ⵜⴰⵎⴻⵥⵔⵉⵡⵜ ⵡⵉⵙⵙ ⵜⵏⴰⵢⴻⵏ - ⴰⵔⴻⴱⵄⴰ ⵏ ⵉⵛⵛⴰⵡⴻⵏ ⴷ ⴰⵔⴻⴱⵄⴰ ⵏ ⵉⵎⵣⵉⵍⴻⵏ
2
1 ⵏⴻⵛⵛ ⵙⵙⴳⴻⵄⵄⴷⴻⵖ ⵜⵉⵟⵟⴰⵡⵉⵏ ⵉⵏⵓ ⵓⵛⴰ ⵥⵔⵉⵖ, ⵓ ⵅⵣⴰⵔ ⴰⵇⴰ ⴷⵉⵏ ⴰⵔⴻⴱⵄⴰ ⵏ ⵡⴰⵛⵛⴰⵡⴻⵏ. 2 ⵏⴻⵛⵛ ⵏⵏⵉⵖ ⵉ ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ: “ⵎⵉⵏ ⵄⵏⴰⵏ ⵉⵏⴰ?” ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⴼⵉ: “ⵉⵏⴰ ⴷ ⴰⵔⴻⴱⵄⴰ ⵏ ⵡⴰⵛⵛⴰⵡⴻⵏ ⵏⵏⵉ ⵉⵣⵣⵓⵣⴰⵔⴻⵏ ⵢⴰⵀⵓⴷⴰ, ⵉⵙⵔⴰⵉⵍ ⴷ ⵓⵔⵛⴰⵍⵉⵎ.” 3 ⵅⴻⵏⵏⵉ ⵉⵙⵙⵛⴻⵏ ⴰⵢⵉ ⵙⵉⴷⵉ ⴰⵔⴻⴱⵄⴰ ⵏ ⵉⵎⵣⵉⵍⴻⵏ. 4 ⵍⴻⵅⴷⴻⵏⵏⵉ ⵏⴻⵛⵛ ⵏⵏⵉⵖ: “ⵎⵉⵏ ⵓⵎⵉ ⴷⴷ-ⵓⵙⵉⵏ ⵏⵉⵜⵏⵉ, ⵎⵉⵏ ⵖⴰ ⴳⴳⴻⵏ?” ⵏⴻⵜⵜⴰ ⵉⵙⵙⵉⵡⴻⵍ, ⵉⵏⵏⴰ: “ⵉⵏⴰ ⴷ ⴰⵛⵛⴰⵡⴻⵏ ⵏⵏⵉ ⵉⵣⵣⵓⵣⴰⵔⴻⵏ ⵢⴰⵀⵓⴷⴰ, ⴰⵍⴰⵎⵉ ⵡⴰⵔ ⴷⴷ-ⵉⵙⵙⴳⴻⵄⵄⴻⴷ ⵄⴰⴷ ⵓⵍⴰ ⴷ ⵉⵊⵊ ⴰⵣⴻⴵⵉⴼ ⵏⵏⴻⵙ, ⵎⴰⵛⴰ ⵉⵏⴰ ⵓⵙⵉⵏ-ⴷⴷ ⵃⵉⵎⴰ ⴰⴷ ⵜⴻⵏ ⵙⵙⵏⴻⵅⵍⵄⴻⵏ, ⵃⵉⵎⴰ ⴰⴷ ⵏⴹⴰⵔⴻⵏ ⴰⵛⵛⴰⵡⴻⵏ ⵏ ⵍⴻⴳⵏⵓⵙ ⵏⵏⵉ ⴷⴷ-ⵉⵙⵙⴳⴻⵄⵄⴷⴻⵏ ⵉⵛⵛ ⴹⵉⴷⴷ ⵉ ⵜⴻⵎⵎⵓⵔⵜ ⵏ ⵢⴰⵀⵓⴷⴰ ⵃⵉⵎⴰ ⴰⴷ ⵜⵜ ⵣⵓⵣⵣⴰⵔⴻⵏ.”
ⵜⴰⵎⴻⵥⵔⵉⵡⵜ ⵡⵉⵙⵙ ⵜⵍⴰⵜⴰ - ⴰⵔⵢⴰⵣ ⵙ ⵓⴼⵉⵍⵓ ⵏ ⵍⴻⵇⵢⴰⵙ
5 ⵏⴻⵛⵛ ⵙⵙⴳⴻⵄⵄⴷⴻⵖ ⵜⵉⵟⵟⴰⵡⵉⵏ ⵉⵏⵓ, ⵥⵔⵉⵖ, ⵓ ⵅⵣⴰⵔ, ⴰⵇⴰ ⴷⵉⵏ ⵉⵊⵊ ⵏ ⵡⴻⵔⵢⴰⵣ ⵙ ⵓⴼⵉⵍⵓ ⵏ ⵍⴻⵄⴱⴰⵔ ⴷⴻⴳ ⵓⴼⵓⵙ ⵏⵏⴻⵙ. 6 ⵏⴻⵛⵛ ⵏⵏⵉⵖ: “ⵎⴰⵏⵉ ⵖⴰ ⵜⵔⴰⵃⴻⴷ ⵛⴻⴽ?” ⵏⴻⵜⵜⴰ ⵢⴰⵔⵔⴰ-ⴷⴷ “ⵏⴻⵛⵛ ⴰⴷ ⵔⴰⵃⴻⵖ ⵃⵉⵎⴰ ⴰⴷ ⵄⴱⴰⵔⴻⵖ ⵓⵔⵛⴰⵍⵉⵎ ⵎⴰⵃⴻⵏⴷ ⴰⴷ ⵥⴰⵔⴻⵖ ⵎⴻⵛⵃⴰⵍ ⵜⴻⴵⴰ ⵜⵉⵔⵓ ⵏⵏⴻⵙ ⵓ ⵎⴻⵛⵃⴰⵍ ⵜⴻⴵⴰ ⵜⵓⵣⵣⴻⴳⴳⴰⵔⵜ ⵏⵏⴻⵙ.” 7 ⵓ ⵅⵣⴰⵔ, ⵉⴼⴼⴻⵖ-ⴷⴷ ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ ⵓⵛⴰ ⵉⵊⵊ ⵏ ⵍⵎⴰⵍⴰⴽ ⵏⵏⴻⵖⵏⵉ ⵉⴼⴼⴻⵖ-ⴷⴷ ⵃⵉⵎⴰ ⴰⴷ ⴽⵉⴷⴻⵙ ⵉⵎⵎⴻⵍⵇⴰ, 8 ⵉⵏⵏⴰ ⴰⵙ: “ⴷⴻⵖⵢⴻⵜ, ⵙⵉⵡⴻⵍ ⴰⴽ-ⴷ ⵓⵃⵓⴷⵔⵉ ⵏⵏⵉ, ⵉⵏⵉ:
‘ⵓⵔⵛⴰⵍⵉⵎ ⴰⴷ ⴷⵉⵏ ⵜⵉⵍⵉ
ⵜⴻⵛⵛⵓⵔ ⵙ ⵜⵏⴻⴷⴷⴰⵎ ⵏⵓⵔⵔⵣⵎⴻⵏⵜ ⴱⵍⴰ ⵍⴻⵃⵢⵓⴹ
ⵣⵉ ⵙⵙⵉⴱⴱⴻⵜ ⵏ ⵡⴰⵟⵟⴰⵙ ⵏ ⵉⵡⴷⴰⵏ ⴷ ⵍⵎⴰⵍ
ⵉ ⵉⴵⴰⵏ ⴷⵉ ⵍⵡⴻⵙⵟ ⵏⵏⴻⵙ.
9 ⵏⴻⵛⵛ ⴰⴷ ⴰⵙ ⵉⵍⵉⵖ ⴷ ⵉⵊⵊ ⵏ ⵍⵃⵉⴹ ⵏ ⵜⵎⴻⵙⵙⵉ
ⵉ ⴷ ⴰⵙ-ⴷⴷ ⵉⵜⵜⴻⵏⵏⴹⴻⵏ, ⵉⵇⵇⴰⵔ ⵙⵉⴷⵉ,
ⵓ ⴷⵉ ⵍⵡⴻⵙⵟ ⵏⵏⴻⵙ ⴰⴷ ⴰⵙ ⵉⵍⵉⵖ ⵉ ⵓⵄⵓⴵⵉ.
10 ⴷⴻⵖⵢⴰⵎ, ⴷⴻⵖⵢⴰⵎ, ⴰⵔⴻⵡⵍⴻⵎ
ⵣⵉ ⵜⴻⵎⵎⵓⵔⵜ ⵏ ⵛⵛⴰⵎⴰⵍ,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ,
ⵎⴰⵖⴰⵔ ⵏⴻⵛⵛ ⴱⴹⵉⵖ ⴽⴻⵏⵏⵉⵡ
ⴰⵎ ⴰⵔⴻⴱⵄⴰ ⵏ ⵉⵙⴻⵎⵎⵉⴹⴻⵏ ⵏ ⵓⵊⴻⵏⵏⴰ,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.
11 ⴷⴻⵖⵢⴰⵜ, ⵚⵉⵀⵢⵓⵏ, ⴼⴻⴽⴽⴻⵜ,
ⵛⴻⵎ ⴷ ⵜⴻⵏⵏⵉ ⵉⵣⴻⴷⴷⵖⴻⵏ
ⵖⴰⵔ ⵢⴻⴵⵉⵙ ⵏ ⴱⴰⴱⵉⵍ!’ ”
12 “ⵎⴰⵖⴰⵔ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ:
‘ⴷⵉ ⵟⵟⵡⴻⵄ ⵏ ⵓⵄⵓⴵⵉ,
ⵉⵙⵙⴻⴽⴽ ⴰⵢⵉ-ⴷⴷ ⵏⴻⵜⵜⴰ ⵖⴰⵔ ⵍⴻⴳⵏⵓⵙ
ⵏⵏⵉ ⵣⵣⴰⵢⵙⴻⵏ ⵜⵜⵡⴰⴽⴻⵛⵛⴹⴻⵎ,
ⵎⴰⵖⴰⵔ ⵡⴻⵏⵏⵉ ⴽⴻⵏⵏⵉⵡ ⵉ ⵖⴰ ⵉⵃⴰⴷⴰⵏ,
ⵉⵃⴰⴷⴰ ⵎⵓⵎⵎⵓ ⵏ ⵜⵉⵟⵟ ⵉⵏⵓ.
13 ⵎⴰⵖⴰⵔ ⵅⵣⴰⵔ, ⵏⴻⵛⵛ ⵙⵙⴻⵏⵀⴻⵣⵣⴻⵖ
ⴰⴼⵓⵙ ⵉⵏⵓ ⵅⴰⵙⴻⵏ,
ⵓ ⵏⵉⵜⵏⵉ ⴰⴷ ⴷⴻⵡⵍⴻⵏ ⴷ ⵜⴰⴽⴻⵛⵛⴰⴹⵜ
ⵏ ⵉⵎⵙⴻⵅⵅⴰⵔⴻⵏ ⵏⵙⴻⵏ.
ⴽⴻⵏⵏⵉⵡ ⴰⴷ ⵜⴻⵙⵙⵏⴻⵎ
ⴰⵇⴰ ⵉⵙⵙⴻⴽⴽ ⴰⵢⵉ-ⴷⴷ ⵙⵉⴷⵉ ⵏ ⵍⵄⴻⵙⴽⴰⵔⴰⵜ.
14 ⵙⵍⵉⵡⵍⴻⵡ ⵓ ⴼⴰⵔⵃ, ⴰ ⵢⴻⴵⵉⵙ ⵏ ⵚⵉⵀⵢⵓⵏ,
ⵎⴰⵖⴰⵔ ⵅⵣⴰⵔ, ⵏⴻⵛⵛ ⴰⴷ ⴷⴷ-ⴰⵙⴻⵖ
ⵓ ⴰⴷ ⵣⴻⴷⵖⴻⵖ ⴷⵉ ⵍⵡⴻⵙⵟ ⵏⵏⴻⵎ,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.’ ■
15 ‘ⴷⴻⴳ ⵡⴰⵙⵙ ⵏⵏⵉ,
ⴰⴷ ⵇⵇⵏⴻⵏ ⵡⴰⵟⵟⴰⵙ ⵏ ⵍⴻⴳⵏⵓⵙ ⵖⴰⵔ ⵙⵉⴷⵉ,
ⵓ ⵏⵉⵜⵏⵉ ⴰⴷ ⵉⵍⵉⵏ ⴷ ⵍⴳⴻⵏⵙ ⵉⵏⵓ.
ⵏⴻⵛⵛ ⴰⴷ ⵣⴻⴷⵖⴻⵖ ⴷⵉ ⵍⵡⴻⵙⵜ ⵏⵏⴻⵎ
ⵓ ⴰⴷ ⵜⴻⵙⵙⵏⴻⴷ, ⴰⵇⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ
ⵉⵙⵙⴻⴽⴽ ⴰⵢⵉ-ⴷⴷ ⵖⴰⵔⴻⵎ. ■
16 ⵙⵉⴷⵉ ⴰⴷ ⵉⵟⵟⴻⴼ ⵢⴰⵀⵓⴷⴰ ⴷ ⵜⴰⵙⵖⴰⵔⵜ ⵏⵏⴻⵙ
ⵅ ⵜⴻⵎⵎⵓⵔⵜ ⵉⵇⴻⴷⴷⵙⴻⵏ.
ⵏⴻⵜⵜⴰ ⴰⴷ ⵉⴼⴰⵔⵣ ⵓⵔⵛⴰⵍⵉⵎ ⵄⴰⴷ.
17 ⴻⵊⵊ ⵎⴰⵔⵔⴰ ⴷⴷⴰⵜ ⴰⴷ ⵉⵙⵙⴻⵖⴷ
ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ,
ⵎⴰⵖⴰⵔ ⵏⴻⵜⵜⴰ ⵉⴼⴰⵇ-ⴷⴷ
ⵣⵉ ⵜⵣⴻⴷⴷⵉⵖⵜ ⵏⵏⴻⵙ ⵉⵇⴻⴷⴷⵙⴻⵏ.’ ”