ⵄⴰⵎⵓⵙ 4

1 “ⵙⵍⴻⵏⵜ, ⴰⵡⴰⵍ-ⴰ, ⴰ ⵜⵉⵢⴻⵏⴷⵓⵥⵉⵏ ⵏ ⴱⴰⵛⴰⵏ ⵏⵏⵉ ⵉⴵⴰⵏ ⵅ ⵡⴻⴷⵔⴰⵔ ⵏ ⵙⴰⵎⴰⵔⵢⴰ, ⵜⵉⵏⵏⵉ ⵉⵃⴻⵚⵚⴰⵔⴻⵏ ⵉⵎⵓⵇⵍⵉⵍⴻⵏ, ⵜⵉⵏⵏⵉ ⵉⵄⴻⴼⴼⵙⴻⵏ ⵅ ⵉⵎⴻⵥⵍⴰⴹ, ⵜⵉⵏⵏⵉ ⵉⵇⵇⴰⵔⴻⵏ ⵉ ⴰⵢⵜⴱⴰⴱ ⵏⵙⴻⵏ: ‘ⴰⵡⵢⴻⵎ-ⴷⴷ ⵛⴰ ⴰⵍⴰⵎⵉ ⵉ ⵖⴰ ⵏⴻⵙⵙⵓ!’ 2 ⵙⵉⴷⵉ ⵉⵏⵓ, ⵙⵉⴷⵉ, ⵉⵊⵊⵓⴵ ⵙ ⵜⵇⴻⴷⴷⴰⵙⵜ ⵏⵏⴻⵙ, ⴰⵇⴰ ⴰⴷ ⵅⴰⴽⴻⵏⵜ ⴷⴷ-ⴽⴽⴻⵏ ⵡⵓⵙⵙⴰⵏ, ⴰⴷ ⴽⴻⵏⵏⵉⵏⵜ ⴽⴽⵙⴻⵏ ⵙ ⵉⵖⴰⵏⵜⵛⵓⵜⴻⵏ ⵓ ⵎⵉⵏ ⵥⵥⴰⵢⴽⴻⵏⵜ ⵉⵇⵇⵉⵎⴻⵏ ⵙ ⵜⵚⴻⵏⵏⴰⵔⵉⵏ ⵏ ⵉⵙⴻⵍⵎⴰⵏ. 3 ⴽⴻⵏⵏⵉⵏⵜ ⴰⴷ ⵜⴻⴼⴼⵖⴻⵏⵜ ⵥⵉ ⵜⵉⵥⵥⴻⵢⵢⵉⵏ ⵏ ⵍⴻⵃⵢⵓⴹ, ⴽⵓⵍ ⵉⵛⵜ ⵏ ⵜⴻⵎⵖⴰⵔⵜ ⵏⵉⵛⴰⵏ ⵖⴰⵔ ⵥⵥⴰⵜ. ⴽⴻⵏⵏⵉⵏⵜ ⴰⴷ ⵜⵜⵡⴰⵙⴻⴽⴽⴻⵏⵜ ⵖⴰⵔ ⵀⴰⵔⵎⵓⵏ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.

4 ⵉⵡⴰ, ⴰⵙⴻⵎ-ⴷⴷ ⵖⴰⵔ ⴱⴰⵢⵜ-ⵉⵍ ⵓ ⵄⴻⴷⴷⴰⵎ, ⴰⵙⴻⵎ-ⴷⴷ ⵖⴰⵔ ⵊⵉⵍⵊⴰⵍ ⵓ ⴰⵔⵏⵉⵎ ⴷⴻⴳ ⵉⵄⴻⴷⴷⵉⵢⴻⵏ ⵏⵡⴻⵎ. ⵉⵡⴰ, ⴰⵡⵢⴻⵎ-ⴷⴷ ⵜⵉⵖⴰⵔⵚⴰ ⵏⵡⴻⵎ ⴽⵓⵍ ⵚⵚⴱⴻⵃ ⴷ ⵍⴻⵄⵛⵓⵔ ⵏⵡⴻⵎ ⵉⵛⵜ ⵏ ⵜⵡⴰⵍⴰ ⴷⵉ ⵜⵍⴰⵜⴰ ⵏ ⵡⵓⵙⵙⴰⵏ!    5 ⵉⵡⴰ, ⵙⴱⴻⵅⵅⴰⵔ ⵉⵛⵜ ⵏ ⵜⴻⵡⵀⵉⴱⵜ ⵏ ⵓⵇⴰⴷⵉ ⵙ ⵡⴻⵖⵔⵓⵎ ⴰⴽ-ⴷ ⵡⴻⵏⵜⵓⵏ ⵓ ⵍⴰⵖⴰⵎ ⵎⴰⵃⴻⵏⴷ ⴰⴷ ⵇⴻⴷⴷⵎⴻⵏ ⵜⵉⵡⵀⵉⴱⵉⵏ ⵙ ⵍⵅⴰⴹⴰⵔ, ⴱⴰⵔⵔⵃⴻⵎ ⵥⵥⴰⵢⴻⵙ, ⵎⴰⵖⴰⵔ ⴰⵎⵎⵓ ⵉ ⴷ ⴰⵡⴻⵎ ⵉⵜⵜⴻⵄⵊⵉⴱ, ⴰ ⴰⵢⵜ ⵏ ⵉⵙⵔⴰⵉⵍ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.”   

ⵉⵙⵔⴰⵉⵍ ⵡⴰⵔ ⵉⵡⵛ ⵜⴰⵢⵏⵉⵜ ⵉ ⵍⴻⵄⵍⴰⵎⴰⵜ ⵉ ⵉⵥⵡⴰⵔⴻⵏ ⵉ ⵍⵃⵓⴽⵎ

6 “ⵄⴰⵡⴻⴷ ⵏⴻⵛⵛ ⵊⵊⵉⵖ ⴰⵡⴻⵎ ⵜⴰⵥⴷⵓⴳⵉ ⵏ ⵜⴻⵖⵎⴰⵙ ⴷⵉ ⵎⴰⵔⵔⴰ ⵜⵉⵏⴻⴷⴷⴰⵎ ⵏⵡⴻⵎ ⵓ ⵜⵓⵇⵍⵉⵞ ⵏ ⵡⴻⵖⵔⵓⵎ ⴷⵉ ⵎⴰⵔⵔⴰ ⵉⵎⵓⵛⴰⵏ ⵏⵡⴻⵎ ⵎⴰⵏⵉ ⵜⵥⴻⴷⴷⵖⴻⵎ. ⵇⴰⵄ ⴰⵎⴻⵏⵏⵉ ⵎⴰⵛⴰ ⴽⴻⵏⵏⵉⵡ ⵡⴰⵔ ⴷⴷ-ⵜⴻⴷⵡⵉⵍⴻⵎ ⵖⴰⵔⵉ, ⵉⵇⵇⴰⵔ ⵙⵉⴷⵉ.

7 ⵏⴻⵛⵛ ⵙⵙⴱⴻⴷⴷⴻⵖ ⵅⴰⵡⴻⵎ ⴰⵏⵥⴰⵔ ⵓⵎⵉ ⴷⵉⵏ ⵄⴰⴷ ⵜⵍⴰⵜⴰ ⵏ ⵉⵢⵓⵔⴻⵏ ⴰⵍ ⵜⵎⴻⵢⵔⴰ ⵓ ⵏⴻⵛⵛ ⴳⴳⵉⵖ ⴰⴷ ⵉⵡⵡⴻⵜ ⵡⴻⵏⵥⴰⵔ ⵅ ⵉⵛⵜ ⵏ ⵜⴻⵏⴷⵉⵏⵜ, ⵎⴰⵛⴰ ⴷⵉ ⵜⴻⵏⴷⵉⵏⵜ ⵏⵏⴻⵖⵏⵉ ⵡⴰⵔ ⴳⴳⵉⵖ ⴰⴷ ⵉⵡⵡⴻⵜ ⵡⴻⵏⵥⴰⵔ. ⵉⵊⵊ ⵏ ⵢⴻⵢⵢⴰⵔ ⵉⵎⵎⴻⵡⵛ ⴰⵙ ⵡⴻⵏⵥⴰⵔ, ⵓ ⵉⵢⵢⴰⵔ ⵏⵏⴻⵖⵏⵉ ⵉ ⵅ ⵡⴰⵔ ⵉⵡⵜⵉ ⵡⴻⵏⵥⴰⵔ, ⵉⵏⵥⴻⵖ. 8 ⵜⵏⴰⵢⴻⵏ, ⵜⵍⴰⵜⴰ ⵏ ⵜⵏⴻⴷⴷⴰⵎ ⵓⵢⵓⵔⴻⵏⵜ ⵜⵜⴻⵏⵀⴻⵥⵥⴰⵏⵜ ⵖⴰⵔ ⵉⵛⵜ ⵏ ⵜⴻⵏⴷⵉⵏⵜ ⵏⵏⴻⵖⵏⵉ ⵎⴰⵃⴻⵏⴷ ⴰⴷ ⵙⵡⴻⵏⵜ ⴰⵎⴰⵏ, ⵎⴰⵛⴰ ⵏⵉⵜⴻⵏⵜⵉ ⵡⴰⵔ ⵊⵊⵉⵡⵏⴻⵏⵜ ⵛⴰ. ⵇⴰⵄ ⴰⵎⴻⵏⵏⵉ ⵎⴰⵛⴰ ⴽⴻⵏⵏⵉⵡ ⵡⴰⵔ ⴷⴷ-ⵜⴻⴷⵡⵉⵍⴻⵎ ⵖⴰⵔⵉ, ⵉⵇⵇⴰⵔ ⵙⵉⴷⵉ.

9 ⵏⴻⵛⵛ ⵡⵜⵉⵖ ⴽⴻⵏⵏⵉⵡ ⵙ ⵉⵎⴻⵏⴷⵉ ⵉⵜⵜⵡⴰⵙⵛⴻⵎⴹⴻⵏ ⵥⴻⴳ ⵓⵙⴻⵎⵎⵉⴹ, ⵙ ⵊⵊⵔⵉⵃⴻⵛⵜ ⵏ ⵜⵛⴻⵊⵊⴰⵔⵜ. ⴰⵟⵟⴰⵙ ⵏ ⵉⵃⵡⵉⵛⴻⵏ ⵏⵡⴻⵎ ⴷ ⵉⵎⴰⵔⵊⴰⵄⴻⵏ ⵏⵡⴻⵎ ⴷ ⵡⵓⵔⵜⴰⵏ ⵏⵡⴻⵎ ⴷ ⵜⵥⵉⵜⵓⵏⵉⵏ ⵏⵡⴻⵎ ⴰⵇⴰ ⵉⵛⵛⴰ ⵉ-ⵜⴻⵏ ⴱⵓ-ⵡⴻⵇⴹⴻⵄ. ⵇⴰⵄ ⴰⵎⴻⵏⵏⵉ ⵎⴰⵛⴰ ⴽⴻⵏⵏⵉⵡ ⵡⴰⵔ ⴷⴷ-ⵜⴻⴷⵡⵉⵍⴻⵎ ⵖⴰⵔⵉ, ⵉⵇⵇⴰⵔ ⵙⵉⴷⵉ.   

10 ⵏⴻⵛⵛ ⵙⵙⴻⴽⴽⴻⵖ-ⴷⴷ ⵊⴰⵔ ⴰⵡⴻⵎ ⵟⵟⴰⵄⵓⵏ, ⴰⵎⴻⵛⵏⴰⵡ ⴷⵉ ⵎⵉⵚⵔⴰ. ⵏⴻⵛⵛ ⵏⵖⵉⵖ ⵉⵃⵓⴷⵔⵉⵢⴻⵏ ⵏⵡⴻⵎ ⵙ ⵙⵙⵉⴼ, ⵉⵢⵙⴰⵏ ⵏⵡⴻⵎ ⵏⴻⴷⵀⴻⵖ ⵜⴻⵏ ⴷ ⵜⴰⴽⴻⵛⵛⴰⴹⵟ ⵓ ⴰⵔⵔⵉⵖ ⴰⵔⵔⵉⵃⴻⵜ ⵏ ⵍⵄⴻⵙⴽⴰⵔⴰⵜ ⵏⵡⴻⵎ ⴰⴷ ⵜⴳⴻⵄⵄⴻⴷ ⴰⵍ ⵡⴻⵏⵥⴰⵔⴻⵏ ⵏⵡⴻⵎ. ⵇⴰⵄ ⴰⵎⴻⵏⵏⵉ ⵎⴰⵛⴰ ⴽⴻⵏⵏⵉⵡ ⵡⴰⵔ ⴷⴷ-ⵜⴻⴷⵡⵉⵍⴻⵎ ⵖⴰⵔⵉ, ⵉⵇⵇⴰⵔ ⵙⵉⴷⵉ.

11 ⵏⴻⵛⵛ ⵙⵙⴻⵏⵇⴻⵍⴱⴻⵖ ⴽⴻⵏⵏⵉⵡ ⴰⵎ ⵎⴰⵎⵎⴻⵛ ⵜⵓⵖⴰ ⵉⵙⵙⵏⴻⵇⵍⴰⴱ ⴰⵔⴻⴱⴱⵉ ⵙⴰⴷⵓⵎ ⴷ ⵄⴰⵎⵓⵔⵔⴰ. ⵜⵓⵖⴰ ⴽⴻⵏⵏⵉⵡ ⴰⵎⴻⵛⵏⴰⵡ ⵉⵊⵊ ⵏ ⵓⴽⴻⵛⵛⵓⴹ ⴷⵉ ⵜⵎⴻⵙⵙⵉ ⵏⵏⵉ ⴷⴷ-ⵉⵜⵜⵡⴰⵇⴻⵍⵄⴻⵏ ⵥⴻⴳ ⵓⵃⴰⴷⵓⵇ ⵏ ⵜⵎⴻⵙⵙⵉ. ⵇⴰⵄ ⴰⵎⴻⵏⵏⵉ ⵎⴰⵛⴰ ⴽⴻⵏⵏⵉⵡ ⵡⴰⵔ ⴷⴷ-ⵜⴻⴷⵡⵉⵍⴻⵎ ⵖⴰⵔⵉ, ⵉⵇⵇⴰⵔ ⵙⵉⴷⵉ.   

12 ⵙ ⵓⵢⴻⵏⵏⵉ ⵏⴻⵛⵛ ⴰⴷ ⴰⵛ ⴳⴳⴻⵖ ⴰⵢⴰ, ⴰ ⵉⵙⵔⴰⵉⵍ! ⵎⵉⵏⵥⵉ ⵏⴻⵛⵛ ⴰⴷ ⴰⵛ ⴳⴳⴻⵖ ⵎⴰⵏ ⴰⵢⴰ, ⵃⴻⵥⵥⴻⵎ ⵉⵅⴻⴼ ⵏⵏⴻⴽ, ⴰ ⵉⵙⵔⴰⵉⵍ, ⵎⴰⵃⴻⵏⴷ ⴰⴷ ⵜⴻⵎⵎⴻⵍⵇⵉⴷ ⴰⴽ-ⴷ ⴰⵔⴻⴱⴱⵉ ⵏⵏⴻⴽ.

13 ⵎⴰⵖⴰⵔ ⵅⵥⴰⵔ, ⴷ ⵏⴻⵜⵜⴰ ⵉ ⵉⴽⴻⵡⵡⵏⴻⵏ ⵉⴷⵓⵔⴰⵔ ⵓ ⵉⵜⵜⴻⵊⵊⴰ-ⴷⴷ ⴰⵚⴻⵎⵎⵉⴹ ⵓ ⵉⵙⵙⵛⴰⵏ ⵎⵉⵏ ⴷⵉ ⵉⵜⵜⵅⴰⵔⵔⴻⵚ, ⴷ ⵡⴻⵏⵏⵉ ⵉⵜⵜⴰⵔⵔⴰⵏ ⵜⵓⴼⴼⵓⵜ ⵏ ⵍⵃⴰⵍ ⴷ ⵜⴰⴵⴻⵙⵜ ⵓ ⵉⴳⴳⵓⵔ ⵜⵉⵡⴰ ⵉ ⵍⴻⴳⵄⵓⴷⵉ ⵏ ⵜⴻⵎⵎⵓⵔⵜ, ⴰⵇⴰ: ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ ⴷ ⵉⵙⴻⵎ ⵏⵏⴻⵙ.”