Ras phuhz lan Barnabas kaar Saul
13
Tuhz cumz caoh weng Antioc ne maang ihz taangz phraz keui, sra keui. Keuh keu diz naeh Barnabas, Simeon an ihz raak Niker, Lusius an naeh ihz prih Siren, Manaen an naeh kuanz bohz khunz prih hawkz Herot Antipas, boh Saul.
2 Meuz keuh yeung koz kwaai Caoh Phraz, kaerz seum suamz ne Khuanz Seu Ngamz daz keuh nahz, “Ras leh khawz khawz Barnabas boh Saul aez kaar cih kaanz kaai an Ohz raak keui raez.”
3 Keuh kaerz seum suamz suz tawngz, leh tihz daehz taangz lang kol kaar, plawiz kaar lan.
Rawz traz tuhz klunz Siprus
4 Khuanz Seu Ngamz phuhz kaar lan weng Seleukia, tae leh weng an diz kaar tumz ceun luang longz lan klunz Siprus.
5 Meuz kaar phraeoz weng Salamis ne rawz mony reu ma Phraz Pen Caoh tawiz crawp rawz traz Yio. Yohn Markus naeh kawmz kaar rae aez kawr kaar.
6 Keuh khahz lan sirz tuhz klunz ne phraeoz weng Paphos. A diz keuh awlz ihz Yio hawkz, hnhz naeh ihz taangz phraz an plawmz, naeh ihz mawz phiz, mus hnhz daz Bar-Yesuhz.
7 Hnhz naeh kawmz khunz prih Serkius Paulus an maang reung dengz mas heungz. Khunz an diz sunz teuk ngarz mony reu ma Phraz Pen Caoh rae hnhz paangz leh Barnabas boh Saul.
8 Keuiz daz Bar-Yesuhz naeh tahz mawz phiz, mus Krik hnhz daz Elimas ne nam sunz aez khunz prih yum rae kan keuh.
9 Meuz ceun diz Saul an ihz raak hnhz Paul ne neuk tang Khuanz Seu Ngamz rae, yawt tawz tawz Elimas rae,
10 daz hnhz nahz, “Mih naeh kuanz Manaat, naeh raan su an rak klawhz meoz, naeh taw an kaoz boh an raai. An Phraz Cen Cen daz keu sangz ne mih khatz phawmz cih aez wot tikz tikz, maat trohz lawh haz?
11 Seu ni Phraz Cen Cen ngaz aez mih nahz taam, aez ngaai mih lapz thanz paw nam awlz an thaangz seu ngihz ceu nawhz taan taan.”
Meuz diz luat an mo boh an bimz klaez sapz kaai hnhz rae panz khahz, aez ihz botz tihz daehz.
12 Meuz khunz prih awlz lawng an diz ne yum, kawp daz hnhz sangz baaiz traz Caoh Phraz.
Weng Antioc tuhz prih Pisidia
13 Paul boh bohz raen keui tae leh weng Paphos tumz ceun luang lan weng Perka tuhz prih Pamphilia. Yohn Markus praasz lan kaar weng cu weng Yerusalem.
14 Kaar lae truz thaz weng Perka phraeoz weng Antioc tuhz prih Pisidia, kaai seu ngihz kam sinz ne kut keu dez tuhz crawp rawz traz.
15 Meuz a wa rawz kyaamz sinz Moses boh kyaamz ihz taangz phraz keui ne, ihz mawh crawp keui cao ihz truz lao kaar nahz, “Kuanz mai keui aez, beuk paarz maang mony reu ma sunz aez keum rang ihz nahz kaw, lao bawnz boh.”
16 Paul kaw ceng, plaez tihz daehz daz keuh nahz,
“Teuk ngarz raez, kuanz mai Israel boh pehz an doz suamz Phraz keui.
17 Phraz Pen Caoh kheuz Israel ras leh ihz keu daehz keu daepz ehz, sangz daz keuh naeh ihz seuk laek tuhz prih Ekip kaw, cih aez keuh penz ihz ceu kheuz mawh. Tang taanz khoz mawh Daehz leh plaez keuh thaz prih Ekip,
18 nyeun keuh tuhz ruk ruk ponz kawlz wit.
19 Hnhz ya thengz ihz pulz kheuz tuhz prih Kanaan rae aez ihz keu daehz keu daepz ehz nahz a moi prih keu tehz an diz,
20 ponz peur ya plawi hanz kawlz wit. Waaiz an diz Hnhz aez ihz tatz traz keui nahz taw phraeoz co ihz taangz phraz Samuel.”
21 Waaiz an diz, keuh maanyz Samuel aez daehz maang khunz, Phraz Pen Caoh aez keuh nahz Saul an naeh kuanz Kis, naeh kheuz Benyamin. Saul penz khunz keuh ponz kawlz wit.
22 Phraz Pen Caoh plut khunz Saul aez Dawit penz khunz boh. Kaai hnhz ne Phraz Pen Caoh daz, “Ohz a wa awlz Dawit kuanz Yesse naeh ihz an Ohz trohz phawmz boh an Ohz cao cih naehz kaw hnhz ngaz cih.”
23 Tawiz keu tih Phraz Pen Caoh naeh mok ne, Hnhz aez Yesuhz naeh Tahz Khyawt kheuz Israel, tuhz ceu kheuz khunz Dawit.
24 Meuz Tahz Yesuhz maat truz ne Yohn samz rawz traz aez kheuz Israel hacz aamz keui caanz reung dengz kawi rae aez keuh leh teuk sruz.
25 Meuz Yohn cih kaanz Phraz ngaz wa ne hnhz daz ihz keui nahz, “Pehz thaang ohz naeh yaeh? Ohz nam anz tahz an diz. Keuiz daz teuk ngarz raez. Tahz an diz truz thaz puatz ohz, ohz nam theukz khawz tang nuarz cawng khlapz Hnhz.”
26 “Kuanz mai an naeh kheuz Abraham boh ihz nam anz kheuz Yio an doz suamz Phraz Pen Caoh keui aez, traz reung dengz khyawt an ni a wa phraeoz tawz ehz.
27 Ihz weng Yerusalem boh ihz peur aacz keuh keui nam mas Yesuhz naeh Tahz khyawt. Keuh nam loz phawmz kyaamz ihz taangz phraz an rawz boh klawhz sinz rae, keuh maap aez Tahz an diz yam, naeh ceun ihz taangz phraz lao mok teuk aacz ne a wa penz truz.
28 Keuh nam awlz reung dengz kawi trohz yam kaw keuh cao khunz Pilat aez piamz Hnhz.
29 Meuz keuh cih Hnhz ceun kyaamz lik taemz mok ne, keuh leh peun cur Hnhz thaz lakz klawngz klaengz, mok tuhz tham peun lu.
30 Keuiz daz Phraz Pen Caoh aez Hnhz meu rae imz thaz reung dengz yam.
31 Hnhz kaw plaez toz Daehz heungz seu ngihz baaiz kaai ihz an lan tawiz Daehz kaanz prih Kalile taw weng Yerusalem. Keuh naeh ihz awlz Hnhz tuhz keutz ngaaiz daehz rae krai plaez kheuz Israel keui nahz.
32 Ehz krai aez pehz nahz reu oiz rak, an naeh Phraz Pen Caoh aez mok keu tih kaai ihz keu daehz keu daepz ehz,
33 daz Hnhz ngaz cih ne, seu ni Phraz Pen Caoh a wa cih ta ehz, an naeh kuanz ihz keu daehz keu daepz ehz, Hnhz cih aez Tahz Yesuhz meu rae imz, ceun kyaamz Ngawk kaai raet keu aarz ne daz, ‘Mih naeh Kuanz Ohz, meu ni Ohz a wa penz Paz Mih.’
34 Phraz Pen Caoh cih aez Tahz Yesuhz meu rae imz thaz reung dengz yam, nam mawz kheumz seu pawk, Hnhz lao mok daz ‘Ohz ngaz aez pehz nahz keu tih an seu ngamz boh rak seum yum, an aez khunz Dawit nahz.’
35 Tuhz kyaamz Ngawk Saam thaengz seu ti ne daz, ‘Mih nam aez Tahz Seu Ngamz Daehz an naeh taw hawkz ne kheumz tuhz peun lu.’
36 Meuz co khunz Dawit ne hnhz a wa cih tawiz reung dawhz Phraz Pen Caoh kaw yam. Pluz hnhz tawiz ihz keu daehz keu daepz hnhz, toz hnhz kaw a wa kheumz lan.
37 Keuiz daz toz Tahz an Phraz Pen Caoh aez meu rae imz samz nam kheumz.
38 Kuanz mai keui aez, ehz sunz aez pehz mas traz lawt reung dengz kawi tawiz Yesuhz rae ehz krai aez pehz nahz.
39 Reung dengz kawi an traz Moses nam caang cih aez keu sangz ne, beuk yaeh yum Tahz an diz kaw bawnz reung dengz keu sangz.
40 Yawt rak rak raez, ceun ihz taangz phraz lao mok ne yak aez naeh kaai pehz.
41 Ihz taangz phraz keui lao daz,
‘Yawt raez, ihz sangz maehz keui! Pehz sangz rae yam lah.
Kawp daz co pehz ne Ohz ngaz cih kaanz,
khanz daz ihz lao pehz kaw pehz ngaz nam yum.’”
42 Meuz Paul boh Barnabas lae truz thaz crawp rawz traz, ihz keui raak kaar aez kaar truz rawz lawng an diz thaengz daehz nahz kaai seu ngihz sinz laehz te truz.
43 Meuz ihz keui praasz lan ne ihz Yio boh ihz phraz traz an nam anz kheuz Yio keui kut tuhz pha sa Yio, tawiz puatz Paul kaar Barnabas raamz heungz. Kaar kaw reu ma taw keuh rae aez keum rang keuh nahz, aez keuh ceuk naeng lan kez cuz Phraz Pen Caoh.
44 Kaai seu ngihz sinz thaengz seu laehz ne ihz tang weng keui thanz paw ngaz hacz teur aacz daehz truz teuk ngarz traz.
45 Keuiz daz meuz kheuz Yio keui awlz ihz teur cuhz heungz baaiz ne maang phawmz seuk ke baaiz, upz thiangz saehz an Paul rawz.
46 Keuiz daz Paul boh Barnabas rawz yaak yaak daz, “Aaiz bawnz krai pehz nahz aacz ihz mony reu ma Phraz Pen Caoh, kawp pehz thiangz thengz rae plaez daz daehz nam theukz phawmz cen cen rae aaiz ngaz praasz pehz lan cu ihz an nam anz kheuz Yio boh.”
47 Phraz Cen Cen lao aaiz nahz,
“Ohz khaanz mok mih aez penz an thaangz kaai ihz an nam anz kheuz Yio rae
ihz tuhz prih keu tehz hacz aamz keui aez bawnz kez cuz khyawt.”
48 Meuz ihz an nam anz kheuz Yio keui ngarz ceun diz ne seuz baaiz, lupz phrawz mony reu ma Phraz Cen Cen. Ihz an ras mok keui kaw aez daehz bawnz phawmz cen cen ne penz truz ihz yum yam.
49 Mony reu ma Tahz kaw sirz lan tang prih.
50 Keuiz daz ihz Yio keui srawz srawz keun nyah setz an maang sre an naeh ihz koz kwaai Phraz Pen Caoh boh srawz srawz keur meh an naeh peur aacz ihz tuhz weng an diz rae aez keuh pae suamz Paul boh Barnabas. Keuh wah thengz kaar thaz weng daehz.
51 Kaar pisz thengz yangz cawng daehz cih khatz keuh rae kaar lan cu weng Ikoni.
52 Teu paez an naeh tuhz weng Antioc keui maang reung dengz seuz phawmz baaiz, neuk tang Khuanz Seu Ngamz.