ⴰⵖⴻⴽⴽⵯⵉ ⵣⵉ ⵜⴻⵎⵖⴰⵔⵜ ⵜⴰⴱⴰⵔⵔⴰⵏⵉⵜ
5
1 ⵎⵎⵉ ⵉⵏⵓ, ⴻⵡⵛ ⵜⴰⵢⵏⵉⵜ ⵉ ⵜⵉⵖⵉⵜ ⵉⵏⵓ, ⴻⵡⵛ ⴰⵎⴻⵣⵣⵓⵖ ⵉ ⵍⴻⴼⵀⴰⵎⴻⵜ ⵉⵏⵓ,
2 ⵎⴰⵃⴻⵏⴷ ⴰⴷ ⵜⴻⵡⵛⴻⴷ ⵃⴰⴹⵓⵔ,
ⵓ ⵉⵢⴻⵏⵛⵉⵛⴻⵏ ⵏⵏⴻⵛ ⴰⴷ ⵃⴹⴰⵏ ⵅ ⵜⵓⵙⵙⵏⴰ.
3 ⵎⵉⵏⵣⵉ ⵉⵢⴻⵏⵛⵉⵛⴻⵏ ⵏ ⵜⴻⵎⵖⴰⵔⵜ ⵜⴰⴱⴰⵔⵔⴰⵏⵉⵜ
ⵜⵜⵓⴷⵓⵎⴻⵏ ⵙ ⵜⴰⵎⵎⴻⵏⵜ ⵏ ⵜⴻⵖⵔⴰⵚⵜ,
ⴰⵏⴻⵖ ⵏⵏⴻⵙ ⴷ ⴰⵍⴻⵇⵇⴰⵖ ⵅ ⵣⵣⴻⵛⵜ, ■
4 ⵎⴰⵛⴰ ⵖⴰⵔ ⵓⵏⴻⴳⴳⴰⵔ
ⴰⵇⴰ-ⵜⵜ ⴷ ⵜⴰⵎⴻⵔⵣⴰⴳⵜ ⴰⵎ ⵛⵛⵉⵃ,
ⵜⴻⵇⴹⴻⵄ ⴰⵎ ⵢⵉⵊⵊ ⵏ ⵙⵙⵉⴼ
ⵙ ⵜⵏⴰⵢⴻⵏ ⵏ ⵡⵓⴷⵎⴰⵡⴻⵏ.
5 ⵉⴹⴰⵔⴻⵏ ⵏⵏⴻⵙ ⵜⵜⴰⵡⵢⴻⵏ ⵖⴰⵔ ⵍⵎⴻⵡⵜ,
ⵉⵚⵓⵔⴰⴼ ⵏⵏⴻⵙ ⵏⴻⴷⴷⵀⴻⵏ ⵖⴰⵔ ⵍⴰⵅⴰⵔⵜ. ■
6 ⴰⵍⴰⵎⵉ ⵡⴰⵔ ⵜᵉⵟⵟⵉⴼⴻⴷ ⵄⴻⵎⵎⴰⵔⵚ
ⴰⴱⵔⵉⴷ ⵏ ⵜⵓⴷⴰⵔⵜ,
ⴳⴳⵓⵔⴻⵏⵜ ⵍⴰⵜⴰⵔⴰⵜ ⵏ ⵉⴹⴰⵔⴻⵏ ⵏⵏⴻⵙ
ⵙⵙⴰ ⴷ ⵙⵙⴰ ⴱⵍⴰ ⵎⴰ ⵜⴻⵙⵙⵏⴻⴷ ⵛⴻⴽ.
7 ⵅⴻⵏⵏⵉ ⵍⴻⵅⵅⵓ, ⴰ ⵉⵃⴻⵏⵊⵉⵔⴻⵏ, ⵙⵍⴻⵎ-ⴷⴷ ⵖⴰⵔⵉ,
ⵡⴰⵔ ⵜⵃⴻⵢⵢⴰⴷⴻⵎ ⵛⴰ
ⵅ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ.
8 ⵙⵉⴳⴳⵯⴻⵊ ⴰⴱⵔⵉⴷ ⵏⵏⴻⵛ ⵅⴰⵙ,
ⵡⴰⵔ ⵜⵜⴰⴷⴻⵙ ⵜⴰⵡⵡⴰⵔⵜ ⵏ ⵜⴰⴷⴷⴰⵔⵜ ⵏⵏⴻⵙ,
9 ⵃⵉⵎⴰ ⵡⴰⵔ ⵜᵉⵜⵜⵉⵛⴻⴷ ⵛⵛⴰⵏ ⵏⵏⴻⵛ ⵉ ⵉⵏⵏⴻⵖⵏⵉ,
ⵉⵙⴻⴳⴳⵯⵓⵙⴰ ⵏⵏⴻⵛ ⵉ ⵡⴻⵏⵏⵉ ⵉⵜⵜⴻⵇⵙⵉⵃⴻⵏ ⴰⵟⵟⴰⵙ, ■
10 ⵃⵉⵎⴰ ⵉⴱⴰⵔⵔⴰⵏⵉⵢⵢⴻⵏ
ⵡⴰⵔ ⵜⵜⵊⴰⵡⴰⵏⴻⵏ ⴷⴻⴳ ⵡⴰⴳⵍⴰ ⵏⵏⴻⵛ,
ⵓ ⵎⴰⵔⵔⴰ ⵍⵖⵉⴵⴻⵜ ⵏ ⵓⵎⴰⵔⵔⴻⵜ ⵏⵏⴻⵛ
ⵡⴰⵔ ⴷⴷ-ⵜᵉⵜⵜⵉⵙ ⴷⵉ ⵜⴰⴷⴷⴰⵔⵜ
ⵏ ⵡⴻⵏⵏⵉ ⵡⴰⵔ ⵉⵜⵜⵡⵉⵙⵙⵏⴻⵏ,
11 ⵓ ⴰⴷ ⵜⵣⴻⵀⵀⴰⵔⴻⴷ ⵖⴰⵔ ⵓⵏⴻⴳⴳⴰⵔ,
ⵅⵎⵉ ⵖⴰ ⵜᵉⵜⵜⵡⴰⵛⵛ ⴰⵔⵔⵉⵎⴻⵜ ⵏⵏⴻⵛ
ⴷ ⵡⴻⵢⵙⵓⵎ ⵏⵏⴻⵛ,
12 ⴰⴷ ⵜⵉⵏⵉⴷ: “ⵎⴰⵎⵎⴻⵛ ⴳⴳⵉⵖ ⵏⴻⵛⵛ
ⵛⴰⵔⵀⴻⵖ ⵜⵜⴰⵔⴱⵉⵢⵢⴻⵜ,
ⵎⴰⵎⵎⴻⵛ ⵉⵏⴹⴰⵔ ⵓⵍ ⵉⵏⵓ ⴰⵡⴻⴱⴱⴻⵅ?
13 ⵎⴰⵎⵎⴻⵛ ⵡⴰⵔ ⵙⵍⵉⵖ ⵖⴰⵔ ⵜⵎⵉⵊⵊⴰ
ⵏ ⵢⵉⵏⵏⵉ ⴷ ⴰⵢⵉ ⵉⴷⴰⵔⵔⴱⴻⵏ,
ⵡⴰⵔ ⵡⵛⵉⵖ ⴰⵎⴻⵣⵣⵓⵖ ⵉⵏⵓ
ⵉ ⵉⵎⵙⴻⵍⵎⴰⴷⴻⵏ ⵉⵏⵓ?
14 ⵄⵍⴰⵃⴰⵍ ⵜⵓⵖⴰ ⵓⴼⵉⵖ ⵉⵅⴻⴼ ⵉⵏⵓ
ⴷⵉ ⵄⵍⴰⵎ ⴽⵓⵍ ⵍⵖⴰⵔ,
ⴷⵉ ⵍⵡⴻⵙⵟ ⵏ ⵡⴻⴳⵔⴰⵡ ⵏ ⵍⴳⴻⵏⵙ ⵓ ⵏ ⵜⵎⴻⵙⵎⵓⵏⵜ!”
15 ⵙⵓⵡ ⴰⵎⴰⵏ ⵣⴻⴳ ⵡⴰⵏⵓ ⵏⵏⴻⵛ,
ⵓⵍⴰ ⴷ ⴰⵎⴰⵏ ⵉⵙⵙⵉⵣⵣⵍⴻⵏ
ⵣⵉ ⵍⴰⴵⴰⵖ ⵏ ⵍⵄⵓⵏⵚⴰⵔ ⵏⵏⴻⵛ.
16 ⵉⵍⵉ ⴰⴷ ⵙⵙⴻⴼⵢⴻⵏ ⵡⴰⵎⴰⵏ
ⵏ ⵍⵄⵓⵏⵚⴰⵔ ⵏⵏⴻⵛ ⴱⴰⵔⵔⴰ,
ⴰⵎ ⵜⵖⴻⵣⵔⴰⵜⵉⵏ ⵏ ⵡⴰⵎⴰⵏ ⵅ ⵉⴱⵔⵉⴷⴻⵏ.
17 ⴻⵊⵊ ⵉ-ⵜⴻⵏ ⴰⴷ ⵉⵍⵉⵏ ⵉ ⵛⴻⴽ ⵡⴻⵃⵃⴷⴻⴽ,
ⵡⴰⵔ ⵉⴵⵉ ⵉ ⵉⴱⴰⵔⵔⴰⵏⵉⵢⵢⴻⵏ ⵉ ⴷⵉⵏ ⵣⵣⴰⵜⴻⴽ.
18 ⴰⴷ ⵉⵜⵜⵡⴰⴱⴰⵔⴻⴽ ⵍⵄⵓⵏⵚⴰⵔ ⵏⵏⴻⵛ,
ⴼⴰⵔⵃ ⵉ ⵜⴻⵎⵖⴰⵔⵜ ⵣⴻⴳ ⵡⵓⵙⵙⴰⵏ ⵏ ⵜⴻⵎⵥⵉ ⵏⵏⴻⵛ.
19 ⵜⵓⴷⴰⴷⵜ ⵉⵄⵉⵣⵣⴻⵏ ⵓⵍⴰ ⴷ ⵜⵉⵖⴻⵢⴷⴻⵜ ⵏ ⵡⴻⵣⵖⴰⵔ
ⵉⵛⴻⵡⵡⴰⵔⴻⵏ ⵏⴻⵜⵜⴰⵜ!
ⴻⵊⵊ ⵉⴱⴱⴰⵛ ⵏⵏⴻⵙ ⴰⴷ ⵛⴻⴽ ⵙⵙⵢⵉⵡⵢⴻⵏ
ⴷⵉ ⵎⴰⵔⵔⴰ ⵓⵙⵙⴰⵏ,
ⵙⴻⵍⵍⴻⵎ ⵉⵅⴻⴼ ⵏⵏⴻⵛ ⵍⴻⴱⴷⴰ ⵖⴰⵔ ⵜⴰⵢⵔⵉ ⵏⵏⴻⵙ!
20 ⵎⴰⵢⴻⵎⵎⵉ, ⴰ ⵎⵎⵉ,
ⴰⴷ ⵛⴻⴽ ⵜⴻⵖⵡⴰ ⵜⴻⵎⵖⴰⵔⵜ ⵜⴰⴱⴰⵔⵔⴰⵏⴻⵛⵜ,
ⴰⴷ ⵜⴷⴰⵔⵔⵄⴻⴷ ⵉ ⵡⴻⵃⵙⵉⵏ ⵏ ⵜⴻⵎⵖⴰⵔⵜ
ⵡⴰⵔ ⵜⴻⵙⵙⵉⵏⴻⴷ?
21 ⵎⴰⵖⴰⵔ ⵉⴱⵔⵉⴷⴻⵏ ⵏ ⴱⵏⴰⴷⴻⵎ
ⴰⵇⴰ ⴰⵜⴻⵏ ⴷⵉⵏ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵙⵉⴷⵉ,
ⵏⴻⵜⵜⴰ ⵢⴰⵔⵣⵓ ⴷⵉ ⵎⴰⵔⵔⴰ ⵉⵎⴻⵙⵔⴰⵇ ⵏⵏⴻⵙ. ■
22 ⵍⵎⵓⵄⵙⵉⵢⵢⴻⵜ ⵏ ⵢⵉⵅⴻⴼ ⵏⵏⴻⵙ
ⴰⴷ ⵜⵃⴻⴱⴱⴻⵙ ⴰⵄⴻⴼⴼⴰⵏ,
ⵙ ⵉⵙⴻⵖⵡⴰⵏ ⵏ ⴷⴷⵏⵓⴱ ⵏⵏⴻⵙ ⴰⴷ ⵉⵜⵜⵡⴰⵛⴻⴷⴷ.
23 ⵏⴻⵜⵜⴰ ⴰⴷ ⵉⵎⵎⴻⵜ
ⵓⵎⵉ ⵡⴰⵔ ⴷⵉⵏ ⵜⵓⵖⵉ ⵜⵜⴰⵔⴱⵉⵢⵢⴻⵜ,
ⴰⴷ ⵉⵡⴻⴷⴷⴰⵔ
ⵙ ⵜⵓⴱⴱⵓⵀⴻⵍⵢⴰ ⵏⵏⴻⵙ ⵜⴰⵎⴻⵇⵇⵔⴰⵏⵜ.