ⵉⵥⵍⵉ ⵅ ⵉⵥⵍⴰⵏ 6

ⵜⴰⵏⴻⴳⴳⴰⵔⵓⵜ ⵏ ⵉⵣⵍⵉ ⵏ ⵜⴻⵙⵍⵉⵜ

1 “ⵎⴰⵏⵉ ⵢⵓⵢⵓⵔ ⵍⵍⵉⴼ ⵏⵏⴻⵎ,

ⴰ ⵛⴻⵎ ⵉⵛⵏⴰⵏ ⵇⴰⵄ ⵅ ⵜⴻⵎⵖⴰⵔⵉⵏ?

ⵎⴰⵏⵉ ⵢⴰⵔⵔⴰ ⵙ ⵓⵣⴻⴵⵉⴼ ⵍⵍⵉⴼ ⵏⵏⴻⵎ?

ⵏⴻⵛⵛⵉⵏ ⵏⴻⵅⵙ ⴰⴷ ⵅⴰⵙ ⵏⴰⵔⵣⵓ ⴰⴽⵉⴷⴻⵎ!”

2 “ⵍⵍⵉⴼ ⵉⵏⵓ ⵉⵀⵡⴰ ⵖⴰⵔ ⵓⵃⵡⵉⵛ ⵏⵏⴻⵙ,

ⵖⴰⵔ ⵜⴱⵓⴷⴰ ⵙ ⵍⴻⵄⵟⵓⵔ,

ⵃⵉⵎⴰ ⴰⴷ ⵢⴰⵔⵡⴻⵙ ⴷⴻⴳ ⵉⵃⵡⵉⵛⴻⵏ,

ⵃⵉⵎⴰ ⴰⴷ ⵉⵙⵙⵎⵓⵏ ⵜⵉⵍⵉⵍⵍⵉⵛⵉⵏ.   

3 ⵏⴻⵛⵛ ⵣⴻⴳ ⵍⵍⵉⴼ ⵉⵏⵓ,

ⵓ ⵍⵍⵉⴼ ⵉⵏⵓ ⴰⵇⴰ-ⵜ ⵉⵏⵓ,

ⵏⴻⵜⵜⴰ ⴷ ⵡⴻⵏⵏⵉ ⵢⴰⵔⴻⴽⴽⵡⵙⴻⵏ ⵊⴰⵔ ⵜⵍⵉⵍⵍⵉⵛⵉⵏ.”

ⴰⵙⵍⵉ ⵉⵖⴻⵏⵏⴻⵊ ⵅ ⵡⴻⵥⵔⵉ ⵏ ⵜⴻⵙⵍⵉⵜ

4 “ⵛⴻⵎ ⵜⵚⴻⴱⵃⴻⴷ, ⴰ ⵜⴰⵎⴻⴷⴷⵓⴽⴽⴻⵍⵜ ⵉⵏⵓ,

ⴰⵎⴻⵛⵏⴰⵡ ⵜⵉⵔⵚⴰ,

ⵜⴻⵛⵏⵉⴷ ⴰⵎ ⵓⵔⵛⴰⵍⵉⵎ,

ⵜⴻⵙⵙⴰⴳⴳⵯⴰⴷⴻⴷ ⴰⵎ ⵢⵉⵙⴻⴷⴷⵉⵢⵢⴻⵏ ⵏ ⵍⵄⴻⵙⴽⴰⵔ

ⵙ ⵉⴱⴰⵏⴷⵓⵜⴻⵏ ⵏⵙⴻⵏ.

5 ⴽⴽⴻⵙ ⵜⵉⵟⵟⴰⵡⵉⵏ ⵣⵣⴰⵢⵉ,

ⵎⴰⵖⴰⵔ ⵏⵉⵜⴻⵏⵜⵉ ⵖⴻⴹⵍⴻⵏⵜ ⴰⵢⵉ ⵉⴼⴰⴷⴷⴻⵏ ⴰⵟⵟⴰⵙ.

ⴰⵛⴻⵡⵡⴰⴼ ⵏⵏⴻⵎ ⴰⵎ ⵜⵃⵉⵎⴰⵔⵜ ⵏ ⵉⵖⴰⵢⴹⴻⵏ

ⵉ ⴷⴷ-ⵉⵀⴻⴽⴽⵯⴰⵏ ⵣⴻⴳ ⵉⴷⵓⵔⴰⵔ ⵏ ⵊⵉⵍⵄⴰⴷ.

6 ⵜⵉⵖⵎⴰⵙ ⵏⵏⴻⵎ ⴳⴳⵉⵏⵜ ⴰⵎ ⵜⵃⵉⵎⴰⵔⵜ ⵏ ⵡⵓⴵⵉ,

ⵉ ⴷⴷ-ⵉⵜⵜⴳⴻⵄⵄⴰⴷⴻⵏ ⵣⴻⴳ ⵡⴻⵎⵛⴰⵏ ⵏ ⵓⵚⴻⴱⴱⴻⵏ.

ⵎⴰⵔⵔⴰ ⵜⵉⵅⴻⵙⵡⵉⵏ ⵓⵔⵡⴻⵏⵜ ⵜⴰⵛⵏⵉⵡⵜ,

ⵡⴰⵔ ⵜⴻⵇⵇⵉⵎ ⵉⵛⵜ ⵏⴱⵍⴰ ⵉⵃⴻⵏⵊⵉⵔⴻⵏ.

7 ⵍⵃⴻⵏⴽⴰⵜ ⵏⵏⴻⵎ ⴰⵎ ⵜⵔⴻⵎⵎⴰⵏⵜ ⵉⴱⴹⴰⵏ

ⴰⵡⴰⵔⵏⵉ ⵉ ⵍⵍⵜⴰⵎ ⵏⵏⴻⵎ.

8 ⴰⵇⴰ ⴷⵉⵏ ⵙⴻⵜⵜⵉⵏ ⵏ ⵜⵊⴻⴵⵉⴷⵉⵏ

ⴷ ⵜⵎⴻⵏⵢⵉⵏ ⵏ ⵜⵉⵢⵢⴰ,

ⵓⵍⴰ ⴷ ⵜⵉⵄⵣⴰⵔⵉⵢⵢⵉⵏ ⴱⵍⴰ ⵍⴻⵃⵙⴰⴱ.

9 ⵡⴻⵃⵃⴷⴻⵙ ⵏⴻⵜⵜⴰⵜ, ⵜⴰⴷⴱⵉⵔⵜ ⵉⵏⵓ,

ⵜⴻⵏⵏⵉ ⵉⴽⴻⵎⵎⵍⴻⵏ ⵉⵏⵓ,

ⴰⵢⴻⵏⵏⵉ ⵏ ⵢⴻⵙⵙⵉⵙ ⵏ ⵢⴻⵎⵎⴰⵙ,

ⵏⴻⵜⵜⴰⵜ ⴷ ⵜⴻⵏⵏⵉ ⵉⴼⴰⵔⵣⴻⵏ

ⵖⴰⵔ ⵜⴻⵏⵏⵉ ⵉ ⴷ ⴰⵙ ⴷⴷ-ⵢⵓⵔⵡⴻⵏ.

ⵎⴰⵍⴰ ⵣⵍⵉⵏⵜ ⵜⵜ ⵜⵢⴻⵙⵙⵉⵜ, ⴰⴷ ⵜⵜ ⵙⵙⵄⵓⴵⴰⵏⵜ,

ⵜⵉⵊⴻⴵⵉⴷⵉⵏ ⴷ ⵜⵉⵢⵢⴰ ⴰⴷ ⵜⵜ ⵙⵙⴻⵎⵖⴰⵔⴻⵏⵜ.”

10 “ⵎⵉⵏ ⵜⴻⵄⵏⴰ ⵜⴻⵏⵏⵉ ⴷⴷ-ⵉⵙⵙⵉⵊⵊⴻⵏ

ⴰⵎ ⵜⴼⴰⵡⵜ ⵏ ⵍⴻⴼⵊⴰⵔ,

ⵜⴻⵛⵏⴰ ⴰⵎ ⵜⵣⵉⵔⵉ ⵉⵇⴻⴼⵍⴻⵏ,

ⵜⴻⵚⴼⴰ ⴰⵎ ⵜⴼⵓⵛⵜ ⵢⴰⵔⴻⵇⵇⴻⵏ,

ⵜⴻⵙⵙⴰⴳⴳⵯⴰⴷ ⴰⵎ ⵢⵉⵙⴻⴷⴷⵉⵢⵢⴻⵏ ⵏ ⵍⵄⴻⵙⴽⴰⵔ

ⵙ ⵉⴱⴰⵏⴷⵓⵜⴻⵏ?”

ⵜⵙⴻⴹⵃⵉ ⵜⴻⵙⵍⵉⵜ

11 “ⵏⴻⵛⵛ ⵃⵡⵉⵖ ⵖⴰⵔ ⵜⴻⵃⵡⵉⵛⵜ

ⵏ ⵜⵛⴻⵊⵊⵓⵔⴰ ⵏ ⵜⴻⵖⵢⴰⵛⵜ

ⵃⵉⵎⴰ ⴰⴷ ⵥⴰⵔⴻⵖ

ⴰⵖⴻⵎⵎⵓⵢ ⵉⴱⴻⴷⴷⴻⵏ ⴷⵉ ⵜⴻⵖⵣⵓⵔⵜ,

ⵃⵉⵎⴰ ⴰⴷ ⵥⴰⵔⴻⵖ ⵎⴰ ⵜⴰⵣⴰⵢⴰⵔⵜ ⵜⴻⵙⵙⵓⴼⴼⴻⵖ-ⴷⴷ,

ⵎⴰ ⵜⵉⵛⴻⵊⵊⵓⵔⴰ ⵏ ⴰⵔⴻⵎⵎⴰⵏ ⵜⵜⵏⴻⵡⵡⴰⵔⴻⵏⵜ.

12 ⵜⵓⵖⴰ ⵡⴰⵔ ⴷⴷ-ⴰⵔⵔⵉⵖ ⵜⴰⵢⵏⵉⵜ

ⴰⵇⴰ ⴳⴳⵉⵖ ⵉⵅⴻⴼ ⵉⵏⵓ

ⴷⴻⴳ ⵉⴽⴰⵔⵔⵓⵜⴻⵏ ⵏ ⵍⴳⴻⵏⵙ ⵉⵏⵓ ⵉⴳⴻⵍⵍⴷⴻⵏ.”