22
Koon nai chal kolestar, hoi o Debleske anlo well?
1 O baro Dewel penas ap o Mose: 2 Pen ap o Aron un ap leskre mursh tchawende, te djan le mishto trujel ko koweha, hoi i Israelitarja mange anenn, te anenn le kek ladj ap mande. Me hom o baro Dewel. 3 Pen lenge: Kau lab hi hakeneske tumare mursh tchawendar, kai pal tumende wenna: Hakeno lendar, koles i pale-tchiddo koowa ap leste hi, un kai well pash kowa, hoi anan i Israelitarja mange, o baro Debleske, kowa nai atchell buder gar miro rashai. Me hom o baro Dewel. 4 Kones o Aroneskre tchawendar i djungelo nasslepen ap peskri hauta hi, oder koleske tchomone dran leskro murshkano mass nashell, kowa te chal gar fun ko chapen, hoi mange anlo was, bis te hi lo pale erligo. Hako rashai, koon jekes an tapras, kai kras pes i muleha pale-tchiddo, oder koleske jek tele djas, 5-6 kowa well pale-tchiddo, bis te well rati. Kowa hi ninna jaake, te tapras lo i tikno pale-tchiddo vieches an, hoi djal pral i phub, oder i menshes, kai pale-tchiddo hi, hoi kowa ninna hi. Sawo atchell pale-tchiddo, bis te well rati, un nai chal gar fun ko chapen, hoi o baro Debleske anlo well, bis te thowas lo pes. 7 Te djas o kham tele, palle hi lo pale erligo, un nai chal fun ko chapen, hoi o Debleske anlo was. Kowa hi kowa, kolestar job djiwell. 8 I mulo un khetne dandedo vieches chal lo gar, te krell lo pes koleha gar pale-tchiddo. Me hom o baro Dewel.
9 I rashaja hunte rikrenn halauter, hoi lenge penom, te lenn le kek doosh ap pende, un merenn doleske, kai djan le gar o Debleskro koowa jaake trujel, har hunte krans le. Me hom o baro Dewel, un rodom len win, te wenn le mire rashaja. 10 Kek wawar chal fun ko chapen, hoi mange anlo well, witar gar kowa, kai jek tsiro pash o rashajeste djiwell, oder kowa, kai i diwes pash o rashajeste budrell un lestar plaissedo well. 11 I budepaskro, koles o rashai peskre lowentsa ginas, kowa nai chal kolestar. Ninna i budepaskres, kai an leskro kheer boldo was, kowa nai chal fun ko chapen.
12 Te well o rashajeskri tchai i romni i murshestar, kai kek rashai hi, palle chal li gar buder fun ko chapen, hoi glan o baro Debleske anlo was. 13 Te meras lakro rom oder mukas lat, un lat hi kek tchawe, un joi djal pale an peskro dadeskro kheer, palle nai chal li fun peskro dadeskro chapen jaake har kras li, har li terni his. Kokres kolla dran o rashajeskri familja nai chan fun ko chapen, hoi o baro Debleske anlo was.
14 Te chas i wawar kolestar, hoi i rashajeske hi, un djinas kowa gar, hunte dell lo ko chapen o rashajeste pale, un gomme o pantchto kotar pashel. 15 I rashaja hunte mukenn kek wawares kolestar te chal, hoi mange, o baro Debleske, dino was, un kokres i rashaja nai chan. 16 Te mukenn le wawar Israelitarjen kolestar te chal, anenn le bari doosh ap i Israelitarjen. Me hom o baro Dewel. Un kowa, hoi i Israelitarja mange anenn, hi kokres mange.
Har i vieche hunte wenn, kai o Debleske anlo wenn
17 O baro Dewel penas ap o Mose: 18 Pen ap o Aron un ap leskre mursh tchawende, un ap i tsele Israelitarjen: Hako Israelitari un hako wi-themari, kai pash tumende djiwell, un kai kamell o baro Debleske i vieches te anell, te well kowa leske chatchedo, – nai well te dell lo les pestar, nai well, te dell lo les pal kowa, hoi lo pes sowel das, 19 palle hunte rodell lo i vieches win i grumjendar, bakrendar oder busjendar, hoi i mursh hi un sasto, te dikell o baro Dewel latches ap leste. 20 Te anenn tumer leske i vieches, hoi gar sasto hi, dikell lo gar latches ap tumende.
21 Te anell jek i grumjat oder i bakres glan o baro Debleste, hoi chan i menshe glan leste – nai well i viecho, hoi lo pestar das, nai well i viecho, koleha job kamell peskri sowel, hoi job das, dren rikrell – palle hunte well ko viecho sasto, te dikell o baro Dewel latches ap leste. 22 I viecho, hoi korelo oder dukedo hi, jek, koles i phagedi heri hi, oder i dukepen oder i nasslepen ap i hauta hi, sawes ma anenn glan o baro Debleste, te chatchrenn les ap leskri chatchepaskri.
23 Grumja un bakre, kolen i lengsteder heri hi oder i tikneder heri, sau vieches nai anell jek glan o baro Debleste, te dell lo les pestar kokres. Te anell lo les, te rikrell lo peskri sowel dren, hi kowa gar latcho glan o baro Debleskre jaka. 24 I viecho koleskre jare paash dino, oder win tchinlo hi, ma anenn glan o baro Debleste! An tumaro them ma krenn sau koowa ap i viecheste! 25 Ginenn witar gar sau viecho jekestar, kai kek Israelitari hi, te anenn les glan tumaro Debleste. Sawe vieche hi buder gar bud moldo. Ap sawende dikell o baro Dewel buder gar latches.
26 O baro Dewel penas dureder ap o Mose: 27 Te well i tikni grumni, i tikno bakro oder i tikni busni boldo, palle well kau ternepen efta diwessa pash peskri date. Pal o ochtato diwes nai aneh les o baro Debleske, te well les leske maredo. Palle dikell lo latches ap leste. 28 Ma marenn i grumni oder i bakro un leskro ternepen ap ko emligo diwes!
29-30 Te marenn tumer i vieches o baro Debleske, te parkrenn tumen koleha pash leste, palle chan les ap ko emligo diwes, te dikell o baro Dewel latches ap tumende! Ma mukenn tchomone pral bis ap o wawar diwes! Me hom o baro Dewel.
31 Rikrenn tumen ap kowa, hoi tumenge penau! Un djiwenn pal kowa! Me hom o baro Dewel. 32 Ma anenn ladj ap miro lab! Tumer, Israelitarja, hunte djinenn, te hom me kokres tumaro Dewel! Me, o baro Dewel, rodom tumen win, te wenn mire menshe, 33 un anom tumen dran o them Egiptia win, te wap tumaro Dewel, me, o baro Dewel.