ⵉⵥⵍⵉ ⵅ ⵉⵥⵍⴰⵏ 7

ⴰⵥⵔⵉ ⵏ ⵜⴻⵙⵍⵉⵜ ⵖⴰⵔ ⵛⵛⴷⵉⵃ

1 “ⵄⵇⴻⴱ-ⴷⴷ, ⵄⵇⴻⴱ-ⴷⴷ, ⴰ ⵛⵓⵍⴰⵎⵉⵜ!

ⵄⵇⴻⴱ-ⴷⴷ, ⵄⵇⴻⴱ-ⴷⴷ,

ⵎⴰⵃⴻⵏⴷ ⴰⴷ ⴷⴰⵢⴻⵎ ⵏⴻⵅⵣⴰⵔ.”

“ⵎⵉⵏ ⵜⴻⵅⵙⴻⵎ ⴰⴷ ⵜⵥⴰⵔⴻⵎ ⴷⵉ ⵛⵓⵍⴰⵎⵉⵜ?”

“ⵏⴻⵜⵜⴰⵜ ⴰⵎ ⵛⵛⴹⵉⵃ ⵙ ⵏⵏⵓⴱⵜⴰⵜ

ⵏ ⵜⵏⴰⵢⴻⵏ ⵏ ⵍⵄⴻⵙⴽⴰⵔⴰⵜ.”

2 “ⵎⴻⵛⵃⴰⵍ ⵛⵏⴰⵏ ⵉⵚⵓⵔⴰⴼ ⵏⵏⴻⵎ

ⴷⵉ ⵚⴰⵏⴷⴰⵍⵉⵢⵢⴰⵜ ⵏⵏⴻⵎ,

ⴰ, ⵛⴻⵎ ⵢⴻⵙⵙⵉⵙ ⵏ ⵉⵊⵊ ⵏ ⵓⵎⵛⴻⵏⵏⴻⵄ!

ⴰⵃⵏⵓⵏⵏⵉ ⵏ ⵜⵎⴻⵚⵚⴰⴹⵜ ⵏⵏⴻⵎ

ⴰⵎ ⵜⵙⴻⴷⴷⵢⵉⵏ ⵉⵖⵍⴰⵏ

ⵜⵜⵔⴰⵃⴻⵏⵜ ⵜⵜⴰⵙⴻⵏⵜ-ⴷⴷ,

ⵚⵚⴻⵏⵄⴻⵜ ⵏ ⵉⴼⴰⵙⵙⴻⵏ ⵏ ⵓⴼⴻⵏⵏⴰⵏ.

3 ⵜⴰⵄⴻⴱⴱⵓⴹⵜ ⵏⵏⴻⵎ

ⴰⵎ ⵜⵙⴰⵔⵉⵊⵜ ⵜⴻⵃⵏⵓⵏⵏⵉ,

ⵎⴰⵏⵉ ⵡⴰⵔ ⵉⵜⵜⵅⴻⵚⵚⵉ ⴱⵉⵏⵓ ⵉⵅⴻⴵⴹⴻⵏ.

ⴰⵄⴻⴷⴷⵉⵙ ⵏⵏⴻⵎ ⴷ ⴰⴽⴻⵎⵎⵉⵛ ⵏ ⵉⵔⴷⴻⵏ,

ⵏⵏⴹⴻⵏⵜ ⴰⵙ-ⴷⴷ ⵜⵍⵉⵍⵍⵉⵛⵉⵏ.   

4 ⵉⴷⵎⴰⵔⴻⵏ ⵏⵏⴻⵎ ⴳⴳⵉⵏ

ⴰⵎ ⵜⵏⴰⵢⴻⵏ ⵏ ⵉⵖⴰⵢⴹⴻⵏ ⵉⵎⴻⵥⵢⴰⵏⴻⵏ,

ⴰⵎ ⵡⴰⵛⵏⵉⵡⴻⵏ ⵏ ⵜⵖⴰⵢⴹⴻⵜ ⵏ ⵡⴻⵣⵖⴰⵔ.

5 ⵉⵔⵉ ⵏⵏⴻⵎ ⵉⴳⴳⴰ ⴰⵎ ⵚⵚⵓⵎⵄⴻⵜ ⵏ ⵍⵄⴰⵊ,

ⵜⵉⵟⵟⴰⵡⵉⵏ ⵏⵏⴻⵎ

ⴰⵎ ⵢⵉⵢⴻⵍⵎⴰⵎⴻⵏ ⵏ ⵃⴰⵛⴱⵓⵏ,

ⵖⴰⵔ ⵜⴻⵡⵡⴰⵔⵜ ⵏ ⴱⴰⵜ-ⵔⴰⴱⴱⵉⵎ,

ⵜⵉⵏⵣⴰⵔⵜ ⵏⵏⴻⵎ ⴰⵎ ⵚⵚⵓⵎⵄⴻⵜ ⵏ ⵍⵓⴱⵏⴰⵏ

ⵉ ⵉⵙⵙⴰⵊⵊⴰⵏ ⵖⴰⵔ ⴷⵉⵎⴰⵛⵇ.

6 ⵜⵉⵡⴰ ⵏⵏⴻⵎ ⵉⴳⴳⴰ ⴰⵣⴻⴵⵉⴼ ⵏⵏⴻⵎ

ⴰⵎ ⴽⴰⵔⵎⵉⵍ,

ⴰⵛⴻⵡⵡⴰⴼ ⵏ ⵓⵣⴻⴵⵉⴼ ⵏⵏⴻⵎ ⴷ ⴰⵔⵊⵓⵡⴰⵏⵉ,

ⴰⵊⴻⴵⵉⴷ ⵉⵜⵜⵡⴰⵃⴱⴻⵙ ⴷⴻⴳ ⵉⵎⵓⵣⴰⵔⴻⵏ ⵏⵏⴻⵎ.”

7 “ⵎⴻⵛⵃⴰⵍ ⵜⴻⵛⵏⵉⴷ ⵛⴻⵎ,

ⵓ ⵎⴻⵛⵃⴰⵍ ⵜⵚⴻⴱⵃⴻⴷ, ⴰ ⵜⴰⵢⵔⵉ,

ⴷⵉ ⴽⵓⵍⵛⵉ ⵎⵉⵏ ⵉⵣⴻⵎⵎⴰⵔ ⴱⵏⴰⴷⴻⵎ

ⴰⴷ ⵢⴰⵔⵔ ⵎⴻⵥⵔⵉ!”

ⴰⵡⴰⵍ ⵏ ⵢⴻⵙⵍⵉ ⵓⵛⴰ ⵜⴰⵙⵍⵉⵜ ⵜⴰⵔⵏⵉ ⴷⴰⵢⴻⵙ

8 “ⵜⵉⴷⴷⵉ ⵏⵏⴻⵎ ⵜⴰⵔⵡⴻⵙ ⴷⵉ ⵜⵛⴻⵊⵊⴰⵔⵜ ⵏ ⵜⵉⵏⵉ,

ⵉⴷⵎⴰⵔⴻⵏ ⵏⵏⴻⵎ ⴷⴻⴳ ⵉⵣⴻⴽⴽⵓⵏⴻⵏ ⵏ ⵓⴹⵉⵍ.

9 ⵏⴻⵛⵛ ⵏⵏⵉⵖ: ‘ⴰⴷ ⵏⵢⴻⵖ ⵅ ⵜⵛⴻⵊⵊⴰⵔⵜ ⵏ ⵜⵉⵏⵉ,

ⴰⴷ ⵟⵟⴼⴻⵖ ⴷⵉ ⵍⴻⴼⵔⵓⵄ ⵏⵏⴻⵙ.’

ⵉⴷⵎⴰⵔⴻⵏ ⵏⵏⴻⵎ ⴰⴷ ⵉⵍⵉⵏ

ⴰⵎ ⵉⵣⴻⵏⴽⴰⴽ ⵏ ⵓⴹⵉⵍ ⵖⴰⵔ ⵜⵣⴰⵢⴰⵔⵜ,

ⵍⴻⴼⵡⴰⵃⴻⵜ ⵏ ⵡⴻⵏⵣⴰⵔⴻⵏ ⵏⵏⴻⵎ

ⴰⵎ ⵜⵜⴻⴼⴼⴰⵃⵉⵏ,

10 ⴰⵏⴻⵖ ⵏⵏⴻⵎ ⴰⵎ ⴱⵉⵏⵓ ⵉⵚⴻⴱⵃⴻⵏ ⴰⵟⵟⴰⵙ ...”,

“... ⵡⴻⵏⵏⵉ ⵉⵜⵜⵔⴰⵃⴻⵏ ⵏⵉⵛⴰⵏ ⵖⴰⵔ ⵍⵍⵉⴼ ⵉⵏⵓ,

ⵡⴻⵏⵏⵉ ⵉⵜⵜⴰⵔⵔⴰⵏ ⵉⵢⴻⵏⵛⵉⵛⴻⵏ

ⵏ ⵢⵉⵏⵏⵉ ⵉⵟⵟⵚⴻⵏ ⴰⴷ ⵏⵀⴻⵣⵣⴻⵏ.”

11 “ⵏⴻⵛⵛ ⵏ ⵍⵍⵉⴼ ⵉⵏⵓ,

ⵖⴰⵔⵉ ⴷⴷ-ⵉⵜⵜⴰⵙ ⵎⴻⵥⵔⵉ ⵏⵏⴻⵙ.

12 ⴰⵙ-ⴷⴷ, ⵍⵍⵉⴼ ⵉⵏⵓ,

ⴻⵊⵊ ⴰⵏⴻⵖ ⴰⴷ ⵏⵓⵢⵓⵔ ⵖⴰⵔ ⵢⴻⵢⵢⴰⵔ,

ⴰⴷ ⵏⴻⵙⵙⴻⵏⵙ ⴷⵉ ⵍⴻⴷⵛⵓⵔ.

13 ⴻⵊⵊ ⴰⵏⴻⵖ ⴰⴷ ⵏⴻⴽⴽⴰⵔ ⵣⵉⵛ

ⵃⵉⵎⴰ ⴰⴷ ⵏⵓⵢⵓⵔ ⵖⴰⵔ ⵉⵎⴰⵔⵊⴰⵄⴻⵏ ⵏ ⵓⴹⵉⵍ,

ⴻⵊⵊ ⴰⵏⴻⵖ ⴰⴷ ⵏⵥⴰⵔ,

ⵎⴰ ⵜⴰⵣⴰⵢⴰⵔⵜ ⴰⵇⴰ ⵜⴻⵙⵙⵓⴼⴼⵓⵖ,

ⵎⴰ ⵏⵏⵓⵡⵡⴰⵔ ⵏⵏⴻⵙ ⵏⵏⵓⵔⵣⵎⴻⵏ,

ⵎⴰ ⵜⵉⵛⴻⵊⵊⵓⵔⴰ ⵏ ⴰⵔⴻⵎⵎⴰⵏ ⵏⴻⵡⵡⴰⵔⴻⵏⵜ.

ⴷⵉⵏⵏⵉ ⵉ ⴷ ⴰⵛ ⵖⴰ ⵡⵛⴻⵖ ⴰⵙⵃⵉⵏⵏⴻⴱ ⵉⵏⵓ.

14 ⵜⵜⵉⴼⴼⴰⵃⵉⵏ ⵏ ⵜⴰⵢⵔⵉ ⴰⵔⵅⵓⵏⵜ ⵉ ⵍⴻⴼⵡⴰⵃ

ⵓ ⵜⵉⵡⴰ ⵏ ⵜⴻⵡⵡⵓⵔⴰ ⵏⵏⴻⵖ

ⴰⵇⴰ ⴷⵉⵏ ⴼⵔⵓⵜⴰⵜ ⵉⵛⴻⵡⵡⴰⵔⴻⵏ,

ⵜⵉⵏⵏⵉ ⵏ ⵟⵟⵔⵉ ⴷ ⵜⵉⵏⵏⵉ ⵉⵜⵜⵡⴰⵅⴻⵎⵎⵍⴻⵏ.

ⴰ ⵍⵍⵉⴼ ⵉⵏⵓ, ⵅⴻⵎⵎⵍⴻⵖ ⵜⴻⵏⵜ ⵉ ⵛⴻⴽ!”