13
1 Pal kowa rakras o baro Dewel ap o Moseste un penas: 2 “Hako mursh tchawo, kai hi o phureder peskri datar pash i Israelitarja, ninna pash lengre viechende, dess tu mange. Kowa hi miro.”
Bare diwessa, kai chan le kek maro, kai shutlo jarro dren hi
3-4 Un o Mose penas ap i tsele menshende: “Kau diwes an o tchon Abib djan tumer win dran o them Egiptia. Kote, kai tumer pandle budepangre hans, las tumen o baro Dewel peskro sorelo wasteha win. Rikrenn kau diwes an tumare shere! Un chan kek shutlo maro! 5 O baro Dewel das pes sowel glan tumare phurende, te dell lo tumen ko them, kai djiwenn kanna i Kanaanitarja, i Hetarja, i Amorarja, i Hiwarja un i Jebusarja. Kowa hi i them, kai hi bud thud un gwina dren. Ap ko tsiro, kai anas tumen o baro Dewel an ko them, krenn pale jaake hako bersh an o tchon Abib:
6 Efta diwessa chan tumer maro, kai kek shutlo jarro dren hi. Un o eftato diwes well i baro diwes, kai wenn khetne o baro Debleske. 7 Kol efta diwessa chan tumer maro, kai kek shutlo jarro dren hi. Un kek shutlo jarro, witar kek shutlo maro, well pash tumende diklo, kote kai djiwenna. 8 Un ap kawa diwes penenn tumer tumare tchawenge: ‘O baro Dewel anas men dran o them Egiptia win. Doleske rikrah mer kowa.’
9 Kawa well tuke har i sikepen ap tiro wast, un i sikepen mashkral tire jaka, te bistress tu kowa gar, un peness i wawarenge, har las tut o baro Dewel peskro sorelo wasteha win dran o them Egiptia. 10 Jaake rikress tu kal laba hako bersh an o emligo tsiro.
11 Ap ko tsiro, kai anas tumen o baro Dewel an o them, har job pes glan tute un tire phurende sowel das, te dell lo les tumende, – ko them, kai kanna i Kanaanitarja djiwenna, – 12 aness tu leske i tsele mursh tchawen, kai hi i phureder tchawe pengre dajendar. Ninna hako mursh viecho, hoi hi o phureder ternepen peskri datar, hi o baro Debleske. 13 Te hi ko viecho i burikakrob ternepen, hunte dess tu kowa leste gar. Tu nai deh i terno bakro. Te kameh tu kowa gar te krell, palle phage koi burikake i meen! Hako phureder mursh tchaweske maress tu i viecho.
14 An ko tsiro, hoi wella, te putchenn tutar tire tchawe: ‘Hoske kreh tu kowa?’ palle peness tu ap lende: ‘O baro Dewel las men i sorelo wasteha win dran o them Egiptia, kai hunte budram tel dawa. 15 Har pandas o Farao peskro dji un mukas men gar te djal, maras o baro Dewel an o tselo them Egiptia i tsele mursh tchawen, kai his i phureder tchawe pengre dajendar pash i menshende un ninna pash i viechende. Doleske dau me ko phureder mursh ternepen, hoi i viechestar boldo wella, o baro Debleske. Pash mire tchawende hi wawartchandes. Hako phureder mursh tchaweske marau i viecho.’
16 Kawa well tuke har i sikepen ap o wast un mashkral tire jaka, te bistress gar, te las men o baro Dewel peskro sorelo wasteha dran o them Egiptia win.”
O baro Dewel djal glan peskre menshende
17 Un har mukas o Farao i menshen te djal, anas len o baro Dewel gar mashkral o them, kai i Filistarja djiwenn, ninna te his kau drom o tikneder. O baro Dewel penas peske: “Te dikenn i Israelitarja, kai hunte kurenn le pen, nai khaitals len kowa. Un jon kamenn pale pale an o them Egiptia te djal.” 18 Doleske mukas lo len i baro drom trul o Filistarengro them te djal. Ko drom anas len an o mulo tato them pash ko baro pani, hoi kharella ‘Baro Lolo Pani’. Un i Israelitarja djan penge dran o them Egiptia jaake har te djan le an o kurepen.
19 O Mose las o Josefeskre kokale peha. Har o Josef meras, penas lo ap peskre phralende: “O Dewel bistrell tumen gar un lell tumen win dran kau them. Denn tumen sowel, te lenn palle ninna mire kokale tumentsa.”
20 Un jon mukan o foro Sukkot un djan dureder un wan an Etam, kai pash o mulo tato them tchiddo hi un atchan kote i tsiro. 21 O baro Dewel djas glan lende ap o diwes an i bari wolka, te anell lo len ap o tchatcho drom, un rati an i bari jag, te well lenge i momeli, jaake te nai djan le ap o diwes un ninna an i rat. 22 Un koi wolka djas peske gar, un atchas glan lende ap o diwes. Un koi jag djas peske gar lendar an i rat.