Ihz maang pinya thaz prih reu lae
2
Meuz co khunz Herot ne Yesuhz keut tuhz weng Betlehem, prih Yio, ihz maang pinya teur ka thaz prih reu lae keui truz phraeoz a weng Yerusalem rae maanyz, 2 “Kuanz ngaak an ngaz penz khunz Yio ne keut a naez? Ehz a wa awlz seuk muny Hnhz lae thaz reu lae rae ehz ngaz truz waiz Hnhz.”3 Meuz khunz Herot ngarz lawng an diz ne kawcz phawmz baaiz, ihz weng Yerusalem kaw kawcz phawmz tawiz hnhz hacz aamz. 4 Hnhz raak teur cuhz beunz caangz keui, boh ihz mawz kyaamz keui, maanyz keuh nahz, “Khris ngaz keut a naez?”
5 Keuh daz, “Ngaz keut tuhz weng Betlehem, tuhz prih Yio, an ihz taangz phraz daz, 6 ‘Oz weng Betlehem, tuhz prih Yio, weng an diz nam anz weng keulz keulz an upz peung prih Yio, keuiz daz ihz upz peung ne ngaz keut tuhz weng an diz, Hnhz ngaz cih ihz peur aacz kheuz Israel.’”
7 Meuz phangz an diz khunz Herot rah dawmz raak leh ihz maang pinya keui rae maanyz kraao seuk muny seun teungz paw. 8 Hnhz lao keuh, “Lan dawmz kuanz ngaak rak rak tuhz weng Betlehem raez, meuz pehz awlz ne lao tang ohz, aez ohz bawnz lan waiz tang daehz.”
9 Ihz maang pinya keui kaw teuk ngarz an khunz seumz rae lae lan ne awlz mial seuk muny thaz reu lae an daehz awlz. Seuk muny an diz aacz lan keuh deukz lang kol ti kuanz ngaak naeh. 10 Meuz keuh awlz mial seuk muny an diz ne keuh seuz baaiz. 11 Keuh kut tuhz kaang, meuz keuh awlz kuanz ngaak boh mah keuh Mari ne seuk deumz kingz sangz waiz Hnhz. Keuh lawk kraep phan ta daehz rae lu kuanz ngaak nahz khamz, naam sa boh omz hawm mar. 12 Yak aez keuh weng cu mial khunz Herot ne keuh awlz pyatik tuhz reu muh rae keuh weng prih daehz tawiz reung dengz thaengz seu senz boh.
Tiunz lan prih Ekip
13 Waaiz ihz maang pinya keui lae lan ne teu maan kaang raaoz Phraz Cen Cen lao Yosep tuhz reu muh daz, “Rawi, leh kuanz ngaak boh mah hnhz kraai lan prih Ekip raez! Thonz taw ohz lao weng truz mial ne moh a diz raez. Kawp daz khunz Herot khahz sawkz piamz Hnhz.”
14 Meuz borz an diz Yosep rawi leh kuanz ngaak boh mah keuh lan prih Ekip. 15 Keuh moh a diz thonz taw khunz Herot yam. An ni aez mony reu ma Phraz Cen Cen keunyz tawiz ihz taangz Daehz daz, “Ohz raak Kuanz Ohz thaz prih Ekip.”
Piamz kuanz ihz kyehz
16 Meuz khunz Herot mas ihz maang pinya keui kaoz daehz ne sunz ca baaiz. Hnhz cao siukz daehz piamz kuanz keur meh aarz khopz cur thaz wa, tuhz weng Betlehem boh tawiz rim weng, tawiz mony reu ma ihz maang pinya keui lao hnhz kraao seuk muny paw.
17 An diz aez keunyz mony reu ma ihz taangz phraz Yeremiah daz, 18 “Reus yaam lengz lengz boh reus kraang baaiz keui ngarz a weng Ramah, Rachel yaam tawiz kuanz daehz yam ne nam phre phawmz.”
Weng truz mial thaz prih Ekip
19 Waaiz khunz Herot yam ne teu maan kaang raaoz Phraz Cen Cen lao tuhz reu muh Yosep, tuhz prih Ekip daz, 20 “Rawi raez, leh kuanz ihz boh mah keuh weng prih Israel raez, kawp daz ihz kyaam piamz Hnhz keui a wa yam.” 21 Yosep kaw leh kuanz ihz boh mah keuh weng cu prih Israel.