ⵣⴰⴽⴰⵔⵉⵢⵢⴰ 3

ⵜⴰⵎⴻⵥⵔⵉⵡⵜ ⵡⵉⵙⵙ ⴰⵔⴻⴱⵄⴰ ⵏ ⵓⴽⴻⵀⵀⴰⵏ ⵢⴰⵀⵓⵛⵓⵄⴰ

1 ⴰⵡⴰⵔⵏⵉ ⴰⵙ ⵉⵙⵙⵛⴻⵏ ⴰⵢⵉ ⵢⴰⵀⵓⵛⴰⵄ, ⴰⵔⵔⴰⵢⵙ ⵏ ⵉⴽⴻⵀⵀⴰⵏⴻⵏ. ⵏⴻⵜⵜⴰ ⵜⵓⵖⴰ ⵉⴱⴻⴷⴷ ⵥⵥⴰⵜ ⵉ ⵡⵓⴷⴻⵎ ⵏ ⵍⵎⴰⵍⴰⴽ ⵏ ⵙⵉⴷⵉ. ⵛⵛⵉⵟⴰⵏ ⵉⴱⴻⴷⴷ-ⴷⴷ ⵖⴰⵔ ⵓⴼⵓⵙ ⴰⴼⵓⵙⵉ ⵏ ⵢⴰⵛⵓⵄⴰ ⵃⵉⵎⴰ ⴰⴷ ⵥⵥⴰⵢⴻⵙ ⵉⵙⵙⵛⴻⵜⵛⴰ. 2 ⵙⵉⴷⵉ ⵉⵏⵏⴰ ⵉ ⵛⵛⵉⵟⴰⵏ: “ⴰⴷ ⵢⵉⵍⵉ ⴰⴷ ⵛⴻⴽ ⵉⵄⴰⵇⴻⴱ ⵙⵉⴷⵉ, ⴰ ⵛⵛⵉⵟⴰⵏ! ⴰⴷ ⵛⴻⴽ ⵉⵄⴰⵇⴻⴱ ⵙⵉⴷⵉ, ⵡⴻⵏⵏⵉ ⵉⴼⴰⵔⵥⴻⵏ ⵓⵔⵛⴰⵍⵉⵎ! ⵎⴰ ⵡⴰⵔ ⵉⴵⵉ ⵢⴰⵀⵓⵛⴰⵄ ⵡⴰⵏⵉⵜⴰ ⴷ ⵉⵊⵊ ⵏ ⵓⴽⴻⵛⵛⵓⴹ ⵇⴻⵍⵄⴻⵏ ⵜ-ⴷⴷ ⵥⵉ ⵜⵎⴻⵙⵙⵉ?”    3 ⵢⴰⵀⵓⵛⴰⵄ ⵜⵓⵖⴰ ⵢⴰⵔⴹ ⴰⵔⵔⵓⴹ ⵉⵡⴻⵙⵙⵅⴻⵏ ⴰⵎ ⵉⴱⴻⴷⴷ ⵥⵥⴰⵜ ⵉ ⵡⵓⴷⴻⵎ ⵏ ⵍⵎⴰⵍⴰⴽ.

4 ⵅⴻⵏⵏⵉ ⵉⵟⵟⴻⴼ ⵏⴻⵜⵜⴰ ⴷⴻⴳ ⵡⴰⵡⴰⵍ ⵓⵛⴰ ⵉⵙⵙⵉⵡⴻⵍ ⴰⴽ-ⴷ ⵢⴻⵏⵏⵉ ⵉⴱⴻⴷⴷⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ, ⵉⵏⵏⴰ: “ⴽⴽⵙⴻⵎ ⴰⵙ ⴰⵔⵔⵓⴹ ⵉⵡⴻⵙⵙⵅⴻⵏ ⵉ ⵡⴰⵏⵉⵜⴰ!” ⵓ ⵏⴻⵜⵜⴰ ⵉⵏⵏⴰ ⴰⵙ: “ⵅⵥⴰⵔ, ⵏⴻⵛⵛ ⴽⴽⵙⴻⵖ ⵥⵥⴰⵢⴻⴽ ⵍⵎⵓⵄⵚⵉⵢⵢⴻⵜ ⵏⵏⴻⴽ ⵓ ⴰⴷ ⵛⴻⴽ ⵙⵙⵢⴰⵔⴹⴻⵖ ⵙ ⵉⵊⵊ ⵏ ⵡⴰⵔⵔⵓⴹ ⵉⵛⵓⵡⵡⴰⵔⴻⵏ.”    5 ⵏⴻⵛⵛ ⵏⵏⵉⵖ: “ⴰⴷ ⴰⵙ ⵇⵇⵏⴻⵏ ⵉⵊⵊ ⵏ ⴰⵔⴻⵥⵥⴻⵜ ⵜⴰⵎⴻⵥⴷⴰⴳⵜ ⵅ ⵓⵥⴻⴵⵉⴼ ⵏⵏⴻⵙ!” ⵓ ⵏⵉⵜⵏⵉ ⵇⵇⵏⴻⵏ ⴰⵙ ⴰⵔⴻⵥⵥⴻⵜ ⵜⴰⵎⴻⵥⴷⴰⴳⵜ ⵅ ⵓⵥⴻⴵⵉⴼ ⵏⵏⴻⵙ ⵓⵛⴰ ⵙⵙⵢⴰⵔⴹⴻⵏ ⴰⵙ ⴰⵔⵔⵓⴹ ⵉⵛⵓⵡⵡⴰⵔⴻⵏ ⵓ ⵍⵎⴰⵍⴰⴽ ⵏ ⵙⵉⴷⵉ ⵉⴱⴻⴷⴷ ⴷⵉⵏ.

6 ⵅⴰⵙ ⵓⵛⴰ ⵉⵛⵀⴻⴷ ⵍⵎⴰⵍⴰⴽ ⵏ ⵙⵉⴷⵉ ⵉ ⵢⴰⵀⵓⵛⴰⵄ, ⵉⵏⵏⴰ:

7 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ:

ⵎⴰⵍⴰ ⵛⴻⴽ ⵜⵓⵢⵓⵔⴻⴷ ⵅ ⵉⴱⵔⵉⴷⴻⵏ ⵉⵏⵓ,

ⵓ ⵎⴰⵍⴰ ⵛⴻⴽ ⴰⴷ ⵜⴻⵃⴹⵉⴷ ⵜⴰⵙⴻⵅⵅⴰⵔⵜ ⵉⵏⵓ,

ⵅⴻⵏⵏⵉ ⴰⴷ ⵜⴻⵙⵙⵓⵢⵓⵔⴻⴷ ⵓⵍⴰ ⴷ ⵜⴰⴷⴷⴰⵔⵜ ⵉⵏⵓ ⵙ ⵍⵃⴻⵇⵇ

ⵓ ⴰⴷ ⵜⵉⵍⵉⴷ ⴷ ⴰⵎⴻⵃⴹⴰⵢ ⵏ ⵍⴻⵎⵔⴰⵃⴰⵜ ⵉⵏⵓ,

ⵓ ⵏⴻⵛⵛ ⴰⴷ ⴰⵛ ⵡⵛⴻⵖ ⴰⴷ ⵜⵥⴻⵎⵎⴰⵔⴻⴷ ⴰⴷ ⵜⵔⴰⵃⴻⴷ ⴰⴷ ⵜⴰⴷⴼⴻⴷ

ⵊⴰⵔ ⵉⵏⵏⵉ ⴷⴰ ⵉⴱⴻⴷⴷⴻⵏ.

8 ⵅⴻⵏⵏⵉ ⵙⴻⵍ, ⵢⴰⵀⵓⵛⴰⵄ, ⵛⴻⴽ, ⴰⵔⵔⴰⵢⵙ ⵏ ⵉⴽⴻⵀⵀⴰⵏⴻⵏ,

ⵛⴻⴽ ⴷ ⵉⵎⴻⴷⴷⵓⴽⴽⴰⵍ ⵏⵏⴻⴽ, ⵉⵏⵏⵉ ⵉⵇⵇⵉⵎⴻⵏ ⵥⵥⴰⵜⴻⴽ,

ⵎⴰⵖⴰⵔ ⵏⵉⵜⵏⵉ ⴷ ⵉⵛⵜ ⵏ ⵍⴻⵄⵍⴰⵎⴻⵜ ⵏ ⵓⵜⴻⴱⵀⴻⵜ,

ⵎⴰⵖⴰⵔ ⵅⵥⴰⵔ, ⵏⴻⵛⵛ ⴰⴷ ⴷⴷ-ⴰⵡⵢⴻⵖ ⴰⵎⵙⴻⵅⵅⴰⵔ ⵉⵏⵓ, ‘ⴰⵖⴻⴷⴷⵓ’.   

9 ⵎⴰⵖⴰⵔ ⵅⵥⴰⵔ, ⴰⵥⵔⵓ,

ⵡⴻⵏⵏⵉ ⴷⵉⵏ ⵙⵙⴰⵔⵙⴻⵖ ⵥⵥⴰⵜ ⵉ ⵢⴰⵀⵓⵛⴰⵄ,

ⵅ ⵡⴻⵥⵍⵓ ⵏⵏⵉ ⵅⴻⵥⵥⴰⵔⴻⵏⵜ ⵙⴻⴱⵄⴰ ⵏ ⵜⵉⵟⵟⴰⵡⵉⵏ.

ⵅⵥⴰⵔ, ⵏⴻⵛⵛ ⴰⴷ ⵏⴻⵇⵛⴻⵖ ⵜⴰⵏⴻⵇⵇⴰⵛⵜ ⵏⵏⴻⵙ,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ,

ⵓ ⵏⴻⵛⵛ ⴰⴷ ⴽⴽⵙⴻⵖ ⵍⵎⵓⵄⵚⵉⵢⵢⴻⵜ ⵏ ⵜⴻⵎⵎⵓⵔⵜ-ⴰ ⴷⴻⴳ ⵉⵊⵊ ⵏ ⵡⴰⵙⵙ.

10 ⴷⴻⴳ ⵡⴰⵙⵙ ⵏⵏⵉ, ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ,

ⴰⴷ ⵜⵄⴰⵔⴹⴻⵎ ⵉⵊⵊ ⵉ ⵡⴻⵏⵏⴻⵖⵏⵉ ⵙⴰⴷⵓ ⵜⵥⴰⵢⴰⵔⵜ ⵓ ⵙⴰⴷⵓ ⵡⴰⵔⵜⵓ.”