23
Bare diwessa pash i Israelitarja, kai rikrenn le dren o baro Debleske
1 O baro Dewel penas ap o Mose: 2 Pen ap i Israelitarja: Kalla hi i bare diwessaa, kai wenn tumer khetne, te well o baro Dewel sharedo.
O Debleskro diwes
3 Rikrenn o Debleskro diwes! Shob diwessa budrenn, ap o eftato diwes krenn kek budi! Ko diwes hi o baro Debleske. Ap leste awenn khetne glan leste! Ap kau diwes krenn kek budi, kai tumer ninna djiwenna!
O baro diwes, hoi kharell Passa, un kol diwessa, kai chan le kek shutlo maro
4 Kalla hi i bare diwessa, kai wenn tumer khetne, te well o baro Dewel sharedo. Denn kal diwessa win gole ap pengro tsiro. 5 Ap o 14. (deesh-te-starto) diwes an o ersto tchon, har o kham tele djas, well ko diwes, hoi hi o baro Debleske. Kau diwes kharell Passa. 6 Un o 15. (deesh-te-pantchto) diwes ninna an ko tchon, hi ko ersto diwes kol diwessa, kai hunte chan kek maro dran shutlo jarro. Efta diwessa chan tumer kek maro, an koleste shutlo jarro hi. 7 Ap o ersto diwes hunte wenn khetne glan o baro Debleste. Kek hunte budrell ap ko diwes. 8 Efta diwessa chatchrenn viechen o baro Debleske. Ap o eftato diwes hunte wenn pale khetne, te well o baro Dewel sharedo. Ap ko diwes hunte krenn witar kek budi.
O diwes, kai o newo djob o Debleske anlo well
9 O baro Dewel penas ap o Mose: 10 Pen ap i Israelitarja: Te wenn an ko them, hoi me tumen dau, un tumer tchinenn o newo djob tele un pandenn les khetne, palle anenn ko ersto pandepen newo djob glan o rashajeste. 11 Job hadell kowa pre glan o baro Debleste, te sikrell lo, kai kowa o Debleske hi. Palle dikell o baro Dewel latches ap tumende. Kowa krell o rashai ap o diwes pal o Debleskro diwes. 12 Ap ko diwes, kai hadell o rashai tumaro newo djob pre glan o Debleste, hunte anenn tumer i terno bakro, hoi jek bersh phuro hi un sasto hi, te well lo chatchedo o baro Debleske. 13 Koi pashel anenn glan leste dui-te-paash kilogramme latcho jarro, kai djet dren hi. Kau chapen well leske chatchedo. Un ko latcho sungepen, hoi well win, sungella mishto o baro Debleske. Koi pashel anenn jek litari mool, hoi well win tchoredo glan leste.
14 Chan kek maro dran o newo djob, witar gar peklo djob oder terno djob, bis te anan tumaro Debleske leskro kotar kolestar. Kau lab hi tumenge un tumare tchawenge, kai pal tumende wenna, kanna un hako tsireske, kai tumer ninna djiwenna.
Kol bare diwessa, hoi kharenna Fingsta
15 Efta tsele kurkeb pal ko Debleskro diwes, kai anas o rashai tumaro newo djob o baro Debleske, 16 ap ko diwes pal o eftato Debleskro diwes – kowa hi o 50. (paash-sheelto) diwes – anenn tumer i newo chapen o baro Debleske. 17 Haki familja anell dui mare, hakeno kerdo dran dui-te-paash kilogramme latcho jarro. Kol dui mare hadell o rashai pre glan o baro Debleste, te sikrell lo, kai kolla leske hi. Kal mare hi peklo jarreha, kai shutlo jarro dren hi. Kal mare, hoi o baro Debleske anlo wenn, hunte wenn kerdo dran newo gibc. 18 Pash ko maro anenn tumer efta bakre, jek bersh phuro un sasto, ninna jek terno gurum un dui mursh bakre. Kolla wenn maredo un chatchedo o baro Debleske. Khetne lentsa well leske o chapen dran jarro chatchedo, un i mool glan leste win tchoredo. Un ko latcho sungepen, hoi well win, sungella mishto o baro Debleske. 19 Koi pashel anenn leske i mursh busni, te well tumari doosh un tumaro pale-tchiddo koowa krik lino. Marenn ninna dui bakre, hoi jek bersh phuro hi, te chan len khetne glan o baro Debleste. 20 O rashai hadell kolen pre glan o baro Debleste, ninna kol mare dran o newo jarro, te sikrell lo, kai jon o baro Debleske hi. Un i rashaja nai chan kowa. 21 Denn win gole, te wenn khetne ap kau diwes o baro Debleske. Kek budi hunte krenn tumer ap ko diwes. Kau lab hi tumenge un tumare tchawenge, kai pal tumende wenna, kanna un hako tsireske, kai tumer ninna djiwenna.
22 An ko tsiro, kai tchinenn o djob tele, hoi ap tumaro kotar phub bares was, mukenn tchomone ap i rigja tardo. Ma djan witar gar i duito kopo pral ko kotar phub, te hadenn kowa pre, hoi tele peras. Mukenn kowa i tchorwelenge un kolenge dran i wi-them! Me, o baro Dewel, hom tumaro Dewel.
O phurdepangro diwes
23 O baro Dewel penas ap o Mose: 24 Pen ap i Israelitarja: Ko ersto diwes an o eftato tchon hunte well tumen sawo diwes, kai budrenn gar. Ap ko diwes phurdenn an i phurdepangre, un awenn khetne glan o baro Debleste. 25 Krenn kek budi, un anenn o baro Debleske viechen un chapen, hoi well leske chatchedo ap leskri chatchepaskri.
O diwes, kai well halauter krik lino, hoi mank i menshende un lengro Debleste tardo hi
26 O baro Dewel rakras o Moseha un mukas les i Israelenge te penell: 27 O deshto diwes an kau eftato tchon hi o diwes, kai well halauter krik lino, hoi mank tumende un o baro Debleste tardo hi. Ap ko diwes chan tchi un awenn khetne glan leste un anenn leske viechen un chapen, hoi wenn leske chatchedo. 28 Kek budi krenn ap ko diwes! Kau diwes hi o diwes, kai well halauter krik lino, hoi mank tumende un tumaro baro Debleste tardo hi. 29 Hakeno, koon rikrell pes gar pale o chapastar, kowa well pale-tchiddo hako tsireske, un nai djiwell buder gar mank peskre menshende. 30 Un hakeno, kai budrell ap ko diwes, koles mukell o baro Dewel te merell. 31 Doleske, krenn kek budi! Kau lab hi tumenge un tumare tchawenge, kai pal tumende wenna, kanna un hako tsireske, kai tumer ninna djiwenna. 32 Kau diwes hi i baro diwes tumenge, kai hunte krenn kek budi, un chan tchi fun rati ap o enjato diwes bis te well pale rati ap o wawar diwes.
I diwessa, kai djiwenn i Israelitarja an patjengre khera
33 O baro Dewel penas ap o Mose: 34 Pen ap i Israelitarja: An o eftato tchon hi kol bare diwessa, kai djiwenn tumer an patjengre khera efta diwessa, te well o baro Dewel sharedo. Ko ersto diwes hi o 15. (deesh-te-pantchto) diwes an kau tchon. 35 Ap kau diwes awenn khetne glan o baro Debleste! Kek budi hunte krenn tumer. 36 Efta diwessa anenn viechen o baro Debleske, te wenn le leske maredo un chatchedo. Ap o ochtato diwes awenn pale khetne glan o baro Debleste, un marenn un chatchrenn viechen leske. An kal bare diwessa wenn tumer khetne o baro Debleske, un hunte krenn kek budi.
37 Kalla hi kol bare diwessa, kai hunte wenn tumer khetne glan o baro Debleste, te anenn leske viechen un chapen, jaake har hako diweske glan tchinlo hi: sawe vieche, kai tseles chatchedo wenn, un sawe, kolen chan tumer khetne glan o baro Debleste, ninna chapen dran djob, un mool, hoi glan leste win tchoredo well. 38 Ninna rikrenn tumer hako kurko o Debleskro diwes dren! Un anenn o baro Debleske ko wawar koowa, hoi glan tchinlo hi, un kowa, hoi tumer tumendar denn, un kowa, hoi tumer sowel dan, leske te dell.
39 Ap o 15. (deesh-te-pantchto) diwes an o eftato tchon, an ko tsiro, har anan halauter dren, hoi ap tumari phub bares was, krenn efta diwessa i festo o baro Debleske. O ersto diwes un o ochtato diwes hi i diwes, kai krenn kek budi. 40 Ap o ersto diwes lenn shukar rukengre, hoi ap i ruka bares wan, ninna palmtikre patria, pappeltikre kashta pengre patjentsa un wawar kashta bud patjentsa, un awenn efta diwessa bachteles glan tumaro baro Debleste. 41 Krenn kowa leske hako bersh efta diwessa an o eftato tchon. Kau lab hi tumenge un tumare tchawenge, kai pal tumende wenna, kanna un hako tsireske. 42 Djiwenn an ko tsiro an patjengre khera, hakeno, kai an o them Israel djiwell. 43 Krenn kowa jaake, te djinenn tumare tchawe, te mukom me, o baro Dewel, i Israelitarjen an patjengre khera te djiwell, har anom len win dran o them Egiptia. Me, o baro Dewel, hom tumaro Dewel.
44 Kal tsele laba penas o Mose i Israelenge, te djinenn le har te rikrenn le kol bare diwessa dren, te well o baro Dewel sharedo.