ⵜⴰⵙⵍⵉⵜ ⵜⴽⴻⵎⵎⴻⵍ ⴰⵡⴰⵍ ⵏⵏⴻⵙ
8
1 “ⴰⵅ, ⵎⴻⵄⵍⵉⴽ ⵇⴰⵄ ⵛⴻⴽ ⴷ ⵓⵎⴰ, ⵜᵉⵟⵟⴻⴹⴻⴷ ⴷⵉ ⵜⴱⵉⴱⴱⵉⵛⵉⵏ ⵏ ⵢⴻⵎⵎⴰ.
ⵎⴰⵍⴰ ⵓⴼⵉⵖ ⵛⴻⴽ ⴷⵉ ⴱⴰⵔⵔⴰ, ⴰⴷ ⵛⴻⴽ ⵙⵙⵓⴷⵎⴻⵖ,
ⴱⵍⴰ ⵎⴰ ⴷ ⴰⵢⵉ ⵙⵙⴻⵃⵇⴰⵔⴰⵏ.
2 ⵉⵍⵉ ⴰⴷ ⵛⴻⴽ ⵏⴻⴷⵀⴻⵖ, ⴰⴷ ⵛⴻⴽ ⴰⵡⵢⴻⵖ
ⵖⴰⵔ ⵜⴰⴷⴷⴰⵔⵜ ⵏ ⵢⴻⵎⵎⴰ,
ⵛⴻⴽ ⴰⴷ ⴰⵢⵉ ⵜⴻⵙⵙⵍⴻⵎⴷⴻⴷ ⴷⵉⵏ.
ⴰⴷ ⴰⵛ ⵡⵛⴻⵖ ⴱⵉⵏⵓ ⵉⵜⵜⴼⵓⵃⴻⵏ
ⵙ ⵍⴻⵄⵜⵓⵍ ⴰⴷ ⵜⴻⵙⵡⴻⴷ,
ⴰⵥⴻⵎⵎⵉ ⵏ ⵜⵛⴻⵊⵊⴰⵔⵜ ⵉⵏⵓ ⵏ ⵡⴰⵔⴻⵎⵎⴰⵏ.
3 ⴰⵣⴻⵍⵎⴰⴹ ⵏⵏⴻⵙ ⵙⴰⴷⵓ ⵓⵣⴻⴵⵉⴼ ⵉⵏⵓ,
ⴰⴼⵓⵙⵉ ⵏⵏⴻⵙ ⵉⴷⴰⵔⵔⴻⵄ ⴰⵢⵉ-ⴷⴷ.
4 ⵏⴻⵛⵛ ⴰⴷ ⴽⴻⵏⵏⵉⵏⵜ ⵙⵙⵊⴰⴵⴰⵖ,
ⴰ ⵢⴻⵙⵙⵉⵙ ⵏ ⵓⵔⵛⴰⵍⵉⵎ:
ⵎⴰⵢⴻⵎⵎⵉ ⵖⴰ ⵜⵀⴻⵡⵍⴻⵏⵜ ⵜⴰⵢⵔⵉ
ⵏⵉⵖ ⴰⴷ ⵜⵜ-ⵉ-ⴷⴷ-ⵜⴻⵙⵙⴻⴽⴽⴰⵔⴻⵏⵜ,
ⵇⴱⴻⵍ ⵎⴰ ⵜᵉⵜⵜⴻⵅⵙ ⵏⴻⵜⵜⴰⵜ?”
ⵜⴰⵙⵍⵉⵜ ⵜⴻⴼⴼⴻⵖ-ⴷⴷ ⵣⵉ ⵍⴻⵅⵍⴰ ⴰⴽ-ⴷ ⵢⴻⵙⵍⵉ ⵏⵏⴻⵙ
5 “ⵎⵉⵏ ⵜⴻⵄⵏⴰ ⵏⵏⵉ ⴷⵉⵏ ⵉⵜⵜⴳⴻⵄⵄⴰⴷⴻⵏ ⵣⵉ ⵍⴻⵅⵍⴰ,
ⵜᵉⵜⵜⵄⴻⵎⵎⴻⴷ ⵅ ⵍⵍⵉⴼ ⵏⵏⴻⵙ?”
“ⵙⴰⴷⵓ ⵜⵛⴻⵊⵊⴰⵔⵜ ⵏ ⵜⵜⴻⴼⴼⴰⵃⵜ
ⴰⵔⵔⴻⵖ ⵎⴻⵥⵔⵉ ⵏⵏⴻⵎ,
ⵎⴰⵏⵉ ⵛⴻⵎ ⴷⴷ-ⵜⴻⵊⵊⴰ ⵢⴻⵎⵎⴰⵎ
ⵙ ⵍⴻⵃⵔⵉⵇ ⵏ ⵜⴰⵔⵡⴰ,
ⵎⴰⵏⵉ ⵛⴻⵎ ⴷⴷ-ⵜⴻⵊⵊⴰ
ⵜⴻⵏⵏⵉ ⵛⴻⵎ ⴷⴷ-ⵢⵓⵔⵡⴻⵏ.” ■
6 “ⵙⴰⵔⵙ ⴰⵢⵉ ⴰⵎ ⵟⵟⴰⴱⴻⵄ ⵅ ⵡⵓⵍ ⵏⵏⴻⵛ,
ⴰⵎ ⵟⵟⴰⴱⴻⵄ ⵅ ⵓⵖⵉⵍ ⵏⵏⴻⵛ,
ⵎⴰⵖⴰⵔ ⵜⴰⵢⵔⵉ ⵜⴻⵊⵀⴻⴷ ⴰⵎ ⵍⵎⴻⵡⵜ,
ⵜⵓⵙⵎⵉ ⵜⴻⵇⵙⴻⵃ ⴰⵎ ⵍⴰⵅⴰⵔⵜ,
ⵜⵉⴼⴻⵟⵟⵓⵜⵉⵏ ⵏⵏⴻⵙ ⴷ ⵜⵉⴼⴻⵟⵟⵓⵜⵉⵏ ⵏ ⵜⵎⴻⵙⵙⵉ,
ⴰⵇⴰ ⴰⵜⴻⵏⵜ ⴰⵎ ⵓⵛⴻⵄⵄⴰⵍ ⵏ ⵙⵉⴷⵉ.
7 ⴰⵟⵟⴰⵙ ⵏ ⵡⴰⵎⴰⵏ
ⵡⴰⵔ ⵣⴻⵎⵎⴰⵔⴻⵏ ⴰⴷ ⵙⵙⵅⴻⵙⵢⴻⵏ ⵜⴰⵢⵔⵉ,
ⵓⵍⴰ ⴷ ⵉⵖⴻⵣⵔⴰⵏ ⵡⴰⵔ ⵜⵜ ⵜⵜⵉⵡⵢⴻⵏ.
ⵡⴰⵅⵅⴰ ⵉⵡⵛⴰ ⵉⵊⵊⴻⵏ ⵉ ⵜⴰⵢⵔⵉ
ⵎⴰⵔⵔⴰ ⴰⴳⵍⴰ ⵏ ⵜⴰⴷⴷⴰⵔⵜ ⵏⵏⴻⵙ,
ⴰⴷ ⵜ ⵙⵙⴻⵃⵇⴰⵔⴻⵏ ⴷ ⴰⵙⴻⵃⵇⴰⵔ.”
ⵜⴰⵙⵍⵉⵜ ⴷ ⴰⵢⵜⵎⴰⵙ
8 “ⵏⴻⵛⵛⵉⵏ ⵖⴰⵔⵏⴻⵖ
ⵉⵛⵜ ⵏ ⵓⵍⵜⵎⴰⵜⵏⴻⵖ ⵜⴰⵎⴻⵥⵢⴰⵏⵜ,
ⵄⴰⴷ ⵡⴰⵔ ⴷ ⴰⵙ ⴷⴷ-ⴼⴼⵉⵖⴻⵏ ⵉⴷⵎⴰⵔⴻⵏ.
ⵎⵉⵏ ⵖⴰ ⵏⴻⴳⴳ ⵉ ⵓⵍⵜⵎⴰⵜⵏⴻⵖ
ⴷⴻⴳ ⵡⴰⵙⵙ ⵉ ⴷⵉ ⵅⴰⵙ ⵉ ⵖⴰ ⵙⵙⵉⵡⵍⴻⵏ?”
9 “ⵎⴰⵍⴰ ⵏⴻⵜⵜⴰⵜ ⴷ ⵍⵃⵉⴹ,
ⴰⴷ ⵅⴰⵙ ⵏⴻⵙⵙⴱⴻⴷⴷ ⴰⵛⴱⴰⵔ
ⴰⵎ ⵉⵊⵊ ⵏ ⵜⵜⴰⵊ ⵏ ⵏⵏⵓⵇⴰⵔⵜ.
ⵎⴰⵍⴰ ⵏⴻⵜⵜⴰⵜ ⴷ ⵜⴰⵡⵡⴰⵔⵜ,
ⴰⴷ ⵜⵜ ⵏⴻⵇⵇⴻⵏ ⵙ ⵜⴼⴻⵍⵡⵉⵏ ⵏ ⵓⴽⴻⵛⵛⵓⴹ ⵏ ⵜⴻⵏⴳⴻⵍⵜ.”
10 “ⵏⴻⵛⵛ ⴷ ⵍⵃⵉⴹ ⵓ ⵉⴷⵎⴰⵔⴻⵏ ⵉⵏⵓ ⴰⵎ ⵍⴱⵓⵔⵊⴰⵜ.
ⵅⴻⵏⵏⵉ ⴷⴻⵡⵍⴻⵖ ⵏⴻⵛⵛ ⴷⵉ ⵜⵉⵟⵟⴰⵡⵉⵏ ⵏⵏⴻⵙ
ⴰⵎ ⵜⴻⵏⵏⵉ ⵢⵓⴼⵉⵏ ⵍⴻⵃⵏⴰ.”
ⴰⵃⵡⵉⵛ ⵏ ⵜⵣⴰⵢⴰⵔⵜ ⵏ ⵙⵓⵍⵉⵎⴰⵏ ⴷ ⵡⴻⵃⵡⵉⵛ ⵏ ⵜⵣⴰⵢⴰⵔⵜ ⵏ ⵜⴻⵙⵍⵉⵜ
11 “ⵙⵓⵍⵉⵎⴰⵏ ⵜⵓⵖⴰ ⵖⴰⵔⴻⵙ
ⵉⵊⵊ ⵏ ⵓⵎⴰⵔⵊⴻⵄ ⵏ ⵓⴹⵉⵍ ⴷⵉ ⴱⴰⵄⵍ-ⵀⴰⵎⵓⵏ.
ⵉⵡⵛⴰ ⴰⵎⴰⵔⵊⴻⵄ ⵏⵏⵉ ⵉ ⵉⵄⴻⵙⵙⴰⵙⴻⵏ.
ⵉ ⵍⵖⵉⴵⴻⵜ ⵏⵏⴻⵙ ⵇⴰⵄ ⵉⵊⵊ ⵢⵉⵡⵉ-ⴷⴷ
ⴰⵍⴻⴼ ⵏ ⵍⴻⵡⵣⴻⵏ ⵏ ⵏⵏⵓⵇⴰⵔⵜ.” ■
12 “ⴰⵃⵡⵉⵛ ⵏ ⵓⴹⵉⵍ ⵉⵏⵓ,
ⴰⵇⴰ-ⵜ ⵣⵣⴰⵜ ⵉ ⵜⵉⵟⵟⴰⵡⵉⵏ ⵉⵏⵓ.
ⴰⵍⴻⴼ ⵏ ⵍⴻⵡⵣⴻⵏ ⵏ ⵏⵏⵓⵇⴰⵔⵜ
ⴰⵇⴰ ⴰⵜⴻⵏ ⵉ ⵛⴻⴽ, ⴰ ⵙⵓⵍⵉⵎⴰⵏ,
ⵓ ⴰⵍⴼⴰⵢⴻⵏ ⵉ ⵉⵄⴻⵙⵙⴰⵙⴻⵏ ⵏ ⵍⵖⵉⴵⴻⵜ ⵣⵣⴰⵢⴻⵙ.”
ⴰⵍⴰⵖⵉ ⵏ ⵢⴻⵙⵍⵉ ⴷ ⵜⴻⵙⵍⵉⵜ
13 “ⴰ ⵛⴻⵎ ⵜⴻⵏⵏⵉ ⵉⵣⴻⴷⴷⵖⴻⵏ ⴷⴻⴳ ⵉⵃⵡⵉⵛⴻⵏ,
ⵉⵄⵛⵉⵔⴻⵏ ⵏⵏⴻⵎ ⵜⵜⴻⵙⵍⴰⵏ ⵙ ⵉⵎⴻⵣⵣⵓⵖⴻⵏ ⵏⵙⴻⵏ
ⵉ ⵜⵎⵉⵊⵊⴰ ⵏⵏⴻⵎ,
ⵇⵇⴰⵔⴻⵏ: ‘ⴻⵊⵊ ⴰⵢⵉ ⴰⴷ ⵜⵜ ⵙⵍⴻⵖ!”
14 “ⴷⴻⵖⵢⴰ, ⴰ ⵍⵍⵉⴼ ⵉⵏⵓ,
ⴻⴳⴳ ⴰⵎ ⵢⵉⵖⴰⵢⴹ ⵏ ⵡⴻⵣⵖⴰⵔ
ⵏⵉⵖ ⴰⵎ ⵓⵎⴻⵥⵢⴰⵏ ⵏ ⵓⴷⴰⴷⴻⵏ,
ⵅ ⵉⴷⵓⵔⴰⵔ ⵉⵛⵛⵓⵔⴻⵏ ⵙ ⵍⴻⵄⵛⵓⴱ ⵉⵜⵜⴼⵓⵃⴻⵏ.”