10
I bare phurdepangre
1 Un o baro Dewel rakras o Moseha un penas: 2 Kre tuke dui phurdepangrea dran latcho rup! An kolende well dren phurdedo, te kameh tu, te wenn i tsele Israelitarja khetne, ninna te hunte djan le dureder. 3 Un te phurdenn le kol dujentsa, hunte wenn i tsele Israelitarja pash tute khetne glan o Debleskro kheer. 4 Te phurdenn le ap jekeste, hunte wenn kolla pash tute, kai hi pralstune pral kol bud serja menshende an Israel. 5 Te phurdenn tumer soreles, hunte stenn kolla pre, kai hi lengre platsa kote, kai i kham pre djala, te djan le dureder. 6 Un te phurdenn tumer o duito kopo soreles ap i phurdepaskri, hunte stenn kolla pre, kai hi lengre platsa kote, kai i kham tato hi, te djan le dureder. Jaake djinenn le: Te well soreles phurdedo, hunte djan jon dureder. 7 Te kamenn, te wenn i tsele Israelitarja khetne, hunte phurdenn gar soreles.
8 Kol rashaja, o Aroneskre tchawe, hi kolla, kai hunte phurdenn an i phurdepangre. Kowa hunte atchell jaake tumenge un tumare tchawenge hako tsireske.
9 Te perenn wawar menshe an tumaro them dren un kamenn rai pral tumende te well, un tumer djan an o kurepen, te kurenn tumen lentsa, palle hunte phurdenn soreles an i phurdepangre, te wenn tumer tumaro baro Debleske an o shero. Un job lell tumen win dran lengre wasta.
10 Phurdenn ninna an i phurdepangre ap kol bare diwessa, kai han tumer bachtelo, un ap ko diwes, kai well i newo tchon, un kai tumer o baro Debleske viechen anenn, sawe, hoi tumer leske tseles chatchrenna un sawe, hoi chan tumer glan leste khetne. Palle wenn tumer mange, tumaro Debleske, an o shero. Me hom tumaro baro Dewel.
I Israelitarja djan dureder
11 Ap o biishto diwes an o duito tchon an o duito bersh hadas pes koi bari wolka, hoi pral o Debleskro kheer his, kai o Debleskre deesh laba dren hi. 12 Un kol Israelitarja djan dran ko mulo tato them Sinai. Un koi wolka djas glan lende un atchas tardo an ko mulo tato them Paran.
13 Kowa his o ersto kopo, kai djan le jaake dureder har o baro Dewel kowa ap o Moseste penas: 14-16 Kol menshe dran o kheer Juda his i glanstune, kai djan win. Lengro pralstuno his o Nachshon, koleskro dad o Amminadab hi. Lentsa djan kol menshe dran o kheer Issachar un dran o kheer Sebulon. I pralstuno pral o kheer Issachar his o Netanel. Leskro dad hi o Zuar. Un o pralstuno pral o kheer Sebulon his o Eliab. Leskro dad hi o Helon.
17 Palle kran jon o Debleskro plachteno kheer tele. Un kol menshe dran i familje Gershon un Merari djan un hidjran ko plachteno kheer. 18-20 Pal lende djan kol menshe dran o kheer Ruben. Lengro pralstuno his o Elizur, koleskro dad o Shedehur hi. Lentsa djan kol menshe dran o kheer Simeon un dran o kheer Gad. O pralstuno pral o kheer Simeon his o Shelumijel, koleskro dad o Zurishaddai hi. Un o pralstuno pral o kheer Gad his o Eljasaf, koleskro dad o Deguel hi.
21 Pal lende djan kol Kohatarja, un hidjran ko koowa o Debleskro plachteno khereske. Kau kheer hunte was pale pre-tchiddo, bis te kol Kohatarja pal wan.
22-24 Pal lende djan kol menshe dran o kheer Efrajim. Lengro pralstuno his o Elishama, koleskro dad o Ammihud hi. Lentsa djan kol menshe dran o kheer Manasse un dran o kheer Benjamin. O pralstuno pral o kheer Manasse hi o Gamalijel, leskro dad hi o Pedazur. Un o pralstuno pral o kheer Benjamin his o Abidan, leskro dad hi o Gidoni.
25-27 Pal lende djan kol menshe dran o kheer Dan. Lengro pralstuno his o Ahijeser, koleskro dad o Ammishaddai hi. Lentsa djan kol menshe dran o kheer Asser un dran o kheer Naftali. O pralstuno pral o kheer Asser his o Pagijel. Leskro dad hi o Ochran. Un o pralstuno pral o kheer Naftali his o Ahira, koleskro dad o Enan hi. 28 Hako kopo, kai djan i Israelitarja dureder, kran le les jaake.
O Mose mangell peskri romjakro phralestar, te well lo lentsa
29 Un o Mose penas ap peskri romjakro phraleste, o Hobab, koleskro dad o Reguel hi dran o them Midian: “Mer djah an ko them, hoi o baro Dewel penas: Me dau kowa tumende. Kanna, ab mentsa! Palle krah tuke latcho koowa. O baro Dewel penas: Me kamau latchepen te krell ap o Israel.”
30 Koi penas o Hobab: “Me kamau gar tumentsa te djal. Me kamau an miro them un pash mire menshende te djal.”
31 O Mose penas: “Dja gar krik mendar, tu djineh i platse an o mulo tato them, kai mer nai djiwah. Tu nai sikreh menge o drom. 32 Un te djah tu mentsa, krah mer tuke o latchepen, hoi o baro Dewel ap mende krella.”
33 Jaake mukan le o baro Debleskri berga pal pende un djan triin diwessa dur. Un kolla, kai hidjran o sonakaskro mochton, kai o baro Debleskre deesh laba dren hi, djan glan lende un sikran lende, kai atchenn le tardo. 34 Un ap o diwes, har djan le dureder, his o baro Debleskri wolka pral lende.