32
I khera Ruben, Gad un Manasse lenn pengro them wergel o pani Jordan
1 I menshen dran o kheer Ruben un dran o kheer Gad his bud vieche. Un jon dikan, te hi latcho senlepen i viechenge an ko them Jaser un Gilead. 2 Koi wan le pash o Moseste un ko rashajeste Eleasar un pash kol pralstunende pral i Israelitarja, un penan ap lende: 3 “Ko them pash kol forja Atarot, Dibon, Jaser, Nimra, Heshbon, Elale, Sibma, Nebo, un Beon, 4 hoi las o baro Dewel dren peskre menshenge Israel, kote hi bud senlepen i viechenge, un men, tire budepangren, hi vieche. 5 Te hal menge latcho, de men kau them, te hunte djas mer gar pral o pani Jordan.”
6 O Mose penas ap lende: “Tumare phrala hunte djan an o kurepen, un tumer kamenn kate te atchell? 7 Te krenn kowa, lenn i wawar Israelitarja daar un kamenn gar an ko them te djal, kai o baro Dewel len della. 8 Jaake kran ninna tumare phure, har me len win bitchrom dran Kadesh-Barnea, te dikenn le pal, har ko them hi. 9 Un har jon koi pre wan pash ko pani Eshkol, un dikan ko them, wan le pale pale un rakran jaake i Israelentsa, te lan jon daar, un kaman gar an ko them te djal, kai kamas o baro Dewel lende te dell. 10 Un o baro Debleskri choli was baro an ko tsiro, un job das pes sowel un penas: 11 ‘Kowa hi tchatcho, hoi penau: Kalla menshe, kai dran o them Egiptia win djan, un hi biish bersha un phureder, dikenn ko them gar, kai dom man sowel, te dap les o Abrahameste, o Isaakeste, un o Jakobeste. Jon djan mantsa gar o djijeha. 12 Kokres o Kaleb, koleskro dad o Jefunne hi, kol menshendar Kenas, un o Josua, koleskro dad o Nun hi, wenn kote dren. Jon djan mantsa o tselo djijeha.’ 13 Jaake was o baro Debleskri choli pral i Israelitarja, un job mukas len trujel te djal an o mulo tato them star-deesh bersha, bis te kek buder koi his kol tsele menshendar, kai choiran o baro Debles.
14 Un kanna krenn tumer ko emligo koowa! Tumer han tchatche tchawe tumare dadendar! Mursha, kai o Debleskro drom tele djan un krenn, te well o baro Debleskri choli pral Israel bareder. 15 Te djan tumer lestar krik, mukell job kal menshen i rah tsiro an o mulo tato them, un tumen hi doosh, te djan le halauter tele.”
16 Koi wan jon glan pash leste, un penan: “Mer kamah kate khera te krell mare bakrenge, un forja mare tchawenge. 17 Palle djah mer khetne mare phralentsa an o kurepen. Mer djah glan lende, bis te anam len an lengro them. An ko tsiro atchenn mare tchawe an kol sorele forja, te krenn lenge kol menshen an kau them tchi. 18 Mer kamah gar khere te djal, bis te hako Israelitari peskro kotar them las. 19 Mer kamah gar lentsa i kotar them te lell ap i wawar rig o panjestar Jordan. Maro them lah ap kai rig o panjestar Jordan, kai o kham pre djal.”
20 O Mose penas ap lende: “Te kamenn tumer kowa tchatchepah te krell, palle lenn tumare chare un hoi tumen hunte well kurepaske, un djan an o kurepen glan o baro Debleste! 21 Un djan wergel o pani Jordan glan o baro Debleskre jaka, un atchenn kote, bis te tradell job kolen glan peste win, kai kurenn pen tumentsa, 22 un bis te hi lo o rai pral ko them. Koi pal nai djan tumer pale pale, un kek doosh lan tumer ap tumende glan o baro Debleste un glan Israel. Un o them ap kai rig kate well tumende dino glan o baro Debleste. 23 Te kamenn tumer kowa gar te krell, palle lenn i doosh ap tumende glan o baro Debleste. Un kowa dikenn tumer, te well koi phagi ap tumende. 24 Tchiwenn kanna forja pre tumare tchawenge un barra trul kol platse, kai tumare vieche hi, un krenn, hoi tumer penan.”
25 “Maro rai, mer krah, har tu penal,” penan kol mursha dran o kheer Gad un dran o kheer Ruben. 26 “Mare tchawe un djuwja, halauter hoi men hi, un mare tsele vieche atchenn an kol forja an o them Gilead. 27 Mer, tumare budepangre, lah mare chare un djah i wawar lurdentsa an o kurepen glan o baro Debleste, har tu, maro rai, penal.”
28 Koi penas o Mose ap o rashajeste Eleasar un ap o Josua, koleskro dad o Nun his, un ap kol pralstunende pral i bare familje: 29 “Te djan i mursha dran o kheer Gad un dran o kheer Ruben tumentsa wergel o Jordan, un kurenn pen jaake rah glan o baro Debleste, bis te ko them tumenge hi, jaake denn lende ko them Gilead, te well kowa lenge. 30 Djan jon gar tumentsa wergel o pani Jordan an o kurepen, jaake lenn jon i kotar them mashkral tumende an ko them Kanaan.” 31 I mursha dran o kheer Gad un dran o kheer Ruben penan pale: “Jaake har o baro Dewel menge penas, krah mer. 32 Mer lah mare chare un djah glan o baro Debleste an o them Kanaan, te las maro kotar them kate ap kai rig o panjestar Jordan.”
33 Jaake das o Mose kol menshen dran o kheer Gad un dran o kheer Ruben un ko paash kol menshendar dran o kheer Manasse, kai o Josefeskro tchawo his, ko them, kai o Sihon o baro rai pral i Amorarja his un ko them, kai o Og o baro rai pral Bashan his. Job das len o tselo them un kol forja koi dren.
34 Un i mursha dran o kheer Gad kran kol forja Dibon, Atarot, Aroer, 35 Atrot-Shofan, Jaser, Jogboha 36 Bet-Nimra un Bet-Haran, halauter sorele forja; un jon tchiwan barra pre trul kol platse, kai lengre bakre hi.
37 I mursha dran o kheer Ruben kran kol forja Heshbon, Elale, Kirjatajim, 38 Nebo, Baal-Meon un Sibma un dan kol forjen, kai jon kran, newe laba.
39 Un i mursha dran o kheer Machir, koleskro dad o Manasse his, djan an o them Gilead, kuran pen kol menshentsa koi, lan ko them penge un tradan kol Amorarjen krik, kai koi dren djiwan. 40 Koi das o Mose ko murshes Machir ko them Gilead, un job djiwas koi.