn le pen kol menshentsa koi. 12 Un dran haki bari familja, hoi wella kol deesh-te-dui Jakobeskre tchawendar, bitchran le murshen an i gaba un forja, kai i Benjaminarja djiwenn, un mukan len te putchell: “Hawo tchilatcho koowa hi kowa, hoi pash tumende kerdo was? 13 Kanna denn kol murshen win, kol tchi-molden dran o foro Gibea, te nai das len mulo, jaake te nai witsras o tchilatchepen dran o Israel win.”
I Benjaminarja kaman gar ap pengre phralende, kol wawar Israelitarjen, te shunell, 14 un wan dran i tsele forja khetne an o foro Gibea, te marenn le pen i murshentsa dran Israel. 15 Un jaake wan ap ko diwes 26.000 (biish-te-shob-serja) Benjaminarja khetne, kai nai kurenn o chareha. Koi pashel wan i mursha dran o foro Gibea. Kolla his 700 (efta-sheel) tchatche kurepangre. 16 Un mank kol tsele lurdende his efta-sheel wi-rodede mursha, kai serwe-wastengre his. Kolen his witsepangrea un nai ferdennb jaake mishto i bar, te djas lo hako kopo kote, kai lo hunte djal, ninna te wals kowa i bal.
17 Un i mursha dran Israel his 400.000 (star-sheel serja) lurde, kai nai kurenn o chareha, lauter tchatche kurepangre. I Benjaminarja his koi gar pashel.
18 Un i Israelitarja kran pen pre, un djan an o foro Betel, un putchan o Deblestar: “Koon mendar hunte djal glan win, te marell lo pes i Benjaminentsa?”
Un o baro Dewel penas: “O Juda djal glan!”
19 Un i Israelitarja kran pen sik taissarlake ap o drom, un wan khetne glan o foro Gibea, 20 un tchiwan pen pre o marepaske i Benjaminentsa pash o foro Gibea. 21 Un i Benjaminarja djan dran o foro Gibea win, un dan ap ko diwes 22.000 (biish-te-dui-serja) murshen i Israelendar mulo.
22-23 Un i Israelitarja djan pale pash o foro Betel, rowan un dan gole glan o baro Debleste bis i rati was, un putchan o baro Debles: “Djas mer gomme jek kopo pre, te kuras men mare phralentsa, i Benjaminentsa?”
Un o baro Dewel penas: “Awa, djan un kurenn tumen lentsa!”
Koi penas jek ap o wawareste: “Mer hunte das gar pre!” Un jaake tchiwan le pen pale pre o marepaske, kote kai le jek diwes glan tardo his. 24 Un har le pash i Benjaminarja wan, 25 djan kolla ninna ko diwes pale dran o foro Gibea win un dan 18.000 (deesh-te-ochta-serja) murshen dran Israel mulo. Un kolla his lauter mursha, kai nai kuran o chareha.
26 Pale djan i tsele lurde dran Israel pre an o foro Betel, un rowan un dan gole glan o baro Debleste. Un chan tchi un pijan tchi ko tselo diwes bis i rat was. Un jon chatchran viechen o baro Debleske, sawe kai wan tseles chatchedo un sawe, kai chan le khetne glan o baro Debleste.
27-28 An ko tsiro his o Debleskro mochton, kai o Debleskre deesh laba dren his, koi tardo. Un o Pinhas his o rashai, kai kote o Debleske budras. Leskro dad his o Eleasar. Kowa his i tchawo o Aronestar. Un i Israelitarja putchan o baro Debles: “Djas mer gomme jek kopo pre, te kuras men mare phralentsa, i Benjaminentsa?”
O baro Dewel penas: “Djan pre! Taissar dau len an tumare wasta!”
29 Un i Israelendar khatran pen mursha tchorchanes trul o tselo foro Gibea te perenn le lenge an o dumo. 30 Un i triinto kopo tchiwan pen i wawar Israelitarja pre glan o foro Gibea jaake har kol dui wawar diwessa, te kurenn le pen i Benjaminentsa.
31 Un ninna kau kopo wan i Benjaminarja dran o foro win, un djan ap i lurdende dran Israel. Un kolla kran, har te wans le lendar dino un tserdan pen pale. Un jaake wan i Benjaminarja o forestar tele-tchinlo. Un ap i dromma, hoi pash i forja Betel un Gibeon djan, ninna win ap o them, dan i Benjaminarja jaake trijanda Israelitarjen mulo. 32 Koi patsan le, te his i Israelitarjen an lengro wast har i wawar kope ninna.
I Israelitarja penan penge: “Mer nashah menge lendar ap kol dromma, jaake te wenn le o forestar tele-tchinlo.”
33 Pash o foro Baal-Tamar atchan i Israelitarja tardo un tchiwan pen newes pre o marepaske. Un kol Israelitarja, kai khatran pen trul o foro, wan win dran pengro khatepen pash Geba, 34 un djan i wawar rigjatar ap o foro Gibea pre. Kolla his 10.000 (deesh-serja) mursha, wi-rodedo dran o tselo Israel. Un o marepen was pharo. I Benjaminarja haiwan gomme gar, te was i bibacht pral lende. 35 Un o baro Dewel was i murshenge dran Israel ap i rig, jaake te maran le kau diwes 25.100 (biish-te-pantch-serja-jek-sheel) Benjaminarjen. 36 Un kote hunte dikan i Benjaminarja, te hi le dino.
Kau tselo koowa was jaake: I lurde dran Israel tserdan pen pale, har patsan le, te krenn kanna kol mursha pengro koowa, kai khatemen trul o foro Gibea hi. 37 Un kolla kai khatedo his, wan dran pengro khatepen win un nashan sik pash o foro Gibea, un lan ko fores dren, un dan halauteren, kai an o foro his, pengre charentsa mulo. 38 Kol khatede mursha kran i wawar Israelentsa win, te mukenn le i pesso kalo jagakro ducho dran o foro pre te djal. 39 Har i wawar Israelitarja ko jagakri ducho dikan, rissran le trujel. Ap ko tsiro his jaake trijanda mursha lendar maredo i Benjaminendar. Un kolla patsan, te wals o Israel an lengre wasta har i wawar kope. 40 Koi djas ko pesso kalo jagakro ducho pre dran o foro. Un i Benjaminarja dikan pal pende un dikan, te chatchas o tselo foro. Un i jag djas pre bis an o bolepen. 41 Un i mursha dran Israel nashan buder gar lendar krik un rissran pen. Koi tapras i Benjaminarja i bari daar. Un jon haiwan, te was i bibacht pral lende. 42 Un jon rissran pen krik i Israelendar, te nashenn le an o mulo them, un wan dren lino. Un ninna kolla, kai o forestar wan, wan ap lende, jaake te his i Benjaminarja mashkral dren. Glan un palla wan le ap lende. 43 Jaake wan i Benjaminarja dre-pandlo un palla lino. I Israelitarja mukan lenge kek tsiro te lenn le newo ducho, un dan len mulo bis ap i wawar rig o forestar Gibea, kote kai o kham pre djal. 44 Jaake meran 18.000 (deesh-te-ochta-serja) Benjaminarja. Un kolla his lauter tchatche kurepangre.
45 Un kolla, kai nai nashan penge, rissran, te nashenn le an o mulo them pash ko baro bar, hoi kharell Rimmon. Ap kol dromma lan len i Israelitarja ninna palla, un dan lendar 5.000 (pantch-serja) mulo. Un jon lan len palla bis pash Gidom. Kate dan le gomme 2.000 (dui-serja) lendar mulo. 46 Un jaake meran ap ko diwes 25.000 (biish-te-pantch-serja) Benjaminarja, kai nai kuran i chareha, lauter tchatche kurepangre.
47 Kokres 600 (shob-sheel) mursha nai nashan penge an o mulo them pash ko baro bar, hoi kharell Rimmon, un atchan kote star tchonna. 48 Un i Israelitarja rissran kote trujel, un djan pale an o them Benjamin, un dan o chareha lauter mulo, hoi hatsan le an kol forja, menshen un viechen. Un i tsele forja, hoi hatsan le, chatchran le pre.