ⵍⵃⵓⴽⵎ ⵅ ⵉⵙⵔⴰⵉⵍ ⴷ ⵉⴽⴻⵀⵀⴰⵏⴻⵏ ⵏⵏⴻⵙ
5
1 “ⵙⵍⴻⵎ ⴰⵢⴰ, ⴽⴻⵏⵏⵉⵡ ⵉⴽⴻⵀⵀⴰⵏⴻⵏ, ⵃⴹⴰⵎ ⴽⴻⵏⵏⵉⵡ ⴰⵢⵜ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ ⵓ ⵡⵛⴻⵎ ⴰⵎⴻⵣⵣⵓⵖ, ⴽⴻⵏⵏⵉⵡ, ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏ ⵓⵊⴻⴵⵉⴷ, ⵎⴰⵖⴰⵔ ⵜⴷⴻⵡⵍⴻⵎ ⴷ ⵉⵊⵊ ⵏ ⵍⴼⴻⵅ ⴷⵉ ⵎⵉⵚⴼⴰⵜ ⴷ ⵉⵛⵜ ⵏ ⵜⵔⴰⵛⵛⴰ ⵢⴰⵔⴻⵣⵎⴻⵏ ⵅ ⵡⴻⴷⵔⴰⵔ ⵏ ⵜⴰⴱⵓⵔ. 2 ⵉⵏⵏⵉ ⵉ ⴷⴷ-ⵉⵜⵜⴻⴼⴼⵖⴻⵏ ⵣⴻⴳ ⵡⴻⴱⵔⵉⴷ ⵙⵙⵉⴵⵖⴻⵏ ⵜⴰⵙⵔⴰⴼⵜ ⵏ ⵡⴻⵏⵖⴰⵢ, ⵎⴰⵛⴰ ⵏⴻⵛⵛ ⴰⴷ ⵜⴻⵏ ⵄⴰⵇⴱⴻⵖ ⵎⴰⵔⵔⴰ. 3 ⵏⴻⵛⵛ ⵙⵙⵏⴻⵖ ⵉⴼⵔⴰⵢⵉⵎ ⵓ ⵉⵙⵔⴰⵉⵍ ⵡⴰⵔ ⵉⵣⴻⵎⵎⴰⵔ ⴰⴷ ⵣⵣⴰⵢⵉ ⵉⵏⵏⵓⴼⴼⴰⵔ. ⵎⴰⵖⴰⵔ ⵍⴻⵅⵅⵓ ⵉⵙⵙⴻⴼⵙⴻⴷ ⵉⴼⵔⴰⵢⵉⵎ ⵉⵅⴻⴼ ⵏⵏⴻⵙ, ⵉⵙⵔⴰⵉⵍ ⵉⵙⵙⴻⵅⵎⴻⵊ ⵉⵅⴻⴼ ⵏⵏⴻⵙ. 4 ⵜⵉⵎⴻⴳⴳⴰ ⵏⵙⴻⵏ ⵜⵎⴻⵏⵏⵄⴻⵏⵜ ⵉ-ⵜⴻⵏ ⴰⴷ ⴷⴷ-ⴷⴻⵡⵍⴻⵏ ⵖⴰⵔ ⴰⵔⴻⴱⴱⵉ, ⵎⴰⵖⴰⵔ ⵉⵊⵊ ⵏ ⴱⵓⵃⴱⴻⵍ ⵏ ⴼⴰⵔⵇ-ⵛⵛⵖⴻⵍ ⴰⵇⴰ-ⵜ ⴷⵉ ⵍⵡⴻⵙⵟ ⵏⵙⴻⵏ ⵓⵛⴰ ⵡⴰⵔ ⵙⵙⵉⵏⴻⵏ ⵙⵉⴷⵉ. ■ 5 ⴰⵄⴻⴼⴼⴰⵔ ⵏ ⵉⵙⵔⴰⵉⵍ ⴰⴷ ⵅⴰⵙ ⵉⴷⵄⴰ ⵙ ⴱⵟⴰⵢⵟⴰⵢ. ⵉⵙⵔⴰⵉⵍ ⴷ ⵉⴼⵔⴰⵢⵉⵎ ⴰⴷ ⵏⵇⴰⵔⴹⴻⵏ ⵣⵉ ⵍⵎⵓⵄⵚⵉⵢⵢⴻⵜ ⵏⵙⴻⵏ ⵓⵍⴰ ⴷ ⵢⴰⵀⵓⴷⴰ ⴰⴷ ⴽⵉⴷⵙⴻⵏ ⵉⵏⵇⴰⵔⴹ. ■ 6 ⵏⵉⵜⵏⵉ ⴰⴷ ⴰⴳⴳⵯⴻⵊⴻⵏ ⴰⴽ-ⴷ ⵡⵓⴵⵉ ⵏⵙⴻⵏ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⵏⵙⴻⵏ, ⵃⵉⵎⴰ ⴰⴷ ⴰⵔⵣⵓⵏ ⵅ ⵙⵉⴷⵉ, ⵎⴰⵛⴰ ⵏⵉⵜⵏⵉ ⵡⴰⵔ ⵜ ⵜⵜⵉⴼⴻⵏ. ⵏⴻⵜⵜⴰ ⴰⵇⴰ ⵉⵙⵙⵏⵓⴼⴼⴰⵔ ⵉⵅⴻⴼ ⵏⵏⴻⵙ ⵅⴰⵙⴻⵏ. 7 ⵏⵉⵜⵏⵉ ⵖⴷⴰⵔⴻⵏ ⵙⵉⴷⵉ ⵎⴰⵖⴰⵔ ⵏⵉⵜⵏⵉ ⵊⵊⵉⵏ-ⴷⴷ ⵜⴰⵔⵡⴰ ⵏ ⴼⴰⵔⵇ-ⵛⵛⵖⴻⵍ. ⵍⴻⵅⵅⵓ ⴰⴷ ⵜⴻⵏ ⵢⴻⵛⵛ ⵓⵢⵓⵔ ⴰⵎⴰⵢⵏⵓ ⴰⴽ-ⴷ ⵜⵙⴻⵇⵇⴰⵍ ⵏⵙⴻⵏ ⵏ ⵍⵡⴰⵔⵜ.” 8 “ⵙⵓⴹⴻⵎ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ ⴷⵉ ⵊⵉⴱⵄⴰ, ⴷⵉ ⵍⴱⵓⵇ ⴷⵉ ⵔⴰⵎⴰ, ⴰⴷ ⵙⵖⵓⵢⴻⵏ ⵉⵎⴻⵣⴷⴰⵖ ⵏ ⴱⴰⵢⵜ-ⴰⵡⴰⵏ: ‘ⴰⵡⴰⵔⵏⵉ ⴰⵛ, ⴰ ⴱⵉⵏⵢⴰⵎⵉⵏ!’ 9 ⵉⴼⵔⴰⵢⵉⵎ ⴰⴷ ⵉⴷⵡⴻⵍ ⴷ ⵉⵛⵜ ⵏ ⵍⵇⴻⵛⵄⴻⵜ ⵏ ⵓⵏⴻⵅⵍⵉⵄ ⴷⴻⴳ ⵡⴰⵙⵙ ⵏ ⵍⵄⵉⵇⴰⴱ. ⵏⴻⵛⵛ ⴱⴰⵔⵔⵃⴻⵖ ⵊⴰⵔ ⵜⵇⴻⴱⴱⴰⵍ ⵏ ⵉⵙⵔⴰⵉⵍ ⵎⵉⵏ ⵉⵜⵜⵡⴰⴳⴳ ⴰⴷ ⵉⵎⵙⴰⵔ. 10 ⵍⵃⵓⴽⴽⴰⵎ ⵏ ⵢⴰⵀⵓⴷⴰ ⵜⵜⴻⴳⴳⴻⵏ ⴰⵎ ⵢⵉⵏⵏⵉ ⵉⵙⵙⵎⵓⵟⵟⵓⵢⴻⵏ ⵉⵥⵔⴰ ⵏ ⵡⴻⵢⵎⵉⵔ. ⵏⴻⵛⵛ ⴰⴷ ⵅⴰⵙⴻⵏ ⵣⴻⴵⵄⴻⵖ ⴰⴷⵓⵇⵇⴻⵣ ⵉⵏⵓ ⵏ ⵓⴼⵓⴳⴻⵎ ⴰⵎ ⵡⴰⵎⴰⵏ.”
11 “ⵉⴼⵔⴰⵢⵉⵎ ⵉⵜⵜⵡⴰⵃⵚⴰⵔ, ⵍⵃⴻⵇⵇ ⵉⵜⵜⵡⴰⵍⴱⴻⵣ, ⵎⴰⵖⴰⵔ ⵉⵄⵊⴻⴱ ⴰⵙ ⵎⴰⵃⴻⵏⴷ ⴰⴷ ⵉⴹⴼⴰⵔ ⵉⵛⵜ ⵏ ⵜⴻⵡⵚⴻⵢⵢⴻⵜ ⵏ ⵍⴱⴰⵟⴻⵍ. 12 ⵏⴻⵛⵛ ⴰⵎ ⵜⵛⵉⵏⴷⴰ ⵉ ⵉⴼⵔⴰⵢⵉⵎ ⵓ ⴰⵎ ⵓⵔⴻⵚⵚⵓⴹ ⵉ ⵜⴰⴷⴷⴰⵔⵜ ⵏ ⵢⴰⵀⵓⴷⴰ. 13 ⵓⵎⵉ ⵉⵥⵔⴰ ⵉⴼⵔⴰⵢⵉⵎ ⵍⴻⵀⵍⴰⵛ ⵏⵏⴻⵙ ⵓ ⵢⴰⵀⵓⴷⴰ ⵜⴰⵔⴻⵃⵙⵉⵜ ⵏⵏⴻⵙ, ⵢⵓⵢⵓⵔ ⵉⴼⵔⴰⵢⵉⵎ ⵖⴰⵔ ⴰⵛⵛⵓⵔ, ⵉⵙⵙⴻⴽⴽ ⵉⵊⵊ ⵏ ⵓⵔⴻⵇⵇⴰⵙ ⵖⴰⵔ ⵓⵊⴻⴵⵉⴷ ⵢⴰⵔⵉⴱ. ⵎⴰⵛⴰ ⵡⴰⵏⵉⵜⴰ ⵡⴰⵔ ⵉⵣⴻⵎⵎⴰⵔ ⴰⴷ ⴽⴻⵏⵏⵉⵡ ⵉⵙⵙⴳⴻⵏⴼⴰ ⵓ ⵡⴰⵔ ⵅⴰⵡⴻⵎ ⵉⴽⴻⵙⵙⵉ ⵜⴰⵔⴻⵃⵙⵉⵜ ⵏⵡⴻⵎ. □ 14 ⵎⴰⵖⴰⵔ ⵏⴻⵛⵛ ⴰⴷ ⵉⵍⵉⵖ ⵉ ⵉⴼⵔⴰⵢⵉⵎ ⴰⵎ ⵡⴻⵢⵔⴰⴷ ⵉⵣⴻⵀⵀⴰⵔⴻⵏ ⵓ ⴰⵎ ⵡⴻⵢⵔⴰⴷ ⴰⵎⴻⵥⵢⴰⵏ ⵉ ⵜⴰⴷⴷⴰⵔⵜ ⵏ ⵢⴰⵀⵓⴷⴰ. ⵏⴻⵛⵛ, ⵡⴰⵀ ⵏⴻⵛⵛ, ⴰⴷ ⵎⴻⵣⵣⵇⴻⵖ ⵓ ⵅⴻⵏⵏⵉ ⴰⴷ ⵓⵢⵓⵔⴻⵖ, ⴰⴷ ⵜ ⴰⵡⵢⴻⵖ ⵓⵛⴰ ⵡⴰⵔ ⴷⵉⵏ ⵡⵉ ⵖⴰ ⵉⴼⴻⴽⴽⴻⵏ. 15 ⵏⴻⵛⵛ ⴰⴷ ⴼⴼⵖⴻⵖ ⵓ ⵅⴻⵏⵏⵉ ⴰⴷ ⵄⴻⵇⴱⴻⵖ ⵖⴰⵔ ⵡⴻⵎⵛⴰⵏ ⵉⵏⵓ, ⴰⵍ ⵖⴰ ⵏⴻⵄⵎⴻⵏ ⵓ ⴰⴷ ⴰⵔⵣⵓⵏ ⵓⴷⴻⵎ ⵉⵏⵓ. ⴷⵉ ⵍⴻⵃⵚⴰⵔⴻⵜ ⵏⵙⴻⵏ ⴰⴷ ⵅⴰⴼⵉ ⴰⵔⵣⵓⵏ ⵣⵉⵛ ⵖⴰⵔ ⵚⵚⴱⴻⵃ.”