ⵄⵓⴱⴰⴷⵢⴰ 1

ⵄⵓⴱⴰⴷⵢⴰ

1 ⵍⴻⵡⵃⵉⵢ ⵏ ⵄⵓⴱⴰⴷⵢⴰ.

“ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⵅ ⵉⴷⵓⵎ:

’ⵏⴻⵛⵛⵉⵏ ⵏⴻⵙⵍⴰ ⵉⵊⵊ ⵏ ⵍⴻⵅⴱⴰⵔ ⵣⵉ ⵙⵉⴷⵉ,

ⵓ ⵉⵊⵊ ⵏ ⵓⵎⵙⴻⴽⴽⵉ ⵉⵜⵜⵡⴰⵙⵙⴻⴽⴽ ⵖⴰⵔ ⵍⴻⴳⵏⵓⵙ:

ⴽⴽⴰⵔ, ⵊⵊⴻⵎ ⴰⵏⴻⵖ ⴰⴷ ⵅⴰⵙ ⵏⵖⴻⵡⵡⴻⵖ,

ⴰⴷ ⵏⴻⵎⵎⵏⴻⵖ ⴰⴽ-ⴷ ⵉⴷⵓⵎ!’   

2 ⵅⵣⴰⵔ, ⵏⴻⵛⵛ ⴳⴳⵉⵖ ⵛⴻⴽ ⴷ ⴰⵎⴻⵥⵢⴰⵏ ⵊⴰⵔ ⵍⴻⴳⵏⵓⵙ,

ⵛⴻⴽ ⵜᵉⵜⵜⵡⴰⵙⵙⴻⵃⵇⴰⵔⴰⴷ ⴰⵟⵟⴰⵙ.   

3 ⵏⵏⴼⴰⵅⴻⵜ ⵏ ⵡⵓⵍ ⵏⵏⴻⵛ ⵜⴻⵛⵎⴻⵜ ⵉ ⵛⴻⴽ,

ⵛⴻⴽ ⴷ ⵡⴻⵏⵏⵉ ⴷⵉⵏ ⵉⵣⴻⴷⴷⵖⴻⵏ ⴷⴻⴳ ⵉⵎⵓⵛⴰⵏ ⵏ ⵓⴷⵓⵔⵔⵉ ⵊⴰⵔ ⵍⴻⵊⵔⵓⴼ,

ⴷⵉ ⵜⵣⴻⴷⴷⵉⵖⵜ ⵏⵏⴻⵛ ⵢⵓⵄⵍⴰⵏ,

ⵛⴻⴽ ⴷ ⵡⴻⵏⵏⵉ ⵉⵇⵇⴰⵔⴻⵏ ⴷⴻⴳ ⵡⵓⵍ ⵏⵏⴻⵛ:

‘ⵎⴰⵏ ⵡⴻⵏ ⴷ ⴰⵢⵉ ⵖⴰ ⵉⵖⴻⴹⵍⴻⵏ ⵖⴰⵔ ⵜⴻⵎⵎⵓⵔⵜ?’   

4 ⵎⴰⵍⴰ ⵜⴻⵙⵙⴳⴻⵄⵄⴷⴻⴷ ⵉⵅⴻⴼ ⵏⵏⴻⵛ ⴰⵎ ⵓⴳⵉⴷⴻⵔ,

ⵏⵉⵖ ⵜⴻⴳⴳⵉⴷ ⵍⵄⵓⵛⵛ ⵏⵏⴻⵛ ⵊⴰⵔ ⵉⵜⵔⴰⵏ,

ⵏⴻⵛⵛ ⴰⴷ ⵛⴻⴽ ⴷⴷ ⵙⵙⴻⵏⵏⵉ ⵙⵙⴻⵀⵡⵉⵖ,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.”   

5 “ⵎⴰⵍⴰ ⵓⴷⴼⴻⵏ-ⴷⴷ ⵖⴰⵔⴻⴽ ⵉⵛⴻⴼⴼⴰⵔⴻⵏ,

ⵏⵉⵖ ⵉⵅⴻⵡⵡⴰⵏⴻⵏ ⵙ ⴵⵉⵍⴻⵜ,

- ⴰ, ⵎⴰⵎⵎⴻⵛ ⵉ ⵖⴰ ⵜᵉⵜⵜⵡⴰⵍⴻⴷⴷⴵⴻⴷ ⴰⵍ ⵟⵟⴰⵔⴼ -

ⵎⴰ ⵡⴰⵔ ⵜⵜⴰⵛⴰⵔⴻⵏ ⴰⵍ ⵖⴰⵔⵙⴻⵏ ⵉ ⵖⴰ ⵢⵉⵍⵉ ⵎⵉⵏ ⵉⴽⴼⴰⵏ?

ⵎⴰⵍⴰ ⵓⵙⵉⵏ-ⴷⴷ ⵖⴰⵔⴻⴽ ⵉⵏⵏⵉ ⵉ ⵖⴰ ⵉⵍⴻⵇⴹⴻⵏ ⴰⴹⵉⵍ,

ⵎⴰ ⴰⴷ ⵊⵊⴻⵏ ⵛⴰ ⵎⵉⵏ ⵉⵜⵜⵡⴰⵍⴻⵇⴹⴻⵏ ⴰⵡⴰⵔⵏⵉ ⴰⵙⴻⵏ?   

6 ⴰ ⵎⴰⵎⵎⴻⵛ ⵉ ⵖⴰ ⴰⵔⵣⵓⵏ ⴷⵉ ⵄⵉⵙⵓ,

ⵎⴰⵎⵎⴻⵛ ⵉ ⵖⴰ ⴱⴻⵇⵇⵛⴻⵏ ⵍⴻⴽⵏⵓⵣ ⵏⵏⴻⵙ ⵏⵏⵓⴼⴰⵔⴻⵏ!

7 ⵎⴰⵔⵔⴰ ⵉⵔⵢⴰⵣⴻⵏ ⵏⵏⵉ ⵉⴳⴳⵉⵏ ⵉⵊⵊ ⵏ ⵍⵄⴰⵀⴷ ⴰⴽⵉⴷⴻⴽ,

ⵄⴰⵔⵏⴻⵏ ⵛⴻⴽ ⵖⴰⵔ ⵡⴻⵢⵎⵉⵔ,

ⵉⵔⵢⴰⵣⴻⵏ ⵏⵏⵉ ⵜⵓⵖⴰ ⴰⴽⵉⴷⴻⴽ ⵉⴷⴷⴰⵔⴻⵏ ⴷⵉ ⵍⴻⵀⵏⴰ, ⵛⴻⵎⵜⴻⵏ ⵛⴻⴽ,

ⵏⵉⵜⵏⵉ ⵣⴻⵎⵎⴰⵔⴻⵏ ⵅⴰⴽ.

ⴰⵖⵔⵓⵎ ⵣⵣⴰⵢⴻⴽ ⴳⴳⵉⵏ ⵜ ⴷ ⵜⴰⵔⴻⵃⵙⵉⵜ ⵙⵡⴰⴷⴷⴰⵢ ⵏⵏⴻⵛ.

‘ⴰⵇⴰ ⵏⴻⵜⵜⴰ ⵡⴰⵔ ⴷⴰⵢⴻⵙ ⴱⵓ ⵍⴻⴼⵀⴰⵎⴻⵜ.’     

8 ⵎⴰ ⵡⴰⵔ ⵉⵜⵜⵉⵍⵉ ⴷⴻⴳ ⵡⴰⵙⵙ ⵏⵏⵉ, ⵉⵇⵇⴰⵔ ⵙⵉⴷⵉ,

ⴰⵇⴰ ⵏⴻⵛⵛ ⴰⴷ ⴰⵔⴻⴷⴷⴵⴻⵖ ⵉⵎⵉⵖⵉⵙⴻⵏ ⵣⵉ ⵉⴷⵓⵎ,

ⵓ ⵍⴻⴼⵀⴰⵎⴻⵜ ⵣⴻⴳ ⵉⴷⵓⵔⴰⵔ ⵏ ⵄⵉⵙⵓ?   

9 ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵏⵏⴻⵛ ⴰⴷ ⵜⵜⵡⴰⵃⵚⴰⵔⴻⵏ

ⵣⵉ ⵜⵉⴳⴳⵯⵓⴷⵉ, ⴰ ⵜⴰⵢⵎⴰⵏ,

ⵃⵉⵎⴰ ⴽⵓⵍ ⵉⵊⵊⴻⵏ ⵣⴻⴳ ⵉⴷⵓⵔⴰⵔ ⵏ ⵄⵉⵙⵓ

ⴰⴷ ⵉⵜⵜⵡⴰⵇⴹⴻⵄ ⵙ ⵡⴻⵏⵖⴰⵢ.”   

10 “ⵣⵉ ⵙⵙⵉⴱⴱⴻⵜ ⵏ ⵍⵄⵓⵏⴼ ⵅ ⵓⵎⴰⵛ ⵢⴰⵄⵇⵓⴱ,

ⴰⴷ ⵛⴻⴽ ⵜⴷⴻⵍ ⵍⴻⴼⴹⵉⵃⴻⵜ,

ⵓ ⴰⴷ ⵜᵉⵜⵜⵡⴰⴽⴽⵙⴻⴷ ⵉ ⵍⴻⴱⴷⴰ.   

11 ⴷⴻⴳ ⵡⴰⵙⵙ ⵉ ⴷⵉ ⵜⵓⵖⴰ ⵅⴰⵙ ⵜⴱⴻⴷⴷⴻⴷ,

ⴷⴻⴳ ⵡⴰⵙⵙ ⵉ ⴷⵉ ⵉⴱⴰⵔⵔⴰⵏⵉⵢⵢⴻⵏ ⵉⵡⵢⴻⵏ-ⴷⴷ ⴰⴳⵍⴰ ⵏⵏⴻⵙ

ⵓ ⵓⴷⴼⴻⵏ ⵍⴱⴰⵔⵔⴰⵏⵉ ⵖⴰⵔ ⵜⴻⵡⵡⵓⵔⴰ ⵏⵏⴻⵙ,

ⵓ ⵏⴹⴰⵔⴻⵏ ⵜⴰⵇⴻⴷⴷⵓⵃⵜ ⵅ ⵓⵔⵛⴰⵍⵉⵎ,

ⵜⵓⵖⴰ ⵛⴻⴽ ⴰⵎ ⵢⵉⵊⵊⴻⵏ ⵣⵣⴰⵢⵙⴻⵏ.   

12 ⵎⴰⵛⴰ ⵡⴰⵔ ⴷ ⴰⵛ ⵉⵄⴻⴷⴷⴻⵍ ⴰⴷ ⵜⴻⵇⵇⵉⵎⴻⴷ ⵜⵅⴻⵣⵣⴰⵔⴻⴷ

ⴷⴻⴳ ⵡⴰⵙⵙ ⵏ ⵓⵎⴰⵛ,

ⴷⴻⴳ ⵡⴰⵙⵙ ⵏ ⵡⴻⵛⵜⴰⴱ ⵏⵏⴻⵙ ⴰⴱⴰⵔⵛⴰⵏ,

ⵡⴰⵔ ⴷ ⴰⵛ ⵉⵄⴻⴷⴷⴻⵍ ⴰⴷ ⵜⴼⴰⵔⵃⴻⴷ ⵅ ⵉⵃⴻⵏⵊⵉⵔⴻⵏ ⵏ ⵢⴰⵀⵓⴷⴰ,

ⴷⴻⴳ ⵡⴰⵙⵙ ⵏ ⵡⴰⵔⴻⴷⴷⴻⴵ ⵏⵙⴻⵏ

ⵓ ⵡⴰⵔ ⴷ ⴰⵛ ⵉⵄⴻⴷⴷⴻⵍ ⴰⴷ ⵜⴰⵔⴻⵣⵎⴻⴷ ⴰⵇⴻⵎⵎⵓⵎ ⵏⵏⴻⵛ ⴰⵟⵟⴰⵙ

ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ ⵏⵙⴻⵏ.

13 ⵡⴰⵔ ⵉⵄⴻⴷⴷⴻⵍ ⴰⴷ ⵜⴰⴷⴼⴻⴷ ⵖⴰⵔ ⵜⴻⵡⵡⴰⵔⵜ ⵏ ⵍⴳⴻⵏⵙ ⵉⵏⵓ

ⴷⴻⴳ ⵡⴰⵙⵙ ⵏ ⵓⵀⴻⵍⵍⴻⴽ ⵏⵙⴻⵏ

ⵡⴰⵔ ⴷ ⴰⵛ ⵉⵄⴻⴷⴷⴻⵍ ⴰⴷ ⵜⴻⵇⵇⵉⵎⴻⴷ ⵜⵅⴻⵣⵣⴰⵔⴻⴷ ⵄⴰⵡⴻⴷ

ⴷⴻⴳ ⵡⴰⵙⵙ ⵏ ⵓⴹⴻⵢⵢⴻⵄ ⵏⵙⴻⵏ

ⵓ ⵡⴰⵔ ⴷ ⴰⵛ ⵉⵄⴻⴷⴷⴻⵍ ⴰⴷ ⵜⴻⵇⵇⵉⵎⴻⴷ ⵜⴻⵙⵙⵡⵉⵥⵥⴹⴻⴷ

ⵉⴼⴰⵙⵙⴻⵏ ⵏⵏⴻⵛ ⵖⴰⵔ ⵡⴰⴳⵍⴰ ⵏⵏⴻⵙ

ⴷⴻⴳ ⵡⴰⵙⵙ ⵏ ⵓⴹⴻⵢⵢⴻⵄ ⵏⵏⴻⵙ,

14 ⵡⴰⵔ ⴷ ⴰⵛ ⵉⵄⴻⴷⴷⴻⵍ ⴰⴷ ⵜⴱⴻⴷⴷⴻⴷ

ⵖⴰⵔ ⵎⴰⵏⵉ ⵜⵜⵎⴻⵍⵇⴰⵏ ⵉⴱⵔⵉⴷⴻⵏ,

ⵎⴰⵃⴻⵏⴷ ⴰⴷ ⵜᵉⵜⵜⴻⵃⵃⵉⴷ ⵉⵏⵏⵉ ⵉⵏⴻⵊⵎⴻⵏ

ⵓ ⵡⴰⵔ ⴷ ⴰⵛ ⵉⵄⴻⴷⴷⴻⵍ

ⴰⴷ ⵜⵙⴻⵍⵍⵎⴻⴷ ⵉⵏⵏⵉ ⵜⵓⵖⴰ ⵢⴰⵔⴻⵡⵍⴻⵏ

ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ.”

15 “ⵎⴰⵖⴰⵔ ⵢⵓⴷⴻⵙ-ⴷⴷ ⴰⵙⵙ ⵏ ⵙⵉⴷⵉ

ⵅ ⵎⴰⵔⵔⴰ ⵍⴻⴳⵏⵓⵙ!

ⴰⵎ ⵜⴻⴳⴳⵉⴷ ⵛⴻⴽ, ⴰⴷ ⵣⵣⴰⵢⴻⴽ ⵉⵜⵜⵡⴰⴳⴳ,

ⴰⵅⴻⴵⴻⵚ ⵏⵏⴻⵛ ⴰⴷ ⴷⴷ-ⵉⴷⵡⴻⵍ ⵅ ⵓⵣⴻⴵⵉⴼ ⵏⵏⴻⵛ.   

16 ⵎⴰⵖⴰⵔ ⴰⵎ ⵎⴰⵎⵎⴻⵛ ⵜⴻⵙⵡⵉⵎ ⴽⴻⵏⵏⵉⵡ

ⵅ ⵡⴻⴷⵔⴰⵔ ⵉⵏⵓ ⵉⵇⴻⴷⴷⵙⴻⵏ,

ⴰⵎⵎⵓ ⴰⴷ ⵙⵡⴻⵏ ⵎⴰⵔⵔⴰ ⵍⴻⴳⵏⵓⵙ ⵍⴻⴱⴷⴰ,

ⵡⴰⵀ, ⴰⴷ ⵙⵡⴻⵏ ⴰⴷ ⵙⴻⴽⴽⴼⴻⵏ,

ⴰⴷ ⴷⴻⵡⵍⴻⵏ ⴰⵅⵎⵉ ⵄⴻⵎⵎⴰⵔⵚ ⵡⴰⵔ ⵜⵓⵖⴰ ⴵⴰⵏ.

17 ⵎⴰⵛⴰ ⵅ ⵡⴻⴷⵔⴰⵔ ⵏ ⵚⵉⵀⵢⵓⵏ

ⴰⴷ ⵢⵉⵍⵉ ⵎⵉⵏ ⵉⵏⵏⴻⵊⵎⴻⵏ,

ⵓ ⵡⴰⵏⵉⵜⴰ ⴰⴷ ⵢⵉⵍⵉ ⴷ ⴰⵎⵇⴻⴷⴷⴻⵙ,

ⵓ ⵉⵏⵏⵉ ⵏ ⵜⴰⴷⴷⴰⵔⵜ ⵏ ⵢⴰⵄⵇⵓⴱ

ⴰⴷ ⵟⵟⴼⴻⵏ ⵜⵉⵙⴻⵇⵇⴰⵍ ⵏ ⵍⵡⴰⵔⵜ ⵏⵙⴻⵏ.   

18 ⵜⴰⴷⴷⴰⵔⵜ ⵏ ⵢⴰⵄⵇⵓⴱ ⴰⴷ ⵜⵉⵍⵉ ⴷ ⵜⵉⵎⴻⵙⵙⵉ,

ⵓ ⵜⴰⴷⴷⴰⵔⵜ ⵏ ⵢⵓⵙⵓⴼ ⴷ ⴰⵛⴻⵄⵄⴰⵍ,

ⵓⵛⴰ ⵜⴰⴷⴷⴰⵔⵜ ⵏ ⵄⵉⵙⵓ ⴰⴷ ⵜⵉⵍⵉ ⴰⵎ ⵢⵉⵖⴻⴵ

ⵓ ⵏⵉⵜⵏⵉ ⴰⴷ ⴰⵙⴻⵏ ⵙⵙⵛⴻⵎⴹⴻⵏ

ⵓ ⴰⴷ ⵜⴻⵏ ⵛⵛⴻⵏ,

ⴰⵍⴰⵎⵉ ⵡⴰⵔ ⵉⵇⵇⵉⵎ

ⵓⵍⴰ ⴷ ⵉⵊⵊ ⵉⴷⴷⴰⵔ ⴷⵉ ⵜⴰⴷⴷⴰⵔⵜ ⵏ ⵄⵉⵙⵓ,

ⵎⴰⵖⴰⵔ ⵙⵉⴷⵉ ⴰⵇⴰ ⵉⵙⵙⵉⵡⴻⵍ.”

19 “ⵉⵏⵏⵉ ⵏ ⵜⴻⵎⵎⵓⵔⵜ ⵏ ⵍⵊⴰⵏⵓⴱ

ⴰⴷ ⵟⵟⴼⴻⵏ ⵉⴷⵓⵔⴰⵔ ⵏ ⵄⵉⵙⵓ ⴷ ⵜⴰⵙⵖⴰⵔⵜ,

ⵓ ⵢⵉⵏⵏⵉ ⵏ ⵜⴻⵎⵎⵓⵔⵜ ⵉⵡⴰⵟⴰⵏ

ⴰⴷ ⵟⵟⴼⴻⵏ ⵜⴰⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴷ ⵍⵡⴰⵔⵜ

ⵡⴰⵀ, ⵏⵉⵜⵏⵉ ⴰⴷ ⵟⵟⴼⴻⵏ ⵉⵢⵢⴰⵔ ⵏ ⵉⴼⵔⴰⵢⵉⵎ

ⴷ ⵢⴻⵢⵢⴰⵔ ⵏ ⵙⴰⵎⴰⵔⵢⴰ ⴷ ⵍⵡⴰⵔⵜ,

ⵓ ⴱⵉⵏⵢⴰⵎⵉⵏ ⴰⴷ ⵉⵟⵟⴻⴼ ⵊⵉⵍⵄⴰⴷ ⴷ ⵍⵡⴰⵔⵜ,

20 ⵓ ⵉⵎⴻⵏⴼⵉⵢⵢⴻⵏ ⵣⵉ ⵍⵄⴻⵙⴽⴰⵔ-ⴰ

ⵉⵏⵏⵉ ⵉⴵⴰⵏ ⵖⴰⵔ ⴰⵢⵜ ⵏ ⵉⵙⵔⴰⵉⵍ

ⴰⴷ ⵟⵟⴼⴻⵏ ⵜⴰⵎⵎⵓⵔⵜ ⵏ ⴰⵢⵜ ⵏ ⴽⴻⵏⵄⴰⵏ

ⴷ ⵍⵡⴰⵔⵜ ⴰⵍ ⵚⴰⵔⴼⴰⵜ,

ⵓ ⵉⵎⴻⵏⴼⵉⵢⵢⴻⵏ ⵣⵉ ⵓⵔⵛⴰⵍⵉⵎ

ⵏⵏⵉ ⵉⴵⴰⵏ ⴷⵉ ⵚⴰⴼⴰⵔⴰⴷ,

ⴰⴷ ⵟⵟⴼⴻⵏ ⵜⵉⵏⴻⴷⴷⴰⵎ

ⵏ ⵜⴻⵎⵎⵓⵔⵜ ⵏ ⵍⵊⴰⵏⵓⴱ ⴷ ⵍⵡⴰⵔⵜ.   

21 ⵉⵎⵙⴻⵍⵍⴽⴻⵏ ⴰⴷ ⴳⴻⵄⵄⴷⴻⵏ ⴰⴷⵔⴰⵔ ⵏ ⵚⵉⵀⵢⵓⵏ,

ⵃⵉⵎⴰ ⴰⴷ ⵃⴰⴽⵎⴻⵏ ⴰⴷⵔⴰⵔ ⵏ ⵄⵉⵙⵓ,

ⵓⵛⴰ ⵜⴰⴳⴻⵍⴷⴰ ⴰⴷ ⵜⵉⵍⵉ ⵏ ⵙⵉⴷⵉ.”