ⵉⵡⴻⴱⴱⴻⵅ ⵙⵉⴷⵉ ⵉ ⵢⵓⵏⴰ
4
1 ⵎⴰⵏ ⴰⵢⴰ ⵜⵓⵖⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⵜⴰⵄⴻⴼⴼⴰⵏⵜ ⴰⵍ ⵟⵟⴰⵔⴼ ⵉ ⵢⵓⵏⵓⵙ ⵓⵛⴰ ⵜⵀⴰⵊ ⵜⴻⴼⵇⴻⵃⵜ ⵏⵏⴻⵙ. 2 ⵉⵥⵥⵓⴵ ⵉ ⵙⵉⴷⵉ, ⵉⵏⵏⴰ: “ⴰ ⵙⵉⴷⵉ, ⵎⴰ ⵡⴰⵔ ⵏⵏⵉⵖ ⴰⵎⵎⵓ ⵓⵎⵉ ⴷ ⴰⵢⵉ ⵜⵓⵖⴰ ⴷⵉ ⵜⴻⵎⵎⵓⵔⵜ ⵉⵏⵓ? ⵅ ⵎⴰⵏ ⴰⵢⴰ ⵏⵡⵉⵖ ⴰⴷ ⴰⵔⴻⵡⵍⴻⵖ ⵖⴰⵔ ⵜⴰⵔⵛⵉⵛ ⵎⵉⵏⵥⵉ ⵏⴻⵛⵛ ⵙⵙⵏⴻⵖ ⴱⴻⵍⵍⵉ ⵛⴻⴽ ⴷ ⵉⵊⵊ ⵏ ⴰⵔⴻⴱⴱⵉ ⴷ ⴰⵃⵏⵉⵏ ⴷ ⴰⵔⵃⵉⵎ, ⵖⴰⵔⴻⴽ ⵜⵜⴰⵙⵉⵄ ⵏ ⵍⵅⴰⴹⴰⵔ ⴷ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵜⴰⵎⴻⵇⵇⵔⴰⵏⵜ ⵓⵛⴰ ⵜⵏⴻⴷⵎⴻⴷ ⴰⴷ ⵜⴻⴳⴳⴻⴷ ⵍⵖⴰⵔ. ■ 3 ⵅⴻⵏⵏⵉ ⵍⴻⵅⵅⵓ, ⴰ ⵙⵉⴷⵉ, ⴽⴽⴻⵙ ⵥⵥⴰⵢⵉ ⵍⴻⵄⵎⴰⵔ ⵉⵏⵓ, ⵎⵉⵏⵥⵉ ⵉⵜⵜⴱⴰⵏ ⴰⵢⵉ ⴱⴻⵍⵍⵉ ⵍⵎⴻⵡⵜ ⵉⵏⵓ ⵃⵙⴻⵏ ⵥⵉ ⵜⵓⴷⴰⵔⵜ ⵉⵏⵓ.” 4 ⵉⵏⵏⴰ ⵙⵉⴷⵉ: “ⵎⴰ ⵜⴻⵛⵏⴰ ⵓⵎⵉ ⵜⵅⴻⵢⵢⵇⴻⴷ ⴰⵎⵎⵓ?” 5 ⵉⴼⴼⴻⵖ ⵢⵓⵏⵓⵙ ⵥⵉ ⵜⴻⵏⴷⵉⵏⵜ ⵓⵛⴰ ⵉⵔⵓⵃ ⵉⵇⵇⵉⵎ ⴷⵉ ⵊⵊⵉⵀⴻⵜ ⵏ ⵛⵛⴰⵔⵇ ⵏ ⵜⴻⵏⴷⵉⵏⵜ ⵎⴰⵏⵉ ⵉⴳⴳⴰ ⵉ ⵢⵉⵅⴻⴼ ⵏⵏⴻⵙ ⵜⴰⵙⴻⵇⵇⴰⴼⵜ ⵏ ⵉⴼⴻⵜⵡⴰⵏ ⵓⵛⴰ ⵉⵇⵇⵉⵎ ⵙⵡⴰⴷⴷⴰⵢ ⵏⵏⴻⵙ ⴷⵉ ⵜⵉⵍⵉ ⵎⴰⵃⴻⵏⴷ ⴰⴷ ⵉⵥⴰⵔ ⵎⵉⵏ ⵖⴰ ⵉⵎⵙⴰⵔⴻⵏ ⵉ ⵜⴻⵏⴷⵉⵏⵜ. 6 ⵜⵓⵖⴰ ⵙⵉⴷⵉ ⴰⵔⴻⴱⴱⵉ ⵉⵙⵙⴻⵡⵊⴻⴷ ⵉⵛⵜ ⵏ ⵜⵛⴻⵊⵊⴰⵔⵜ ⵏ ⵓⵜⴻⴱⵀⴻⵜ ⵓⵛⴰ ⵉⵊⵊⴰ-ⵉ-ⵜⵜ ⴰⴷ ⵜⴻⵢⵎⴰ ⵜⵓⵄⵍⴰ ⵅ ⵢⵓⵏⵓⵙ ⵃⵉⵎⴰ ⴰⴷ ⵜⵉⵍⵉ ⴷ ⵜⵉⵍⵉ ⵅ ⵓⵥⴻⴵⵉⴼ ⵏⵏⴻⵙ ⵓ ⵃⵉⵎⴰ ⴰⴷ ⵉⴽⴽⴻⵙ ⵓⵅⴻⵢⵢⴻⵇ ⵏⵏⴻⵙ. ⵉⴼⴰⵔⵃ ⵢⵓⵏⵓⵙ ⴰⵟⵟⴰⵙ ⵅ ⵜⵛⴻⵊⵊⴰⵔⵜ-ⴰ ⵏ ⵍⴻⵄⵊⴻⴱ. 7 ⵎⴰⵛⴰ ⵖⴰⵔ ⵍⴻⴼⵊⴰⵔ ⵏ ⵜⵡⴻⵛⵛⴰ ⵉⵙⵙⴻⵡⵊⴻⴷ ⴰⵔⴻⴱⴱⵉ ⵉⵛⵜ ⵏ ⵜⴽⴻⵛⵛⴰ ⵏⵏⵉ ⵜⴻⵙⵙⴻⵃⵍⴻⵛ ⵜⴰⵛⴻⵊⵊⴰⵔⵜ ⵏ ⵓⵜⴻⴱⵀⴻⵜ ⵏⵏⵉ ⵓⵛⴰ ⵜⵓⵥⴻⵖ. 8 ⴰⵍⴰⵎⵉ ⴷⴷ-ⵜⴻⵏⵇⴰⵔ ⵜⴼⵓⵛⵜ, ⵉⵎⵙⴰⵔ ⴱⴻⵍⵍⵉ ⴰⵔⴻⴱⴱⵉ ⵉⵙⵙⴻⴽⴽ ⵉⵊⵊ ⵏ ⵓⵙⴻⵎⵎⵉⴹ ⵏ ⵛⵛⴰⵔⵇ ⵉⵃⴰⵔⵔⴻⵏ ⵓⵛⴰ ⵜⴻⵡⵜⴰ ⵜⴼⵓⵛⵜ ⴰⵥⴻⴵⵉⴼ ⵏ ⵢⵓⵏⵓⵙ ⴰⵍⴰⵎⵉ ⵉⴷⴻⵡⵡⴻⵅ ⵓⵛⴰ ⵏⴻⵜⵜⴰ ⵢⴰⵔⵥⵓ ⴰⴷ ⵉⵎⵎⴻⵜ, ⵉⵏⵏⴰ: “ⵉⵜⵜⴱⴰⵏ ⴰⵢⵉ ⴱⴻⵍⵍⵉ ⵍⵎⴻⵡⵜ ⵉⵏⵓ ⵃⵙⴻⵏ ⵥⵉ ⵜⵓⴷⴰⵔⵜ ⵉⵏⵓ.” 9 ⵅⴻⵏⵏⵉ ⵉⵏⵏⴰ ⴰⵙ ⴰⵔⴻⴱⴱⵉ ⵉ ⵢⵓⵏⵓⵙ: “ⵎⴰ ⵜⴻⵛⵏⴰ ⵓⵎⵉ ⵜⵅⴻⵢⵢⵇⴻⴷ ⴰⵎⵎⵓ ⵅ ⵜⵛⴻⵊⵊⴰⵔⵜ-ⴰ ⵏ ⵓⵜⴻⴱⵀⴻⵜ?” ⵉⵏⵏⴰ: “ⴰⵇⴰ ⴷ ⵚⵚⴻⵃ ⴰⵇⴰ ⵅⴻⵢⵢⵇⴻⵖ, ⴰⵍⴰⵎⵉ ⵥⴻⵎⵎⴰⵔⴻⵖ ⴰⴷ ⵎⵎⵜⴻⵖ!”
10 ⵉⵏⵏⴰ ⴰⵙ ⵙⵉⴷⵉ: “ⵛⴻⴽ ⵜⴻⵥⵥⵉⴵⴻⵥ ⴰⵛ ⵜⵛⴻⵊⵊⴰⵔⵜ ⵏ ⵓⵜⴻⴱⵀⴻⵜ ⵉ ⵓⵎⵉ ⵡⴰⵔ ⵜⵅⴻⴷⵎⴻⴷ ⵓ ⵉ ⵓⵎⵉ ⵡⴰⵔ ⵜⴻⵙⵙⴻⵢⵎⴻⴷ, ⴷ ⵜⴻⵏⵏⵉ ⴷⴷ-ⵢⵓⵙⵉⵏ ⴷⴻⴳ ⵉⵛⵜ ⵏ ⴵⵉⵍⴻⵜ ⵓⵛⴰ ⵜᵉⵜⵜⵡⴰⵀⴻⵍⵍⴻⴽ ⴷⴻⴳ ⵉⵛⵜ ⵏ ⴵⵉⵍⴻⵜ.
11 ⵎⴰ ⵏⴻⵛⵛ ⵡⴰⵔ ⴷ ⴰⵢⵉ ⵜⴻⵥⵥⵉⴵⴻⵥ ⵜⴻⵏⴷⵉⵏⵜ ⵏ ⵏⵉⵏⵡⴰ ⵜⴰⵎⴻⵇⵇⵔⴰⵏⵜ ⵜⴻⵏⵏⵉ ⵉ ⴷⵉ ⵉⴵⴰ ⴽⵜⴰⵔ ⵥⵉ ⵎⵢⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵉⵡⴷⴰⵏ ⵉⵏⵏⵉ ⵡⴰⵔ ⵉⵙⵙⵉⵏⴻⵏ ⵍⴼⴰⵔⵇ ⵊⴰⵔ ⵓⴼⵓⵙ ⵏⵙⴻⵏ ⴰⴼⵓⵙⵉ ⴷ ⵓⴼⵓⵙ ⵏⵙⴻⵏ ⴰⵥⴻⵍⵎⴰⴹ ⵓ ⵙⴻⵏⵏⴻⵊ ⵉ ⵓⵢⴰ ⴰⵇⴰ ⴷⵉⵏ ⴰⵟⵟⴰⵙ ⵏ ⵍⴻⴱⵀⴰⵢⴻⵎ?”