14
I Egiptarja lenn i Israelitarjen palla
1 Un o baro Dewel rakras ap o Moseste un penas: 2 “Pen, te rissrenn pen i Israelitarja, un te djan le pash ko foro Pi-Hachirot mashkral Migdol un o baro pani. Glan Baal-Zefon ap i wawar rig pash o baro pani atchenn! 3 O Farao patsella palle: Jon nashran pen an o mulo them un hatsenn kek drom win. 4 Palle pandau me leskro dji, te lell lo len palla. Un me sikrau miro barepen un miri soor ap leste un ap leskre tsele lurdende. Un i Egiptarja haiwenn: Me hom o baro Dewel.”
Un i Israelitarja kran jaake har o Mose lenge penas.
5 Har o rajeske pral o them Egiptia penlo was, te nashan i Israelitarja penge, khaitas les un leskre pralstunen, te mukan le len te djal. Un jon penan: “Hoske kram mer kowa, te mukam i Israelitarja te djal? Mer nashram mare budepangren!”
6 Jaake mukas o Farao peskro kurepaskro wurdin te anell, un las peskre lurden peha. 7 Ninna las lo peskre shob-sheel feteder wurdja peha, un i tsele wawar wurdja, hoi an o them Egiptia hi. Ap hako wurdin his kurepangre tardo. 8 Un o baro Dewel pandas o Faraeskro dji, jaake te las job i Israelitarja palla, har jon i hadede wastentsa bachteles win djan.
9 Un i Egiptarja lan len palla pengre grajentsa, wurdjentsa un murshentsa. I tsele rajeskre lurde lan len palla, un dikan len, har his le beshdo pash o baro pani pash ko foro Pi-Hachirot glan o foro Baal-Zefon.
10 Har i Israelitarja pre dikan, un dikan, te lell len o Farao peskre lurdentsa palla, was i bari traash pral lende. Un jon dan ap o baro Debleste gole. 11 Un jon penan ap o Moseste: “Lal tu men doleske kai an o mulo tato them, te meras kate? His an o them Egiptia kek phub, te was mer paskedo? Hoske kral tu kowa, un lal men dran o them Egiptia win? 12 Penam tuke gar, har hams an o them Egiptia: Muk tele mendar! Mer kamah i Egiptarenge te budrell. Feteder i Egiptarenge te budrell, har kate an o mulo them te merell.”
13 O Mose penas ap i tsele menshende: “Ma darenn! Atchenn soreles! Dikenn har o baro Dewel tumen kau diwes win lell dran i wasta kol Egiptarendar! Kal Egiptarjen, kai tumer kau diwes dikenna, kolen dikenn tumer buder gar, witar gar an ko tsiro, hoi wella. 14 O baro Dewel kurell pes tumenge. Tumer hunte krenn tchi.”
15 Un o baro Dewel penas ap o Moseste: “Hoske deh tu ap mande gole? Pen ap i Israelitarja, te djan le dureder! 16 Tu, hade tiro kasht pre un tiro wast pral o baro pani, te krell lo pes pre un djal ap dui rigja. Jaake te nai djan i Israelitarja mashkral o baro pani ap i drom, hoi gar sapenes hi. 17 Me krau, te pandenn i Egiptarja pengre djia jaake, te lenn le tumenge palla. Un me sikrau miro barepen un miri soor ap o Farao, ap leskre wurdja un ap leskre kurepangre. 18 Palle dikenn i Egiptarja, te hom me o baro Dewel, te sikrom me miro barepen un miri soor ap o Farao, ap leskre wurdja un leskre kurepangre.”
19 Un o Debleskro bolepaskro, kai djal glan i Israelitarja, stas pre un djas pal lende. Un koi bari wolka glan lende hadas pes, un tchiwas pes pal lende jaake, 20 te was li mashkral i Egiptarja un i Israelitarja. Un joi his kali glan i Egiptarja. Pash i Israelitarja his li i momeli an i rat. Un i tseli rat nai wan i Egiptarja gar pash lende.
21 Un o Mose hadas peskro wast pral o baro pani. Un o baro Dewel mukas i baro sorelo ducho pral o pani te phurdell, hoi was kotar, kai o kham pre djal. Ko ducho phurdas i tseli rat. Un o baro pani djas pale. Kote, kai pani his, hi kanna phub, hoi gar sapenes hi. Un o baro pani kras pes pre, te was i drom. 22 Koi djan i tsele Israelitarja mashkral o baro pani ap i drom, hoi gar sapenes hi. Un o pani his tardo ap i tchatchi rig, ninna ap i serwi rig lendar, har bare barra trul i foro tardo hi.
23 I Egiptarja lan len palla. Un kol tsele rajeskre graja un kurepangre wurdja, ninna i lurde djan pal lende ap o drom mank o baro pani.
24 Sik taissarlakro, har o kham gomme gar pre djas, dikas o baro Dewel dran koi jagakri wolka tele ap i tsele Egiptikre lurdende un tchiwas i daar ap lende. 25 Lengre wurdja atchan an i tchik jaake te wan le phares glan. Un i Egiptarja penan: “O baro Dewel kurell pes lenge un hi ap lengri rig. Djas menge katar!”
26 O baro Dewel penas ap o Moseste: “Hade tiro wast pral o baro pani, te well o pani pale un perell ap i Egiptarja, lengre wurdja un kurepangre.”
27 Kote hadas o Mose peskro wast pral o baro pani. Un har o kham pre djas, was o pani pale un peras ap kol Egiptarja, kai ap o naashepen his. Jaake tradas len o baro Dewel mashkral an o baro pani. 28 Un o baro pani was pale pale un tchakras i tsele wurdja un kolen, kai klissan, un i tsele rajeskre lurden, kai djan lenge mashkral o pani palla. Kolendar his kek, kai pral atchas.
29 Jaake djan i Israelitarja mashkral o baro pani ap i wawar rig. Jon djan ap i drom, hoi gar sapenes hi. Un o pani his tardo ap i tchatchi rig, ninna ap i serwi rig lendar, har bare barra, hoi trul i foro tardo hi.
30 Jaake las o baro Dewel i Israelitarjen ap kau diwes win dran o wast i Egiptarendar. Un i Israelitarja dikan i mule Egiptarjen pash o baro pani tchiddo. 31 Jaake dikan le, hawi bari sorjah o baro Dewel i Egiptarjen das. Un i Israelitarja daran o baro Deblestar, un patsan, hoi penas job un o Mose, koles leskro tchatcho wast his.