ⵣⴰⴽⴰⵔⵉⵢⵢⴰ 4

ⵜⴰⵎⴻⵥⵔⵉⵡⵜ ⵡⵉⵙⵙ ⵅⴻⵎⵙⴰ - ⵍⵇⴻⵏⴷⵉⵍ ⴷ ⵜⵏⴰⵢⴻⵏ ⵏ ⵜⵣⵉⵜⵓⵏⵉⵏ

1 ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ, ⵉⵄⵇⴻⴱ-ⴷⴷ ⵓⵛⴰ ⵉⵙⵙⴼⴰⵇ ⴰⵢⵉ-ⴷⴷ ⴰⵎ ⵎⴰⵎⵎⴻⵛ ⴷⴷ-ⵙⵙⴼⴰⵇⴰⵏ ⵉⵊⵊ ⵏ ⵡⴻⵔⵢⴰⵣ ⵣⴻⴳ ⵢⵉⴹⴻⵚ ⵏⵏⴻⵙ. 2 ⵏⴻⵜⵜⴰ ⵉⵏⵏⴰ ⴰⵢⵉ: “ⵎⵉⵏ ⵜⴻⵥⵔⵉⴷ?” ⵏⴻⵛⵛ ⵏⵏⵉⵖ: “ⵏⴻⵛⵛ ⵥⵔⵉⵖ, ⵓ ⵅⵣⴰⵔ, ⵉⵊⵊ ⵏ ⵍⵇⴻⵏⴷⵉⵍ ⵏ ⵡⵓⵔⴻⵖ ⵎⴰⵔⵔⴰ, ⵓ ⴰⵇⴰ ⴷⵉⵏ ⵉⵊⵊ ⵏ ⵟⵟⴻⴱⵚⵉ ⵏ ⵣⵣⴻⵛⵜ ⵅ ⵓⵣⴻⴵⵉⴼ ⵏⵏⴻⵙ ⵓ ⵅⴰⵙ ⵙⴻⴱⵄⴰ ⵏ ⵍⴻⴼⵏⴰⵔⴰⵜ, ⵙⴻⴱⵄⴰ ⵙⴻⵏⵏⴻⵊ ⵉ ⵙⴻⴱⵄⴰ ⵏ ⵉⴱⵓⴹⴻⵏ ⵉ ⵍⴻⴼⵏⴰⵔⴰⵜ ⵉ ⵉⴵⴰⵏ ⵅ ⵓⵣⴻⴵⵉⴼ ⵏⵏⴻⵙ 3 ⵓ ⵣⵣⴰⵜⴻⵙ ⴰⵇⴰ ⴷⵉⵏ ⵜⵏⴰⵢⴻⵏ ⵏ ⵉⵣⴻⵎⵎⵓⵔⴻⵏ, ⵉⵊⵊ ⵖⴰⵔ ⵓⵖⴻⵣⴷⵉⵙ ⴰⴼⵓⵙⵉ ⵏ ⵟⵟⴻⴱⵚⵉ ⵏ ⵣⵣⴻⵛⵜ ⵓ ⵉⵊⵊ ⵖⴰⵔ ⵓⵣⴻⵍⵎⴰⴹ ⵏⵏⴻⵙ.”

4 ⵏⴻⵛⵛ ⴰⵔⵔⵉⵖ-ⴷⴷ ⵓ ⵙⵙⵉⵡⵍⴻⵖ ⴰⴽ-ⴷ ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ, ⵏⵏⵉⵖ: “ⵙⵉⴷⵉ ⵉⵏⵓ, ⵎⵉⵏ ⵄⵏⴰⵏⵜ ⵜⵎⴻⵙⵍⴰⵢⵉⵏ-ⴰ?” 5 ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ, ⵢⴰⵔⵔⴰ-ⴷⴷ, ⵉⵏⵏⴰ ⴰⵢⵉ: “ⵎⴰ ⵡⴰⵔ ⵜⴻⵙⵙⵉⵏⴻⴷ ⵛⴻⴽ, ⵎⵉⵏ ⵄⵏⴰⵏⵜ ⵜⵎⴻⵙⵍⴰⵢⵉⵏ-ⴰ?” ⵏⴻⵛⵛ ⵏⵏⵉⵖ: “ⵍⵍⴰ, ⴰ ⵙⵉⴷⵉ ⵉⵏⵓ!”

6 ⵅⴻⵏⵏⵉ ⵢⴰⵔⵔⴰ-ⴷⴷ ⵓⵛⴰ ⵉⵙⵙⵉⵡⴻⵍ-ⴷⴷ ⴰⴽⵉⴷⵉ, ⵉⵏⵏⴰ: “ⵡⴰ ⴷ ⴰⵡⴰⵍ ⵏ ⵙⵉⴷⵉ ⵉ ⵣⴰⵔⵓⴱⴱⴰⴱⵉⵍ, ⴰⵡⴰⵍ ⵏⵏⵉ ⵉⵇⵇⴰⵔ: ‘ⵡⴰⵔ ⵉⴵⵉ ⵙ ⵊⵊⴻⵀⴷ ⵓⵍⴰ ⵙ ⵍⵄⵓⵏⴼ, ⵎⴰⵛⴰ ⴰⴷ ⵢⵉⵍⵉ ⵙ ⴰⵔⵔⵓⵃ ⵉⵏⵓ!’, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ.    7 ⵎⵉⵏ ⵜⴻⵄⵏⵉⴷ ⵛⴻⴽ, ⴰ ⴰⴷⵔⴰⵔ ⴰⵎⴻⵇⵇⵔⴰⵏ? ⴰⴷ ⵜⴷⴻⵡⵍⴻⴷ ⴷ ⵉⵛⵜ ⵏ ⵍⵡⴰⵟⴰ ⵣⵣⴰⵜ ⵉ ⵡⵓⴷⴻⵎ ⵏ ⵣⴰⵔⵓⴱⴱⴰⴱⵉⵍ, ⵎⴰⵖⴰⵔ ⵏⴻⵜⵜⴰ ⴰⴷ ⴷⴷ-ⵉⵙⵙⵓⴼⴼⴻⵖ ⴰⵥⵔⵓ ⵏ ⵏⵏⴻⵊ ⵙ ⵉⵖⵓⵢⵢⴰⵏ ⵉⵊⴻⵀⴷⴻⵏ: ‘ⴰⵔⴹⴰ, ⴰⵔⴹⴰ ⴰⴷ ⵖⴰⵔⴻⵙ ⵢⵉⵍⵉ!’ ”

8 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 9 “ⵉⴼⴰⵙⵙⴻⵏ ⵏ ⵣⴰⵔⵓⴱⴱⴰⴱⵉⵍ ⵙⵙⴰⵔⵙⴻⵏ ⴷⵙⴰⵙ ⵉ ⵜⴰⴷⴷⴰⵔⵜ-ⴰ, ⵉⴼⴰⵙⵙⴻⵏ ⵏⵏⴻⵙ ⴰⴷ ⵜⵜ ⴽⴻⵎⵎⵍⴻⵏ, ⵎⴰⵃⴻⵏⴷ ⴰⴷ ⵜⴻⵙⵙⵏⴻⵎ ⴰⵇⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵉⵙⵙⴻⴽⴽ ⴰⵢⵉ-ⴷⴷ ⵖⴰⵔⵡⴻⵎ. 10 ⵎⴰⵖⴰⵔ ⵎⴰⵏ ⵡⴻⵏ ⵉⵙⵙⴻⵃⵇⴰⵔⴰⵏ ⴰⵙⵙ ⵏ ⵜⵎⴻⵙⵍⴰⵢⵉⵏ ⵜⵉⵎⴻⵥⵢⴰⵏⵉⵏ? ⵙⴻⴱⵄⴰ ⵏ ⵜⵉⵟⵟⴰⵡⵉⵏ ⵏⵏⵉ ⴳⴳⵓⵔ ⴰⴷ ⴼⴰⵔⵃⴻⵏ, ⵅⵎⵉ ⵖⴰ ⵥⴰⵔⴻⵏ ⴰⵥⵔⵓ ⵏ ⵜⴻⵖⵎⴰⵔⵜ ⴷⴻⴳ ⵓⴼⵓⵙ ⵏ ⵣⴰⵔⵓⴱⴱⴰⴱⵉⵍ, ⴰⵇⴰ ⴰⵜⴻⵏⵜ ⵜⵉⵟⵟⴰⵡⵉⵏ ⵏ ⵙⵉⴷⵉ ⵏⵏⵉ ⵉⵜⵜⴻⴽⴽⴻⵏ ⵎⴰⵔⵔⴰ ⵜⴰⵎⵎⵓⵔⵜ.”

11 ⵏⴻⵛⵛ ⴰⵔⵔⴻⵖ-ⴷⴷ, ⵏⵏⵉⵖ ⴰⵙ: “ⵎⴰⵏⴰ ⵜⵏⴰⵢⴻⵏ ⵏ ⵉⵣⴻⵎⵎⵓⵔⴻⵏ ⵏⵏⵉ ⴷⵉⵏ ⵖⴰⵔ ⵓⵖⴻⵣⴷⵉⵙ ⴰⴼⵓⵙⵉ ⴷ ⵓⵥⴻⵔⵎⴰⴹ ⵏ ⵍⵇⴻⵏⴷⵉⵍ?” 12 ⴰⵔⵏⵉⵖ ⵟⵟⴼⴻⵖ ⴷⴻⴳ ⵡⴰⵡⴰⵍ, ⵏⵏⵉⵖ ⴰⵙ: “ⵎⵉⵏ ⵄⵏⴰⵏ ⵜⵏⴰⵢⴻⵏ ⵏ ⵍⴻⴼⵔⵓⵄ ⵏ ⵓⵣⴻⵎⵎⵓⵔ ⵏⵏⵉ ⵉⴵⴰⵏ ⵖⴰⵔ ⵜⵏⴰⵢⴻⵏ ⵏ ⵉⵇⵓⴷⴰⵙ ⵏ ⵡⵓⵔⴻⵖ ⵉ ⴷⴷ-ⵉⵜⵜⴼⴰⵔⵔⴰⵖⴻⵏ ⵣⵣⴻⵛⵜ ⵙ ⵜⵉⵏⵜⴰ ⵏⵏⴻⵙ ⵏ ⵡⵓⵔⴻⵖ?” 13 ⵏⴻⵜⵜⴰ ⵉⵙⵙⴰⵡⴰⵍ-ⴷⴷ ⵖⴰⵔⵉ, ⵉⵏⵏⴰ: “ⵎⴰ ⵡⴰⵔ ⵜⴻⵙⵙⵉⵏⴻⴷ ⵛⴻⴽ ⵎⵉⵏ ⵄⵏⴰⵏ ⵉⵏⴰ?” ⵏⴻⵛⵛ ⵏⵏⵉⵖ: “ⵍⵍⴰ, ⴰ ⵙⵉⴷⵉ ⵉⵏⵓ!” 14 ⵅⴻⵏⵏⵉ ⵉⵏⵏⴰ: “ⵉⵏⴰ ⴷ ⵜⵏⴰⵢⴻⵏ ⵏ ⵉⵃⴻⵏⵊⵉⵔⴻⵏ ⵉ ⵉⵜⵜⵡⴰⴷⴻⵀⵏⴻⵏ ⵙ ⵣⵣⴻⵛⵜ ⵏⵏⵉ ⵉⴱⴻⴷⴷⴻⵏ ⵣⵣⴰⵜ ⵉ ⵙⵉⴷⵉ ⵏ ⵎⴰⵔⵔⴰ ⵜⴰⵎⵎⵓⵔⵜ.”