ⴰⵡⴰⵍ ⵏ ⵙⵉⴷⵉ ⴹⵉⴷⴷ ⵉ ⵉⴽⴻⵀⵀⴰⵏⴻⵏ ⴷ ⵍⴳⴻⵏⵙ
4
1 “ⵙⵍⴻⵎ ⵉ ⵡⴰⵡⴰⵍ ⵏ ⵙⵉⴷⵉ, ⴰⵢⵜ ⵏ ⵉⵙⵔⴰⵉⵍ, ⵎⴰⵖⴰⵔ ⵙⵉⴷⵉ ⵉⴽⵙⵉ ⵜⴰⵏⴼⵓⵍⵜ ⴹⵉⴷⴷ ⵉ ⵉⵎⴻⵣⴷⴰⵖ ⵏ ⵜⴻⵎⵎⵓⵔⵜ, ⵎⵉⵏⵣⵉ ⵡⴰⵔ ⴷⵉⵏ ⵢⴻⴵⵉ ⵍⴰⵎⴰⵏ ⵏⵉⵖ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵓⵍⴰ ⴷ ⵜⵓⵙⵙⵏⴰ ⵏ ⴰⵔⴻⴱⴱⵉ ⴷⵉ ⵜⴻⵎⵎⵓⵔⵜ. ■ 2 ⵜⵉⴽⴽⵯⵓⵔⴰ ⴷ ⵉⵅⴰⵔⵔⵉⵇⴻⵏ ⴷ ⵓⵎⴻⵏⵖⵉ ⴷ ⵜⵓⵛⵛⴻⴼⴼⵔⴰ ⴷ ⵣⵣⵉⵏⴰ! ⴰⵇⴰ ⴰⵜⴻⵏ ⴷⴷⵓⵇⵇⵣⴻⵏ, ⴰⵙⵉⵣⵣⴻⵍ ⵏ ⵉⴷⴰⵎⵎⴻⵏ ⴰⵡⴰⵔⵏⵉ ⵉ ⵓⵙⵉⵣⵣⴻⵍ ⵏ ⵉⴷⴰⵎⵎⴻⵏ. 3 ⵅ ⵓⵢⴰ ⵜⵛⴻⵟⵟⴻⵏ ⵜⴰⵎⵎⵓⵔⵜ ⵓ ⴽⵓⵍ ⵉⵊⵊⴻⵏ ⵉ ⴷⴰⵢⴻⵙ ⵉⵣⴻⴷⴷⵖⴻⵏ ⵉⵜⵜⴰⵥⴻⵖ: ⵍⴻⵡⵃⵓⵛ ⵏ ⵢⴻⵢⵢⴰⵔ ⴷ ⵢⵉⵊⴹⴰⴹ ⵏ ⵓⵊⴻⵏⵏⴰ, ⵡⴰⵀ, ⵓⵍⴰ ⴷ ⵉⵙⴻⵍⵎⴰⵏ ⴷⵉ ⵍⴻⴱⵃⴰⵔ ⵜⵜⵡⴰⴽⴽⵙⴻⵏ. 4 ⵎⴰⵛⴰ ⵓⵛⵜ ⵅ ⵡⴻⵔⵢⴰⵣ ⵏⵏⵉ ⵉ ⴷ ⵖⴰ ⵉⴽⵙⵉⵏ ⵜⴰⵏⴼⵓⵍⵜ ⵓ ⵓⵛⵜ ⵅ ⵡⴻⵔⵢⴰⵣ ⵏⵏⵉ ⵉ ⵖⴰ ⵉⵛⴻⵜⵛⴰⵏ. ⵍⴳⴻⵏⵙ ⵏⵏⴻⵛ ⴰⵅⵎⵉ ⵢⵉⵏⵏⵉ ⵉⵜⵜⴻⵎⵛⵓⴱⴱⵛⴻⵏ ⴰⴽ-ⴷ ⵓⴽⴻⵀⵀⴰⵏ. 5 ⵙ ⵓⵣⵉⵍ ⴰⴷ ⵜⴻⵏⵇⴰⵔⴹⴻⴷ ⵓ ⵙ ⴵⵉⵍⴻⵜ ⴰⴷ ⵉⵏⵇⴰⵔⴹ ⵄⴰⴷ ⴰⵏⴰⴱⵉ ⴰⴽⵉⴷⴻⴽ, ⵓ ⵢⴻⵎⵎⴰⵛ ⴰⴷ ⵜⵜ ⵙⵙⵀⴻⵍⵍⴽⴻⵖ. 6 ⵍⴳⴻⵏⵙ ⵉⵏⵓ ⵉⴷⵡⴻⵍ ⴷ ⴰⵢⵏⴰⵡ, ⵎⵉⵏⵣⵉ ⴰⵇⴰ-ⵜ ⴱⵍⴰ ⵜⵓⵙⵙⵏⴰ. ⵓⵎⵉ ⵛⴻⴽ ⵜⴻⵏⴹⴰⵔⴻⴷ ⵜⵓⵙⵙⵏⴰ, ⵏⴹⴰⵔⴻⵖ ⵛⴻⴽ ⵎⴰⵃⴻⵏⴷ ⵡⴰⵔ ⴷ ⴰⵢⵉ ⵜⵙⴻⵅⵅⴰⵔⴻⴷ ⵄⴰⴷ ⴰⵎ ⵓⴽⴻⵀⵀⴰⵏ. ⵓⵎⵉ ⵛⴻⴽ ⵜᵉⵜⵜⵓⴷ ⵛⵛⴰⵔⵉⵄⴰ ⵏ ⴰⵔⴻⴱⴱⵉ, ⵓⵍⴰ ⴷ ⵏⴻⵛⵛ ⴰⴷ ⵜⵜⵓⵖ ⵉⵃⴻⵏⵊⵉⵔⴻⵏ ⵏⵏⴻⵛ. 7 ⵎⴰⵎⵎⴻⵛ ⵎⴰ ⵡⴻⵙⵄⴻⵏ¸ ⴰⵔⵏⵉⵏ ⴷⵉ ⴷⴷⵏⵓⴱ ⴰⴽⵉⴷⵉ. ⴰⴷ ⴰⵔⵔⴻⵖ ⵛⵛⴰⵏ ⵏⵙⴻⵏ ⴷ ⵍⴻⴼⴹⵉⵃⴻⵜ. 8 ⵏⵉⵜⵏⵉ ⵜⵜᵉⵜⵜⴻⵏ ⵣⵉ ⴷⴷⵏⵓⴱ ⵏ ⵍⴳⴻⵏⵙ ⵉⵏⵓ ⵓ ⵙ ⵡⵓⵍ ⵏⵙⴻⵏ ⵜⵜⴰⵔⵔⴰⵏ ⵎⴻⵥⵔⵉ ⵉ ⵍⵎⵓⵄⵚⵉⵢⵢⴻⵜ ⵏⵙⴻⵏ. 9 ⴰⵎ ⵎⴰⵎⵎⴻⵛ ⵉ ⵉⴵⴰ ⵓⴽⴻⵀⵀⴰⵏ, ⴰⵎⵎⵓ ⵉ ⵖⴰ ⵢⵉⵍⵉ ⵓⵍⴰ ⴷ ⵍⴳⴻⵏⵙ. ⵏⴻⵛⵛ ⴰⴷ ⴷⴰⵢⴻⵙ ⵅⴻⵍⴼⴻⵖ ⵉⴱⵔⵉⴷⴻⵏ ⵏⵏⴻⵙ ⵓ ⵜⵉⵎⴻⴳⴳⴰ ⵏⵏⴻⵙ ⴰⴷ ⴰⵙ ⵜⴻⵏⵜ ⵅⴻⴵⵚⴻⵖ. ■ 10 ⵏⵉⵜⵏⵉ ⴰⴷ ⵛⵛⴻⵏ, ⵎⴰⵛⴰ ⵡⴰⵔ ⵜᵉⵜⵜⵊⵊⵉⵡⵉⵏⴻⵏ ⵛⴰ, ⵏⵉⵜⵏⵉ ⴰⴷ ⵙⵙⴼⴻⵙⴷⴻⵏ ⵉⵅⴻⴼ ⵏⵙⴻⵏ, ⵎⴰⵛⴰ ⵡⴰⵔ ⵜⵜⵎⴰⵔⴻⵏⵢⴻⵏ, ⵎⵉⵏⵣⵉ ⵏⵉⵜⵏⵉ ⵙⴻⵎⵃⴻⵏ ⴷⴻⴳ ⵓⵃⴻⵜⵜⵓ ⵏ ⵜⵙⴻⵅⵅⴰⵔⵜ ⵉ ⵙⵉⴷⵉ. ■ 11 ⴼⴰⵔⵇ-ⵛⵛⵖⴻⵍ ⴷ ⴱⵉⵏⵓ ⵓ ⴱⵉⵏⵓ ⵏ ⵊⴷⵉⴷ ⴰⵇⴰ ⴽⴽⵙⴻⵏ ⵓⵍ ⵉ ⴱⵏⴰⴷⴻⵎ. 12 ⵍⴳⴻⵏⵙ ⵉⵏⵓ ⵉⵜⵜⵙⴻⵇⵙⴰ ⵚⵚⴰⵏⴰⵎ ⵏⵏⴻⵙ ⵏ ⵓⴽⴻⵛⵛⵓⴹ ⵓ ⵜⴰⵖⵖⴰⵔⵛⵜ ⵏⵏⴻⵙ ⴰⴷ ⴰⵙ ⵜⴻⵡⵛ ⵍⴻⵅⴱⴰⵔ, ⵎⵉⵏⵣⵉ ⴱⵓⵃⴱⴻⵍ ⵏ ⴼⴰⵔⵇ-ⵛⵛⵖⴻⵍ ⵉⵖⴰⵔⵔⴰ ⵉ-ⵜⴻⵏ ⴰⵍⴰⵎⵉ ⴼⴼⵖⴻⵏ ⵙ ⴼⴰⵔⵇ-ⵛⵛⵖⴻⵍ ⵏⵙⴻⵏ ⵣⵉ ⵙⴰⴷⵓ ⴰⵃⴻⵟⵟⵓ ⵏ ⴰⵔⴻⴱⴱⵉ ⵏⵙⴻⵏ. ■ 13 ⵅ ⵜⵇⵉⵛⵛⴰⵜ ⵏ ⵉⴷⵓⵔⴰⵔ ⵜⵜⵇⴻⴷⴷⴰⵎⴻⵏ ⵜⵉⵖⴰⵔⵚⴰ ⵓ ⵅ ⵜⴻⵡⵔⵉⵔⵉⵔⵉⵏ ⵜⵜⴰⵡⵢⴻⵏ ⵜⵉⵡⵀⵉⴱⵉⵏ ⵏ ⵍⴻⴱⵅⵓⵔ, ⵙⴰⴷⵓ ⵍⴱⴻⴵⵓⴹ ⴷ ⵚⵚⴻⴼⵚⴰⴼ ⴷ ⵜⵛⴻⵊⵊⴰⵔⵜ ⵏ ⵢⵉⴳⴳ, ⵎⵉⵏⵣⵉ ⵜⵉⵍⵉ ⵏⵙⴻⵏ ⵜⴻⵚⴱⴻⵃ. ⵅ ⵓⵢⴰ ⵙⵙⴻⴼⵙⴰⴷⴻⵏⵜ ⵢⴻⵙⵙⵉⵜⵡⴻⵎ ⵉⵅⴻⴼ ⵏⵙⴻⵏⵜ ⵓ ⵜⵉⵙⵍⴰⵜⵉⵏ ⵏⵡⴻⵎ ⵜⵜⴰⵔⴻⵥⵥⴰⵏⵜ ⵍⴻⵎⵍⴰⵛ ⵙ ⵣⵣⵉⵏⴰ. ■ 14 ⵎⴰⵛⴰ ⵏⴻⵛⵛ ⵡⴰⵔ ⵙⵙⵉⵡⵉⴹⴻⵖ ⵍⵃⵓⴽⵎ ⵅ ⵢⴻⵙⵙⵉⵜⵡⴻⵎ ⵓⵎⵉ ⵙⵙⴼⴻⵙⴷⴻⵏⵜ ⵉⵅⴻⴼ ⵏⵙⴻⵏⵜ ⵓⵍⴰ ⵅ ⵜⴻⵙⵍⴰⵜⵉⵏ ⵏⵡⴻⵎ ⵓⵎⵉ ⵜⵜⴰⵔⴻⵥⵥⴰⵏⵜ ⵍⴻⵎⵍⴰⵛ ⵙ ⵣⵣⵉⵏⴰ. ⴰⵇⴰ ⵏⵉⵜⴻⵏⵜⵉ ⵃⵓⵣⴻⵏⵜ ⵉⵅⴻⴼ ⵏⵙⴻⵏⵜ ⴰⴽ-ⴷ ⵜⴻⵎⵖⴰⵔⵉⵏ ⵏ ⴼⴰⵔⵇ-ⵛⵛⵖⴻⵍ ⵓ ⵜⵜⵇⴻⴷⴷⴰⵎⴻⵏⵜ ⵜⵉⵖⴰⵔⵚⴰ ⵊⵎⵉⵄ ⴰⴽ-ⴷ ⵜⴻⵎⵖⴰⵔⵉⵏ ⵏ ⴼⴰⵔⵇ-ⵛⵛⵖⴻⵍ ⵏ ⵣⵣⴰⵡⴻⵛⵜ. ⴰⴷ ⵉⵡⴹⴰ ⵍⴳⴻⵏⵙ ⵉ ⵡⴰⵔ ⵖⴰⵔ ⵉⴵⵉ ⵍⴻⵄⵇⴻⵍ.”15 “ⵡⴰⵅⵅⴰ ⵛⴻⴽ, ⵉⵙⵔⴰⵉⵍ, ⵜⴻⵙⵙⴻⴼⵙⴻⴷⴻⴷ ⵉⵅⴻⴼ ⵏⵏⴻⵛ, ⵡⴰⵔ ⵜⵜⴰⵔⵔⵉ ⵓⵍⴰ ⴷ ⵢⴰⵀⵓⴷⴰ ⴷ ⴱⵓ-ⵓⵎⴰⵔⵡⴰⵙ. ⵡⴰⵔ ⴷⴷ-ⵜⵜⵉⵙⵉⵎ ⵖⴰⵔ ⵊⵉⵍⵊⴰⵍ, ⵡⴰⵔ ⵜⵜⴳⴻⵄⵄⴰⴷⴻⵎ ⵖⴰⵔ ⴱⴰⵢⵜ-ⴰⵡⴰⵏ ⵓ ⵡⴰⵔ ⵜⵜⵊⴰⴵⴰⵎ: ‘ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ!’ 16 ⵎⵉⵏⵣⵉ ⵉⵙⵔⴰⵉⵍ ⴷⴰⵢⴻⵙ ⵜⴰⵖⴻⵏⵏⴰⵏⵜ ⴰⵎ ⵢⵉⵛⵜ ⵏ ⵜⴼⵓⵏⴰⵙⵜ ⵜⵄⴰⵔⵔⴻⵏ. ⵅⴻⵏⵏⵉ ⵍⴻⵅⵅⵓ, ⴰⴷ ⵜⴻⵏ ⵢⴰⵔⵡⴻⵙ ⵙⵉⴷⵉ ⴰⵎ ⵢⵉⵊⵊ ⵏ ⵢⴻⵣⵎⴰⵔ ⴰⵎⴻⵥⵢⴰⵏ ⴷⴻⴳ ⵉⵢⵢⴰⵔ ⵉⵡⴻⵙⵄⴻⵏ ⴰⵟⵟⴰⵙ. 17 ⵉⴼⵔⴰⵢⵉⵎ ⵉⵇⵇⴻⵏ ⵉⵅⴻⴼ ⵏⵏⴻⵙ ⴰⴽ-ⴷ ⵍⴻⵅⵢⴰⵍⴰⵜ ⵏ ⵍ’ⴰⵚⵏⴰⵎ, ⴻⵊⵊ ⵉ-ⵜ, ⵉⵙⵎⴻⵃ ⴷⴰⵢⴻⵙ. 18 ⵜⴰⵙⴻⵙⵙⵉⵜ ⵏⵙⴻⵏ ⴷⴰⵢⴻⵙ ⵙⵙⴻⵎ, ⵜⵜⴻⴳⴳⴻⵏ ⴼⴰⵔⵇ-ⵛⵛⵖⴻⵍ ⴰⵡⴰⵔⵏⵉ ⵉ ⴼⴰⵔⵇ-ⵛⵛⵖⴻⵍ, ⵓ ⵉⵎⴻⵃⴹⴰⵢⴻⵏ ⵏⵙⴻⵏ ⵜⵜⴻⵅⵙⴻⵏ ⵎⵖⵉⵔ ⵍⴻⴼⴹⵉⵃⴻⵜ ⵡⴰⵀⴰ. 19 ⵉⵛⵜ ⵏ ⵜⵃⴰⵔⵢⴰⴹⵜ ⵜⴻⵙⵙⵊⴻⴱⴷ ⵉ-ⵜⵜ ⵙ ⵡⴰⴼⵔⵉⵡⴻⵏ ⵏⵏⴻⵙ: ⴰⵇⴰ ⵏⵉⵜⵏⵉ ⴰⴷ ⴷⴻⵡⵍⴻⵏ ⵜⵜⵙⴻⴹⵃⴰⵏ ⵣⵉ ⵜⵖⴰⵔⵚⵉ ⵏⵙⴻⵏ.”