Labengro Liil S

Sadduzarja Kolla patsan kokres ap kowa, hoi an o Moseskre lila tchinlo hi. Jon kaman tchi kol wawar phure labendar te djinell, hoi i gosewe tchinepangre koi pashel tchinan. I Sadduzarja his lauter rashaja un pralstune. Jon patsan gar, kai o Dewel i mulen djido krella.

Salomeskri bari isema

I bari rigjakri isema pash o Debleskro baro kheer. Koi isema his kharedo pal o baro rajeste Salomo.

Samaria O them Samaria his pash o them Israel tchiddo. I tsele biboldenge his i Samaritarja pale-tchiddo. Kek biboldo djals an o them Samaria dren.

Sergio Paulo Kowa his i Remarjengro baro rai an o them Cipria trul o bersh 47 pal o Jesus Kristo.

Siro-Fenicia Kau them hi kau diwes o Libanon.

Sodom un Gomorra Kolla his dui forja an o them Kanaan. I menshe an kal forja his jaake tchilatcho, te mukas o Dewel jag dran o bolepen ap kol forja tele te perell. Jaake chatchran kol forja, un i menshe meran.

Sonakaskro bob (Gadjkenes: goldener Rauchopferaltar)

O sonakaskro bob his tardo an i glanstuni isema an o Debleskro kheer. Ap o sonakaskro bob was gudlo kasht chatchedo, hoi mishto sungella. Har i Israelitarja an o mulo them trujel djan, his o sonakaskro bob an o Debleskro plachteno kheer tardo, hoi i Israelitarja lentsa hidjran. Pal ko tsiro his o sonakaskro bob an o Debleskro baro kheer an o foro Jerusalem tardo.

Stepangre

Stepangre his i chapen tchorwele menshenge (dik: Marko 1:6).

Stoikarja Kolla his gosewe grichtikre mursha. Lengro sikepaskro his o grichtikro mursh Zenon (trul o bersh 300 glan o Jesus Kristo). I Stoikarja patsan, kai kolla lauter, kai kran o latchepen, djiwenn i bachtelo djipen.

Sukkot (Gadjkenes: Laubhüttenfest) Kolla hi efta bare diwessa, hoi kharenna ap hebretikes Sukkot. An kol diwessa djiwan i bibolde an tikne khera kerdo dran kashta un patria. Un lenge was an o shero, har las len o Dewel glan i rah tsiro dran o them Egiptia win, un har djiwan lengre phure an o mulo them an tikne plachtene khera.