ⵄⴰⵎⵓⵙ 3

ⵍⵃⵓⴽⵎ ⵏ ⵙⵉⴷⵉ ⵅ ⵉⵙⵔⴰⵉⵍ ⴷ ⵙⴰⵎⴰⵔⵢⴰ

1 “ⵙⵍⴻⵎ ⴰⵡⴰⵍ-ⴰ ⵉ ⴽⵉⴷⵡⴻⵎ ⵉⵙⵙⴰⵡⴰⵍ ⵙⵉⴷⵉ, ⴰ ⴰⵢⵜ ⵏ ⵉⵙⵔⴰⵉⵍ, ⴰⴽ-ⴷ ⴽⵓⵍ ⵍⴰⴵ ⵏⵏⵉ ⵙⵙⴳⴻⵄⵄⴷⴻⵖ ⵏⴻⵛⵛ ⵣⵉ ⵜⴻⵎⵎⵓⵔⵜ ⵏ ⵎⵉⵚⵔⴰ, ⴰⵎ ⵇⵇⴰⵔⴻⵖ: 2 ‘ⵣⵉ ⵎⴰⵔⵔⴰ ⵍⴰⴵⴰⵜ ⵏ ⴷⴷⵓⵏⴻⵛⵜ ⵙⵙⵏⴻⵖ ⵎⵖⵉⵔ ⴽⴻⵏⵏⵉⵡ. ⵅ ⵓⵢⴰ ⴰⴷ ⴽⴻⵏⵏⵉⵡ ⵄⴰⵇⴱⴻⵖ ⵅ ⵎⴰⵔⵔⴰ ⵍⵎⵓⵄⵚⵉⵢⵢⴰⵜ ⵏⵡⴻⵎ! 3 ⵎⴰ ⴰⴷ ⵓⵢⵓⵔⴻⵏ ⵜⵏⴰⵢⴻⵏ ⴰⴽ-ⴷ ⵡⴰⵢⴰⵡⵢⴰ, ⴱⵍⴰ ⵎⴰ ⵜⵜⴰⴼⵇⴻⵏ? 4 ⵎⴰ ⴰⴷ ⵉⵣⴻⵀⵀⴰⵔ ⵡⴰⵢⵔⴰⴷ ⴷⴻⴳ ⵡⴻⵣⵖⴰⵔ ⵍⴰⵎⵉ ⵡⴰⵔ ⵖⴰⵔⴻⵙ ⴱⵓ ⵣⵣⴰⵔⴷⴻⵜ? ⵎⴰ ⴰⵢⵔⴰⴷ ⴷ ⴰⵎⴻⵥⵢⴰⵏ ⴰⴷ ⵢⴻⵊⵊ ⵜⵎⵉⵊⵊⴰ ⵏⵏⴻⵙ ⴰⴷ ⵜᵉⵜⵜⵡⴰⵙⴻⵍ ⵣⴻⴳ ⵢⴻⴼⵔⵉ, ⴰⵎ ⵡⴰⵔ ⵉⵎⵏⵉⵄ ⵡⴰⵍⵓ?    5 ⵎⴰ ⴰⴷ ⵉⵏⴹⴰⵔ ⵡⴻⵊⴹⵉⴹ ⴷⵉ ⵍⴼⴻⵅ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ, ⵎⴰⵍⴰ ⵡⴰⵔ ⴷⵉⵏ ⴷⴰⵢⴻⵙ ⵎⴰⵛⵛⴰ ⵉ ⵏⴻⵜⵜⴰ? ⵎⴰ ⴰⴷ ⵉⵏⵏⵓⵔⴼⴻⵄ ⵍⴼⴻⵅ ⵣⵉ ⵜⴻⵎⵎⵓⵔⵜ ⵎⴰⵍⴰ ⵜⴻⵅⵡⴰ? 6 ⵎⴰⵍⴰ ⵃⴻⴷ ⵉⵙⵓⴹ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ ⴷⵉ ⵜⴻⵏⴷⵉⵏⵜ, ⵎⴰ ⵡⴰⵔ ⵉⵜⵜⴰⵔⵊⵉⵊⵉ ⵍⴳⴻⵏⵙ? ⵎⴰⵍⴰ ⵉⵎⵙⴰⵔ ⵉⵊⵊ ⵏ ⵓⵛⴻⵍⵡⴰⵡ ⴷⵉ ⵜⴻⵏⴷⵉⵏⵜ, ⵎⴰ ⵡⴰⵔ ⵜⵜ ⵉⴳⴳⵉ ⵙⵉⴷⵉ?   7 ⵎⴰⵖⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⵡⴰⵔ ⵉⵜⵜⴻⴳⴳ ⵓⵍⴰ ⴷ ⵉⵛⵜ ⵏ ⵍⵃⴰⵊⴻⵜ ⴱⵍⴰ ⵎⴰ ⴰⴷ ⵉⵙⵙⴰⵔⴳⴻⴱ ⵛⵛⵡⴰⵔ ⵏⵏⴻⵙ ⵉⵏⵏⵓⴼⴼⴰⵔⴻⵏ ⵉ ⵉⵎⵙⴻⵅⵅⴰⵔⴻⵏ ⵏⵏⴻⵙ, ⵉⵏⴰⴱⵉⵢⵢⴻⵏ. 8 ⴰⵢⵔⴰⴷ ⵉⵣⴻⵀⵀⴰⵔ, ⵎⴰⵏ ⵡⴻⵏ ⵡⴰⵔ ⵉⵜⵜⴻⴳⴳⵯⴷⴻⵏ? ⵙⵉⴷⵉ ⵉⵏⵓ, ⵙⵉⴷⵉ, ⴰⵇⴰ ⵉⵙⵙⵉⵡⴻⵍ, ⵎⴰⵏ ⵡⴻⵏ ⵡⴰⵔ ⵉⵜⵜⵏⴻⴱⴱⴰ?’ ”

9 “ⵊⵊⴻⵎ ⴰⴷ ⵉⵜⵜⵡⴰⵙⴻⵍ ⴰⵢⴰ ⴷⵉ ⵍⴻⵇⵚⵓⵔ ⴷⵉ ⴰⵛⴷⵓⴷ ⵓ ⴷⵉ ⵍⴻⵇⵚⵓⵔ ⵏ ⵜⴻⵎⵎⵓⵔⵜ ⵏ ⵎⵉⵚⵔⴰ, ⵉⵏⵉ: ‘ⵎⵓⵏⴻⵎ ⵅ ⵉⴷⵓⵔⴰⵔ ⵏ ⵙⴰⵎⴰⵔⵢⴰ ⵓ ⵅⵣⴰⵔⴻⵎ ⴰⵏⴻⵀⵡⴻⵍ ⴰⵎⴻⵇⵇⵔⴰⵏ ⴷⵉ ⵍⵡⴻⵙⵟ ⵏⵏⴻⵙ ⵓ ⵉⵏⵏⵉ ⴷⴰⵢⴻⵙ ⵉⵜⵜⵡⴰⵃⵚⴰⵔⴻⵏ!’ 10 ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵎⴰⵎⵎⴻⵛ ⵖⴰ ⴳⴳⴻⵏ ⵎⵉⵏ ⵉⵙⴻⴳⴳⴷⴻⵏ, ⵉⵇⵇⴰⵔ ⵙⵉⴷⵉ, ⵏⵉⵜⵏⵉ ⵉⵏⵏⵉ ⵉⵢⴰⵔⵔⵡⴻⵏ ⵍⵄⵓⵏⴼ ⴷ ⵜⴽⴻⵛⵛⴰⴹⵜ ⴷⵉ ⵍⴻⵇⵚⵓⵔ ⵏⵙⴻⵏ.’ 11 ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵉⵊⵊ ⵏ ⵍⴻⵄⴷⵓ! ⵏⴻⵜⵜⴰ ⵉⵜⵜⴻⵏⵏⴻⴹ ⵉ ⵜⴻⵎⵎⵓⵔⵜ ⵎⴰⵔⵔⴰ! ⴰⴷ ⵉⵙⵙⴻⵀⵡⴰ ⵊⵊⴻⵀⴷ ⵏⵏⴻⵎ ⵣⵣⴰⵢⴻⵎ ⵓ ⵍⴻⵇⵚⵓⵔ ⵏⵏⴻⵎ ⴰⴷ ⵜⵜⵡⴰⴽⴻⵛⵛⴹⴻⵏ.’    12 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⴰⵎ ⵉⴼⴻⴽⴽ ⵉⵊⵊ ⵏ ⵓⵎⴻⴽⵙⴰⵡ ⵜⵏⴰⵢⴻⵏ ⵏ ⵉⴹⴰⵔⴻⵏ ⵏⵉⵖ ⵉⵊⵊ ⵏ ⵢⵉⵅⴻⴼ ⵏ ⵓⵎⴻⵣⵣⵓⵖ ⵣⴻⴳ ⵓⵇⴻⵎⵎⵓⵎ ⵏ ⵡⴰⵢⵔⴰⴷ, ⴰⵎⵎⵓ ⵉ ⵖⴰ ⵜⵜⵡⴰⵙⵙⵏⴻⵊⵎⴻⵏ ⴰⵢⵜ ⵏ ⵉⵙⵔⴰⵉⵍ, ⵉⵏⵏⵉ ⵉ ⴷⵉⵏ ⵉⵜⵜⵖⵉⵎⴰⵏ ⴷⵉ ⵙⴰⵎⴰⵔⵢⴰ ⵅ ⵜⵎⴰ ⵏ ⵇⴰⵎⴰ ⵓ ⵅ ⵢⵉⵛⵜ ⵏ ⵜⵣⴻⵔⴱⵉⵢⵢⴻⵜ ⵣⵉ ⴷⵉⵎⴰⵛⵇ ⴳⴳⵉⵏ ⵜⵜ ⵅ ⵢⵉⵛⵜ ⵏ ⵍⴻⵎⵟⴰⵔⴱⴻⵜ.’ ”

13 “ⵙⵍⴻⵎ ⵓ ⵛⴻⵀⴷⴻⵎ ⴷⵉ ⵜⴰⴷⴷⴰⵔⵜ ⵏ ⵢⴰⵄⵇⵓⴱ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ. 14 ⵎⵉⵏⵣⵉ ⴷⴻⴳ ⵡⴰⵙⵙ ⵏⵏⵉ ⴷⵉ ⵖⴰ ⵅⴻⵍⴼⴻⵖ ⵉⵅⴻⵟⵟⴰⵏ ⵏ ⵉⵙⵔⴰⵉⵍ, ⴰⴷ ⵙⵙⵉⵡⴹⴻⵖ ⵄⴰⵡⴻⴷ ⴰⵅⴻⴵⴻⵚ ⵅ ⵉⵄⴰⵍⵟⴰⵔⴻⵏ ⵏ ⴱⴰⵢⵜ-ⵉⵍ, ⵎⴰⵖⴰⵔ ⴰⴷ ⵜⵜⵡⴰⵇⴻⴹⵄⴻⵏ ⵡⴰⵛⵛⴰⵡⴻⵏ ⵏ ⵓⵄⴰⵍⵟⴰⵔ, ⴰⴷ ⵡⴹⴰⵏ ⵖⴰⵔ ⵜⴻⵎⵎⵓⵔⵜ. 15 ⵏⴻⵛⵛ ⴰⴷ ⵀⴻⴷⵎⴻⵖ ⵜⴰⵣⴻⴷⴷⵉⵖⵜ ⵏ ⵜⴳⴰⵔⵙⵜ ⴷ ⵜⵣⴻⴷⴷⵉⵖⵜ ⵏ ⵓⵏⴻⴱⴷⵓ ⵓ ⵜⵓⴷⵔⵉⵏ ⵏ ⵍⵄⴰⵊ ⴰⴷ ⵜⵜⵡⴰⵇⴹⴰⵏⵜ, ⵓ ⴰⵟⵟⴰⵙ ⵏ ⵜⵓⴷⵔⵉⵏ ⴰⴷ ⵜⵜⵡⴰⵔⴻⴷⴵⴻⵏⵜ!’, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.”