4
1 ⵙⵍⴻⵎ, ⴽⴻⵏⵏⵉⵡ ⵉⵃⴻⵏⵊⵉⵔⴻⵏ, ⵖⴰⵔ ⵜⵜⴰⵔⴱⵉⵢⵢⴻⵜ ⵏ ⴱⴰⴱⴰⵜⵡⴻⵎ,
ⵃⴻⴽⴽⴰⵔⴻⵎ ⵎⵍⵉⵃ
ⵎⴰⵃⴻⵏⴷ ⴰⴷ ⵜⴻⴽⵙⵉⵎ ⵜⵓⵙⵙⵏⴰ ⵙ ⵍⴻⴼⵀⴰⵎⴻⵜ,
2 ⵎⴰⵖⴰⵔ ⵏⴻⵛⵛ ⴰⴷ ⴰⵡⴻⵎ ⵡⵛⴻⵖ
ⵜⴰⵖⵓⵔⵉ ⵉⵚⴻⴱⵃⴻⵏ,
ⵡⴰⵔ ⵙⴻⵎⵎⵃⴻⵎ ⴷⵉ ⵜⵖⵓⵔⵉ ⵉⵏⵓ.
3 ⵎⴰⵖⴰⵔ ⵏⴻⵛⵛ ⵜⵓⵖⴰ ⴰⵢⵉ ⴷ ⵎⵎⵉⵙ ⵉ ⴱⴰⴱⴰ,
ⴰⵔⴻⵇⵇⴰⵖ ⴷ ⴰⵢⴻⵏⵏⵉ ⵏ ⵎⵎⵉⵙ
ⵣⵣⴰⵜ ⵉ ⵡⵓⴷⴻⵎ ⵏ ⵢⴻⵎⵎⴰ. ■
4 ⵏⴻⵜⵜⴰ ⵉⵙⵙⴻⵍⵎⴻⴷ ⴰⵢⵉ, ⵉⵏⵏⴰ ⴰⵢⵉ:
“ⴻⵊⵊ ⵓⵍ ⵏⵏⴻⵛ ⴰⴷ ⵉⵟⵟⴻⴼ ⴷⴻⴳ ⵡⴰⵡⴰⵍⴻⵏ ⵉⵏⵓ,
ⵃⴹⴰ ⵜⵉⵡⴻⵚⵚⴰ ⵉⵏⵓ, ⵅⴻⵏⵏⵉ ⴰⴷ ⵜⴻⴷⴷⴰⵔⴻⴷ!” ■
5 ⵊⴱⴻⴷ-ⴷⴷ ⵖⴰⵔⴻⴽ ⵜⵉⵖⵉⵜ,
ⵊⴱⴻⴷ-ⴷⴷ ⵖⴰⵔⴻⴽ ⵍⴻⵄⵇⴻⵍ,
ⵡⴰⵔ ⵜᵉⵜⵜⵓ ⵓ ⵡⴰⵔ ⵜⵃⴻⵢⵢⵉⴷ
ⵅ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ.
6 ⵡⴰⵔ ⵙⴻⵎⵎⴻⵃ ⴷⵉ ⵜⵉⵖⵉⵜ,
ⵅⴻⵏⵏⵉ ⵏⴻⵜⵜⴰⵜ ⴰⴷ ⵛⴻⴽ ⵜⴻⵃⴹⴰ,
ⵙⵄⵉⵣⵣ ⵉ-ⵜⵜ ⵓ ⵏⴻⵜⵜⴰⵜ ⴰⴷ ⵛⴻⴽ ⵜⴻⵙⵙⴰⵔ. □
7 ⴱⴻⴷⴷⵓ ⵏ ⵜⵉⵖⵉⵜ ⴷ ⵓⴹⵓⴼ ⵏ ⵜⵉⵖⵉⵜ,
ⵟⵟⴻⴼ ⵍⴻⴼⵀⴰⵎⴻⵜ ⵙ ⵎⴰⵔⵔⴰ ⵎⵉⵏ ⵖⴰⵔⴻⴽ. ■
8 ⵙⴳⴻⵄⵄⴻⴷ ⵉ-ⵜⵜ-ⵉ-ⴷⴷ,
ⵅⴻⵏⵏⵉ ⵏⴻⵜⵜⴰⵜ ⴰⴷ ⵛⴻⴽ ⵜⴻⵙⵙⴳⴻⵄⵄⴻⴷ,
ⵏⴻⵜⵜⴰⵜ ⴰⴷ ⴰⵛ ⵜⴻⴳⴳ ⵛⵛⴰⵏ ⵎⴰⵍⴰ ⵜⴷⴰⵔⵔⵄⴻⴷ ⴰⵙ.
9 ⵏⴻⵜⵜⴰⵜ ⴰⴷ ⴰⵛ ⵜⴻⵡⵛ ⵉⵊⵊ ⵏ ⵜⵜⴰⵊ ⵜⴻⵛⵏⴰ
ⵅ ⵓⵣⴻⴵⵉⴼ ⵏⵏⴻⵛ,
ⴰⴷ ⴰⵛ ⵜⴻⵡⵛ ⵉⵊⵊ ⵏ ⵜⵜⴰⵊ ⵉⵣⴻⵡⵡⵇⴻⵏ. ■
10 ⵙⴻⵍ, ⴰ ⵎⵎⵉ, ⵓ ⴽⵙⵉ ⴰⵡⴰⵍⴻⵏ ⵉⵏⵓ,
ⵅⴻⵏⵏⵉ ⴰⴷ ⵎⵎⴰⵔⵏⵉⵏ
ⵉⵙⴻⴳⴳⵯⵓⵙⴰ ⵏ ⵜⵓⴷⴰⵔⵜ ⵏⵏⴻⵛ.
11 ⵙⵙⵍⴻⵎⴷⴻⵖ ⴰⵛ ⴰⴱⵔⵉⴷ ⵏ ⵜⵉⵖⵉⵜ,
ⵏⴻⴷⵀⴻⵖ ⵛⴻⴽ ⴷⵉ ⵍⴰⵜⴰⵔⴰⵜ ⵉⵙⴻⴳⴳⵎⴻⵏ.
12 ⵎⴰⵍⴰ ⵜⵓⵢⵓⵔⴻⴷ, ⴰⵚⵓⵔⵉⴼ ⵏⵏⴻⵛ
ⵡⴰⵔ ⵉⵜⵜⵏⴻⵃⵚⵚⴰⵔ,
ⵎⴰⵍⴰ ⵜⴰⵣⵣⵍⴻⴷ, ⵡⴰⵔ ⵜⵜⵏⴻⵇⵔⵉⴹⴻⴷ.■
13 ⵛⴻⴱⴱⴰⵔ ⴷⵉ ⵜⵜⴰⵔⴱⵉⵢⵢⴻⵜ,
ⵡⴰⵔ ⵅⴰⵙ ⵜⴻⵎⵎⵙⴻⴱⴹⴰ,
ⵃⴹⴰ ⵜⵜ, ⵎⴰⵖⴰⵔ ⵏⴻⵜⵜⴰⵜ ⴷ ⵜⵓⴷⴰⵔⵜ ⵏⵏⴻⵛ.
14 ⵡⴰⵔ ⴳⴳⵓⵔ ⵅ ⵓⵎⴻⵙⵔⵓⵇ ⵏ ⵉⵄⴻⴼⴼⴰⵏⴻⵏ,
ⵡⴰⵔ ⵜⵜⵉⴷⵉⴼ ⴰⴱⵔⵉⴷ ⵏ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ, ■
15 ⵃⴻⵢⵢⴻⴷ ⵅⴰⵙ, ⵡⴰⵔ ⵅⴰⵙ ⴳⴳⵓⵔ,
ⴼⴼⴻⵖ ⵣⵣⴰⵢⴻⵙ ⵓ ⴰⴷ ⵜⴻⴽⴽⴻⴷ ⵅⴰⵙ.
16 ⵎⴰⵖⴰⵔ ⵏⵉⵜⵏⵉ ⵡⴰⵔ ⵜⵜᵉⵟⵟⵚⴻⵏ
ⴰⵎ ⵡⴰⵔ ⵣⴻⵎⵎⴰⵔⴻⵏ ⴰⴷ ⴳⴳⴻⵏ ⵜⵓⵄⴻⴼⴼⵏⴰ,
ⵉⵜⵜⵔⴰⵃ ⴰⵙⴻⵏ ⵉⴹⴻⵚ ⵏⵙⴻⵏ
ⵎⴰⵍⴰ ⵡⴰⵔ ⵙⵙⵏⴻⵇⵔⵉⴹⴻⵏ ⵃⴻⴷ ⵄⴰⴷ,
17 ⵎⴰⵖⴰⵔ ⵏⵉⵜⵏⵉ ⵜⵜᵉⵜⵜⴻⵏ ⴰⵖⵔⵓⵎ ⵏ ⵍⵖⴻⵛⵛ,
ⵓ ⵏⵉⵜⵏⵉ ⵙⴻⵙⵙⴻⵏ ⴱⵉⵏⵓ ⵣⵉ ⵜⵎⴻⴳⴳⴰ ⵏ ⵍⴻⵅⵛⵓⵏⴻⵜ.
18 ⴰⵎⴻⵙⵔⵓⵇ ⵏ ⵉⵎⵙⴻⴳⴳⴰⴷⴻⵏ
ⴰⵎ ⵜⴼⴰⵡⵜ ⵉⵜⵜⵉⵙⵙⵉⵇⴻⵏ ⵏ ⵜⴻⴼⴼⵓⵜ,
ⵜⴻⵏⵏⵉ ⵜⴰⵔⴻⵏⵏⵉ ⴷⴻⴳ ⵓⵙⴻⵇⵙⴻⵇ
ⴰⵍ ⵉⵎⵖⴰⵔ ⵡⴰⵙⵙ ⵇⴰⵄ.
19 ⴰⴱⵔⵉⴷ ⵏ ⵉⵄⴻⴼⴼⴰⵏⴻⵏ ⴰⵎ ⵜⴰⴵⴻⵙⵜ,
ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵎⵉⵏ ⴷⵉ ⵉ ⵖⴰ ⵏⵇⴰⵔⴹⴻⵏ.
20 ⵎⵎⵉ ⵉⵏⵓ, ⴻⵡⵛ ⵜⴰⵢⵏⵉⵜ ⵉ ⵡⴰⵡⴰⵍⴻⵏ ⵉⵏⵓ,
ⴻⵡⵛ ⴰⵎⴻⵣⵣⵓⵖ ⵏⵏⴻⵛ ⵉ ⵡⴰⵡⴰⵍⴻⵏ ⵉⵏⵓ,
21 ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⵖⴻⴼⵍⴻⵏ
ⵣⵉ ⵜⵉⵟⵟⴰⵡⵉⵏ ⵏⵏⴻⵛ,
ⵅⴻⵎⵎⴻⵍ ⵉ-ⵜⴻⵏ ⴷⴰⵅⴻⵍ ⴷⴻⴳ ⵡⵓⵍ ⵏⵏⴻⵛ,
22 ⵎⴰⵖⴰⵔ ⵏⵉⵜⵏⵉ ⴷ ⵜⵓⴷⴰⵔⵜ
ⵉ ⵢⵉⵏⵏⵉ ⵜⴻⵏ ⵉ ⵖⴰ ⵢⴰⴼⴻⵏ,
ⵓⵍⴰ ⴷ ⴰⴳⴻⵏⴼⵓ ⵉ ⴰⵔⵔⵉⵎⴻⵜ ⵏⵙⴻⵏ ⵎⴰⵔⵔⴰ. ■
23 ⵃⴹⴰ ⵓⵍ ⵏⵏⴻⵛ ⵅ ⵎⴰⵔⵔⴰ
ⵎⵉⵏ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵃⴹⴰ,
ⵎⴰⵖⴰⵔ ⵣⵣⴰⵢⴻⵙ ⴼⴼⵖⴻⵏ ⵉⵥⴻⵡⵔⴰⵏ ⵏ ⵜⵓⴷⴰⵔⵜ.
24 ⴽⴽⴻⵙ ⵉⵅⴰⵔⵔⵉⵇⴻⵏ ⵏ ⵓⵇⴻⵎⵎⵓⵎ ⵏⵏⴻⵛ,
ⵙⴱⴻⵄⵄⴻⴷ ⵅⴰⴽ ⴰⴼⴰⵔⵢⴻⴹ ⵏ ⵉⵢⴻⵏⵛⵉⵛⴻⵏ ⵏⵏⴻⵛ.
25 ⴻⵊⵊ ⵜⵉⵟⵟⴰⵡⵉⵏ ⵏⵏⴻⵛ ⴰⴷ ⵅⵣⴰⵔⴻⵏⵜ ⵖⴰⵔ ⵣⵣⴰⵜ,
ⴻⵊⵊ ⴰⴱⵍⵉⵡⴻⵏ ⵏⵏⴻⵛ ⴰⴷ ⵅⵣⴰⵔⴻⵏ
ⵖⴰⵔ ⵎⵉⵏ ⵉⴵⴰⵏ ⴰⵔⴻⵏⴷⴰⴷ ⵏⵏⴻⵛ.
26 ⵡⴰⵟⴰ ⵍⴰⵜⴰⵔ ⵏ ⵓⴹⴰⵔ ⵏⵏⴻⵛ,
ⴻⵊⵊ ⴰⴷ ⵉⵍⵉⵏ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵛ ⵙⴰⵔⵔⵃⴻⵏ.
27 ⵡⴰⵔ ⴼⴰⵔⵔⴻⵖ ⵖⴰⵔ ⵢⴻⴼⵓⵙ ⵓⵍⴰ ⵖⴰⵔ ⵓⵣⴻⵍⵎⴰⴹ,
ⵙⴱⴻⵄⵄⴻⴷ ⴰⴹⴰⵔ ⵏⵏⴻⵛ ⵣⵉ ⵜⵓⵄⴻⴼⴼⵏⴰ. ■