22
O baro rai Balak kamell, te rakrell o Bileam i bibacht win pral i menshende Israel
1 Pal kowa djan i Israelitarja dureder, un djiwan an ko telstuno them pash o pani Jordan, kai i Moabarja djiwan, ap i wawar rig o forestar Jericho. 2 Un o Balak, koleskro dad o Zippor hi, dikas halauter, hoi o Israel ap kol Amorarja kras. 3 Un kol Moabarjen his bari daar kol menshendar Israel, kai jaake bud his. Un kol Moabarja trashan lendar. 4 Un jon penan ap kol phurende mank kol Midianarja: “Kanna chan kol tsele menshe halauter pre, hoi trul mende hi, har i grumni koi senlepen ap i phub pre chala.”
O Balak his an ko tsiro o baro rai pral i Moabarja. 5 Un job bitchras murshen pash o Bileam, koleskro dad o Beor hi. O Bileam djiwas mank peskre menshende an o foro Petor, kai pash ko pani Eufrat tchiddo hi. O baro rai mukas leske te penell: “Am pash mande! I bari natsjona djas dran o them Egiptia win un hi kate an o tselo them. Kal menshe tchiwan pengre plachtene khera pre ap i wawar rig mandar. 6 Un jon hi sorleder har mer. Am kanna ap miri rig! Rake i bibacht win pral kal menshende! Nai well jaake, kai marau len, un tradau len dran kau them win. Me djinau: Pral koneste tu rakreh i bacht win, ap koleste hi i bacht tchiddo. Un pral koneste tu rakreh i bibacht win, ap koleste hi i bibacht tchiddo.”
7 Un i phureder kol menshendar Moab un Midian djan khetne pash o Bileam. Un lowe his an lengre wasta o durkepaske. Un jon wan pash leste, un penan leske kol laba, hoi o Balak penas. 8 Un o Bileam penas ap lende: “Atchenn kai pral i rati! Jaake kamau me tumenge te penell, har o baro Dewel mange kowa penella!”
Koi atchan kol pralstune pral i Moabarja pash o Bileam.
9 Un o baro Dewel was pash o Bileam, un penas: “Koon hi kol menshe, kai pash tute hi?”
10 O Bileam penas ap o baro Debleste: “O Balak, koleskro dad o Zippor hi, ko baro rai pral kol Moabarja bitchras len pash mande un mukas mange te penell: 11 ‘I bari natsjona was dran o them Egiptia kate, un hi an o tselo them. Am ap miri rig un rake i bibacht win pral kal menshende! Nashte well jaake, kai kurau man lentsa, un tradau len.’”
12 O Dewel penas ap o Bileam: “Ma dja lentsa! Ma rake i bibacht pral kol menshende win! Miri bacht un soor hi ap lende tchiddo.”
13 Koi stas o Bileam taissarlake pre, un penas ap kol pralstunende, kolen o Balak bitchras: “Djan an tumaro them pale! O baro Dewel kamell gar, te djap me tumentsa.”
14 Un kol pralstune pral kol Moabarja djan pale, un wan pash o Balak, un penan: “O Bileam kamas gar mentsa te djal.”
15 Koi bitchras o Balak budeder un an-dikleder pralstunen har kolla his, pash o Bileam. 16 Har kolla pash leste wan, penan le ap leste: “Jaake mukell tuke te penell o Balak, koleskro dad o Zippor hi: Muk tuke tchi an o drom te tchiwell, te wess pash mande! 17 Me kamau tuke brawlepen te dell. Un hoi tu mange peneh, kamau me te krell. Am ap miri rig un rake i bibacht win pral kal menshende!”
18 O Bileam penas ap kolende, kai bitchras o Balak: “Ninna te dell man o Balak peskro kheer pherdo rup un sonakai, nai tchiwau me gar i lab ap i rig, hoi well o baro Deblestar, kai miro Dewel hi – gar an i tikno koowa, witar gar an o baro koowa. 19 Atchenn ninna tumer kai rati pash mande, te djinap me, hoi o baro Dewel mantsa rakrella!”
20 Koi was o baro Dewel an i rati pash o Bileam, un penas ap leste: “Wan kol mursha, te denn jon tut gole, te djas lentsa, palle dja lentsa!”
O Bileameskri burika rakrell
21 Koi stas o Bileam taissarlake pre, un tchiwas i ledertikri plachta ap peskri burikaa un djas kol pralstunentsa pral kol Moabarja.
22 Koi was o Dewel chojedo koi pral, kai job lentsa djas. Un o bolepaskro o baro Deblestar djas leske an o drom, te rikrell lo les pale. Un o Bileam his beshdo ap peskri burika. Un dui budepangre djan leha. 23 Un koi burika dikas o baro Debleskro bolepaskro ap o drom tardo i chareha an o wast. Un koi burika djas o dromestar tele, un djas ap i kotar phub. O Bileam das lat, te anell job lat pale ap ko drom.
24 Koi was o baro Debleskro bolepaskro ap ko drom mashkral kol drakengre berge, kai ap kol dui rigja massurja his. 25 Un har koi burika o baro Debleskro bolepaskres dikas, djas joi jaake dur ap i rig, te was o Bileameskri heri dukedo ap kol massuri. Un job das lat o duito kopo.
26 Koi djas o baro Debleskro bolepaskro dureder, un was pale kote ap o drom, kai gar buchlo his, kai kek platsa his, te djas job nai tchatches, witar gar serwes. 27 Un har koi burika o baro Debleskro bolepaskres dikas, tchiwas pes li tele. Un o Bileam his pre-beshdo. Koi tapras o Bileames i choli. Un job das koi burika i kashteha. 28 Koi kras o baro Dewel koi burikake o mui pre. Un joi penas ap o Bileam: “Hoi krom me tut, kai dal tu man triin kope?”
29 O Bileam penas ap i burika: “Tu rikral man dineleske! Te wals man kanna i charo an o wast, doms tut mulo.”
30 Koi burika penas ap o Bileam: “Hom me gar tiri burika, kai tu beshal pre tiro tselo djipen? Krom me jaake tuha glan ko tsiro?” Job penas: “Na-a!”
31 Koi kras o baro Dewel o Bileameske i jaka pre, kai nai dikas job o baro Debleskro bolepaskres ap o drom tardo i chareha an o wast. Un o Bileam tchiwas pes ap peskre tchanga tele un witsras pes ap peskro mui.
32 Un o baro Debleskro bolepaskro penas ap leste: “Hoske dal tu tiri burika triin kope? Dik, me wom pash tute, te rikrap tut pale. Tiro drom, hoi tu djah, hi gar mishto an mire jaka. 33 Un koi burika dikas man, un djas peske triin kope mandar. Te djals joi gar mandar, jaake doms me tut mulo. Un koi burika mukoms te djiwell.”
34 Koi penas o Bileam ap o baro Debleskro bolepaskro: “Me anom doosh ap mande. Me djinom gar, kai tu kamal man pale te rikrell ap o drom. Un kanna, te hi kowa tuke gar mishto, jaake djau me pale pale.”
35 O baro Debleskro bolepaskro penas ap leste: “Dja kol murshentsa! Ma rake wawar koowa har me tuke penau!” Jaake djas o Bileam kol pralstunentsa, kai o Balak bitchras.
O Bileam rakrell i bacht pral o Israel win
36 Har o Balak shunas, kai o Bileam was, djas job pash leste an o foro Ar, kai pash o pani Arnon tchiddo hi, – kote kai weh an o them Moab. 37 Un penas ap leste: “Bitchrom me gar murshen pash tute un mukom tut te kharell? Hoske wal tu gar pash mande? Patseh tu gar, kai me nai dau tut brawlepen?”
38 Penas o Bileam ap leste: “Ake hom. Shun, me nai rakrau tchi wawar har kowa, hoi mange o baro Dewel an o mui tchiwas. Kowa kokres nai rakrau me.”
39 Jaake djas o Bileam o Balakeha. Un jon wan an o foro Kirjat-Huzot. 40 Un o Balak maras grumjen un bakren o Debleske, un bitchras ko massestar pash o Bileam, un pash kol pralstunende, kai pash leste his.
41 Un taissarlakro las o Balak o Bileames peha, un anas les pral ap i berga Bamot-Baal, te dikell job kotar ap kol tsele menshende Israel.