30
Har te rikrell jek peskri sowel
1 Un o Mose penas kol Israelenge halauter, hoi o baro Dewel leske penas. 2 Un o Mose rakras lengre pralstunentsa, un penas: Kawa hi kowa, hoi o baro Dewel kamell, te krenn tumer kowa. 3 Te penell jek ap o baro Debleste: “Me dau miro lab, te krap kawa te kowa” oder tchiwell glan leste i sowel tele, palle hunte phagell job gar peskro lab un hunte krell halauter, hoi job penas.
4 Te hi i djuwel kote, kai penell ap o baro Debleste: “Me dau man sowel, te krap kawa te kowa”, jaake rah joi an ko kheer lakro dadeste hi, un joi gar romedino hi, 5 un lakro dad shunas lakro labestar, hoi joi o Debleste das, un job penas tchi koi pre, palle hunte rikrell joi halauter, kai das li pes sowel pre. Un halauter, hoi las li ap peste, hunte rikrell li ninna. 6 Te kamell lakro dad kowa gar an ko diwes har job kolestar shunas, palle hunte rikrell joi gar, hoi das li pes sowel, un hoi joi las ap peste. Un o baro Dewel djinell, kai lakro dad gar kamas te krell joi kowa, un job hidjrell lake tchi palla.
7 Te romedinerell joi, un ap late hi i sowel tchiddo, ninna te das li pes sowel un djinas gar, hoi joi penella, un pandas pes jaake ap kowa, hoi joi penas, 8 un lakro rom penell tchi koi pre ap ko diwes, kai shunell lo kowa, palle hunte rikrell joi peskri sowel, un hunte krell, hoi li ap peste las. 9 Te kamell lakro rom kowa gar ap ko diwes, kai job kowa shunas, palle hunte rikrell joi koi sowel gar dren, hoi ap late tchiddo hi, witar gar ko lab, ap koleste pandas li pes. Un o baro Dewel hidjrell lake tchi palla.
10 Koi sowel, hoi das i romni, kolakro rom meras, ninna i djuwel, kai muklo was, halauter, hoi joi ap peste las, hunte rikrell joi.
11 Te dell i djuwel peskro lab an ko kheer peskro romestar, te krell li tchomone o Debleske, un dell pes koi pre sowel, 12 un lakro rom shunell kowa, un penell tchi koi pre, un penell gar, te hunte krell joi kowa gar, palle hunte rikrell li halauter, ap hoi joi pes sowel das. 13 Te penell lakro rom, te krell li kowa gar, ap hoi das li pes sowel, ap ko diwes, kai job kowa shunas, palle hunte rikrell li gar peskri sowel un peskro lab. Un o baro Dewel hidjrell lake tchi palla. Job djinell, kai lakro rom kowa gar kamas.
14 Lauter, kai i djuwel peskro lab pre das, ninna lakre tsele sobja, kolentsa joi penas, te rikrell li pes pale tchomonestar, nai hadell lakro rom pre oder mukell kowa jaake. 15 Te penell job tchi koi pre bis ap ko wawar diwes, sikrell job, te nai krell li kowa, ap hoi joi pes sowel das, un hoi joi ap peste las. 16 Te shunas job kowa, un hadas kowa pal jek tsiro pre, hunte hidjrell job lakri doosh.
17 Kolla hi kol laba, hoi o baro Dewel o Moseske penas, har te well mashkral o mursheste un i djuwjate, mashkral o dadeste un i tchate, jaake rah har koi tchai gar romedino hi un djiwell an lakro dadeskro kheer.